वंगु २४ घण्टाया दुने देयन्यक थप २५९ म्हेसित कोरोना संक्रमण पुष्टि जुगु दु।

७ हजार २ सय ३१ म्हेसित पीसीआर परीक्षण याउगु २४३ म्ह व २ हजार ६ सय ५७ म्हेसिगु एन्टीजेन परीक्षण याउगुलि १६ म्ह याना २५९ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं छम्ह सीउगु दु सा २६४ म्ह कोरोनामुक्त जुगु दु।

नेकपा एमालेया नेता लालबाबु पण्डितं केन्द्रीय सदस्य पद अस्वीकार याउगु दु। पदाधिकारीइ दाबी याना वयाच्वम्ह पण्डितयात केन्द्रीय कमिटी सदस्यय् तःगु खः।

उकियात असन्तुष्टि प्वकूसे पण्डितं दक्को कार्यकारी पदपाखे विदा कायेगु घोषणा याउगु दु। सोमबाः सामाजिक सन्जालय् पूर्वमन्त्री पण्डितं च्वंगु दु्, ‘थौंनिसे दक्को कार्यकारी पदपाखे बिदा कासे झीक्वःगु महाधिवेशनय त्यापि कमरेडपिन्त भिंतुना।’ थःम्हेसिया केन्द्रीय सदस्यय् न्हापा हे दने मफु धका धयावया च्वनागुलि आः केन्द्रीय सदस्यय् तःगुलिे अस्वीकार यानागु दु धका धाउगु खः। ‘केन्द्रीय सदस्यय् दनेमफु धयाउगु हे खः।

आः पदाधिकारीइ बागी दके मफु। आः जि पार्टीया कार्यकारी भूमिकाय् मच्वसे संगठित सदस्य जुया च्वने’ धका धाउगु दु।

शेयर बजाःया परिसूचक नेप्से थौं सोमवाः हाकनं घटे जुगु दु। म्हिगः ८० अङ्कं घटे जुगु नेप्से थौं २१ दशमलव ५१ अङ्कं घटे जुया २ हजार ६ सय २९ दशमलव ९७ विन्दुइ झरे जुगु दु।

जलविद्युत् व म्युचल फन्डबाहेक मेगु दक्को समूहया शेयर कुहावंगु दु। विकास बैंक, उत्पादन, बीमा व मेमेगु समूहया शेयर तधःगु ल्याखं घटे जुगु दु। २ सय २८ कम्पनीया ८२ लाख २५ हजार कित्ता शेयर ४ अर्ब ८९ लाख रुपैयाँया कारोबार जुगु दु।

दकलय् अप्वो महालक्ष्मी विकास बैंकया ६१ करोड रुपैयाँ शेयर किनबेच जुगु दु। आईसीएफसी फाइनान्सया शेयर १० प्रतिशतं चन्द्रागिरि हिल्स व महालक्ष्मी विकास बैंकया शेयर ५ प्रतिशत स्वया अप्वो घटे जुगु दु।

समग्र बजाः घटे जूसा न्यादी हाइड्रोपावरया शेयर १० प्रतिशतं थहावंगु दु।

राष्ट्रिय प्रजातन्त्र पार्टीया अध्यक्ष कमल थापां मंसिर १५ निसे येँ जुइगु पार्टीया महाधिवेशनय् हाकनं अध्यक्ष पदय् उम्मेदवारी बिइगु घोषणा याउगु दु।

सोमबाः येँ छगु ज्यााझ्वलय् उम्मेदवारी घोषणा यासे थःम्हेसिया अझ न यायेमाःगु ज्या ल्यदनिइगु जुगु दु थम्हेसिया हाकनं अध्यक्ष पदय् उम्मेदवारी बियाउगु खः धका धयादीगु खः।

राप्रपाया अध्यक्षय् थ्व स्वया न्ह्यः नेता राजेन्द्र लिङ्देनं उम्मेदवारी घोषणा याये धुकुगु दु।

लुँया भाः थौं तोला सच्छि कुहावंगु दु। थौं तोलां सच्छि कुहावया ९२ हजार रुपैयाँ निर्धारण याउगु दु धका नेपाल सुनचाँदी व्यवसायी महासङ्घं धाउगु दु।

अथेहे थौं वहः तोलां झीतका थहावंगु दु। वहः तोला झीतका थहा वना १२ सय २० रुपैयाँ कारोबार जुगु दु धका महासङ्घं धाउगु दु।