राष्ट्रपति विद्यादेवी भण्डारीं खुगु अध्यादेश जारी याउगु दु।

मन्त्रिपरिषदया सिफारिसय् राष्ट्रपति भण्डारीं यौन हिंसाविरुद्धया छु ऐनयात संशोधन यायेगु अध्यादेश, फौजदारी कसूर व फौजदारी कार्यविधिसम्बन्धी छु न ऐनयात संशोधन यायेगु अध्यादेश, नेपाल प्रहरी व प्रदेश प्रहरी (कार्यसञ्चालन, सुपरिवेक्षण व समन्वय) (न्हापागु ) अध्यादेश जारी याउगु दु।

अथेहे तेजाब व मेमेगु घातक रासायनिक पदार्थ (निमयन) अध्यादेश, सामाजिक सुरक्षा (न्हापागु संशोधन) अध्यादेश व रेल्वे अध्यादेश न जारी याउगु दु। तत्कालिन केपी शर्मा ओली नेतृत्वया सरकारं हःगु थुगु अध्यादेश संसदं अनुमोदन मयाउगुलि निष्क्रिय जुगु खः।

आः हाकन मेगु संसद सञ्चालन मजुगुलि अध्यादेश हःगु खः। बलात्कारीयात सजाय अप्वोकगु, तेजाब आक्रमण याइपिन्त सजाय अप्वोकेगु, तेजाब आक्रमणपाखे पीडितपिन्त याउक उपचारया लागि, रेल सञ्चालन आदि ज्या यायेत थुगु अध्यादेश हयमाःगु धका सरकारया धापू दु।

 चालु आर्थिक दँया लागि हःगु मौद्रिक नीतिया समीक्षा जुया लगातार घटे जुयाच्वंगु शेयर कारोबार मापक नेप्से परिसूचक थौं बुधबाः सुधार वंगु संकेत खनेदुगु दु।

नेप्से परिसूचक ५ दशमलव २८ अंकं थहावना २ हजार ६ सय ३३ दशमलव ६५ अंक थ्यंगु दु। ‘क’ वर्गया कम्पनीपिनिगु कारोबार मापन याइगु सेन्सेटिभ इन्डेक्स धासा भचा सुधार जुगु खने दु।

नेप्से परिसूचक थहावंसा कारोबार रकम धासा ३ अर्ब न थ्यंगु मदु।

वंगु २४ घण्टाया दुने देयन्यक थप ३१६ म्हेसित कोरोना भाइरस (कोभिड–१९) या संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं देयन्यक १२ हजार ७२७ म्हेसित नमुना परीक्षण याउगु खः। अथेहे २४ घण्टाय् २५९ म्ह कोरोनामुक्त जुगु दु सा स्वम्ह सीउगु दु।

स्वास्थ्य मन्त्रालयया कथं दकलय् अप्वो येँ ११९, यलय् २९, मोरङय् २६, कास्कीइ १२ व झापा व चितवनय् झी झीम्हेसित कोरोना संक्रमण खनेदुगु दु।

नेकपा एमालेया झीक्वःगु महाधिबेशनं येँ जिल्लाया प्रतिनिधित्व यासे पुर्व बागमती प्रदेशया मुख्यमन्त्री अष्टलक्ष्मी शाक्य उपाध्यक्ष नाप गुम्ह केन्द्रिय सदस्यपि निर्वाचित जुगु दु।

निर्वाचनय् कुतुवंगु २०९६ मध्ये दकलय् सर्वाधिक १९७६ मत हया उपाध्यक्ष शाक्यं त्याकादीगु खः। अथेहे केन्द्रिय सदस्यय् कृष्णगोपल श्रेष्ठ व डा.राजन भट्टराई निर्वाचित जुगु खः।

अथेतु येँ महानगरपालिकाया मेयर बिद्या सुन्दर शाक्य, केशव स्थपित, बिना श्रेष्ठ, कृष्ण राई, नारायण सिलवाल, डा.अजय क्रान्ति शाक्य व सरिता न्यौपानेपि सर्वसहमतिइ निर्वाचित जुगु खः।

गैरआवासीय नेपाली संघ (एनआरएनए) या निर्वाचन थ्वहे पुस ११ व १२ गते जुइत्यंगु दु ।

संघया निर्वाचन समितिं म्हिगः सूचं प्रकाशित याना थ्वयान्ह्यः मंसीर २९ गतेया नितिं क्वजिउगु निर्वाचन मितियात थुखेउखे याना न्हूगु निर्वाचन धलः सार्वजनिक याःगु खः ।

संघय् निगू पक्ष दथुइ कचवं जुइधुंका परराष्ट्र मन्त्रलायं वंगु असोज ११ व कात्तिक १७ गते पत्राचार याना निर्वाचन प्रक्रिया मन्ह्याकेत निर्देशन बिइधुंका निर्वाचन दिउगु खः ।

परराष्ट्र मन्त्रालयया निर्णययात हाथ्याः बिया एनआरएनया नायः कुमार पन्तं पाटन उच्च अदालतय् मुद्दा दायर यानादीगु खः ।

आइतबाः अदालतं परराष्ट्र मन्त्रालयया निर्देशन थथें कार्यान्वयन मयायेत आदेश बिइधुंका निर्वाचनया लँपू चाःगु खः ।