नेकपा एमाले कुसे गाउँ कमिटिं अध्यक्ष व उपाध्यक्षया लागि उम्मेदवार ल्यःगु दु।

एमाले कुसे गाउँपालिकाया अध्यक्षय् प्रेमप्रसाद घर्ती व उपाध्यक्षय् टिका वली सर्वसम्मत जुगु दु।

ल्यः दुगु वडाअध्यक्षया उम्मेदवारपि छन्हु निन्हुया दुने ल्यइगु  जुगु दु।

स्थानीय तह निर्वाचनय् प्रदेश १ य् सत्ता गठबन्धनं राजेन्द्र लिङदेन नेतृत्वया राप्रपानाप तालमेल याइगु जुगु दु।

वैशाख ३० गते जुइगु स्थानीय तह निर्वाचन तयारी यानाच्वंगु सत्ता गठबन्धनं झापा जिल्लाय् तक राप्रपानाप तालमेल याइगु जुगु दु।

प्रदेश १ य् १४ जिल्लामध्ये झापाय् राप्रपाया प्रभाव तुलनात्मक बालागु खनेदु। २०७४ सालया स्थानीय तह निर्वाचनय् झापाया स्वंगु पालिका प्रमुख राप्रपां त्याकूगु खः।

ओलीया गृहजिल्ला दमकय् राप्रपा नाप वनेगु सहमति जुइ धुकुगु दु धका गठबन्धनया छम्ह नेतां धाउगु दु।

वैशाख ३० गते जुइगु स्थानीय तह निर्वाचनय् रुपन्देहीइ च्वंगु खुगु स्थानीय तहया सत्तारुढ दल दथुइ गठबन्धन मजुइगु जुगु दु ।

१६ स्थानीय तहमध्ये जिल्लाय् दक्षिणी भेग लुम्बिनी सांस्कृतिक नगरपालिका नाप मर्चवारी, सम्मरीमाई, कोटहीमाई, मायादेवी व गैडहवाय् याकचा हे चुनाव ल्वाइगु जगु दु धका गठबन्धनय् आवद्ध दल दथुइ सहमति जुगु दु।

उगु पालिकाय् एमाले कमजोर जुगुलि याकचा हे चुनाव ल्वाइगु जुगु दु। थुगु खुगु पालिकामध्ये न्यागु पालिकाय् वंगु निर्वाचनय् जनता समाजवादी पार्टी न त्याकूगु खः।

आः छगु पालिका प्रमुख व उपप्रमुख लोकतान्त्रिक समाजवादी पार्टीइ प्रवेश याउगु खः। जनता समाजवादी पार्टी न दक्षिणी भेगया च्यागु पालिकाय् दाबी याउगुलि दलपि दथुइ सहमति मजुगुलि मित्रवत प्रतिस्पर्धा याना वनेत्यःगु खः।

नेपाली कांग्रेसं केन्द्रीय कार्यसम्पादन समितिया बैठक च्वनेत्यःगु दु।

खुगु महानगरपालिका व ११ उपमहानगरपालिकाया प्रमुख व उपप्रमुखया उम्मेदवारबारे छलफल यायेत बैठक च्वनेत्यःगु खः।

बैठक न्हिनसिया २ बजे पार्टी केन्द्रीय कार्यालय सानेपाय् च्वनेत्यःगु खः। सत्तारुढ गठबन्धनय् महानगरपालिका व नगरपालिकाया भागवण्डाबारे अझ न सहमति जुगु मदुनि।

थुकिया निति केन्द्रीय संयन्त्र हे टुंग्य यायेगु सहमति जुगु दु तर खुगु हे महानगरपालिकाय् मेयर मत्वत्यत कांग्रेस नेतृत्वय् क्वयागु कमिटीइ तधःगु दबाब दु ।

साइकलमैत्री शहर दयकेगु उद्देश्यं यलय् सतक साइकलमैत्री दयकूगु खःसा आः दक्को साइकल लेन अतिक्रमण जुयाच्वंगु दु।

यल महानगरपालिकां यक्को महत्व बिया सातदोबाटो, लगंख्यः, सुन्धारा, पूच्वो, भनिमण्डल, झम्सिख्यः व कुपण्डोलया सतकय् साइकल लेन बालागु व्यवस्था जुगु खनेमदु।

लिपागु इलय् स्वास्थ्य सचेतना व साइकलमैत्री सतक संरचना निर्माण जुइगु भलसा कया तःगु खःसा अथे जुगु खनेमदु। थुकियाना साइकल यात्रीपि निरुत्साही जुगु खनेदु।