नेवाःतयेगु मंकाःगु राष्ट्रिय संगठन नेवाः देय् दबू किपू नगर समितिपाखें नेवाः मंकाः अडान पौयात कया किपूया नेवाः वस्तीया थीथी लागाय् सभा याना प्रचार यायेगु नापं नेवाःतय्त थुइकेगु ज्या याइगु जूगु दु।

स्थानीय तहया चुनावया नितिं देय् दबू स्वनिगः विशेष प्रदेशपाखें तयार याःगु नेवाः मंकाः अडान पौयात कया सहलह ब्याका किपूया सन्दर्भय् थप छुं छुं बुँदा तयेगु निर्णय याना आः याकनं हे किपूया थाय् थासय् अथे सभा यायेगु धकाः निर्णय याःगु खः।

सोमवाः किपुलिइ जूगु उगु सहलह मुँज्याय् मूपाहां देय् दबू स्वनिगः विशेष प्रदेशया अध्यक्ष श्रीकृष्ण महर्जनं नेवाः मंकाः अडान पौया आवश्यता व थुगु अभियानं लाइगु लिच्वःया बारे कनादीगु खः।

आः किपुलिइ क्रियाशिल जुयाच्वंगु राजनीतिक दलनिसें दलया उम्मेदवार व मेमेपिं उम्मेदवारपिन्त तकं अडान पौ लःल्हायेगु अले इमिगु घोषणा पौनिसें प्रतिबद्धता पतिइ तकं दुथ्याकेत इनाप यायेगु धकाः नं क्वःछिउगु दु।

ज्याझ्वः देय् दबू किपू नगर समितिया नायो बुद्धिलाल ज्यापुया नायोसुइ छ्याञ्जे विनेश श्रेष्ठं न्ह्याकादीगु खः । सरलगोपाल महर्जनं लसकुस न्वचू बियादीगु उगु ज्याझ्वलय् पाहां कथं नेवाः देय् दबू स्वनिगः विशेष प्रदेशया दुजःपिं नरेश श्रेष्ठ, पार्वती मानन्धर, देय् दबुया येँ जिल्ला न्वकू रामभोला महर्जनं ब्वति कयादीगु खः।

पाहांपिन्सं अडान पौया बारे खँ तयादीगु खःसा ज्याझ्वलय् किपुलिइ क्रियाशिल जुयाच्वंगु नेवाःतयगु थीथी खलः पुचःनिसें नेवाः अभियन्ता नापं नेवाः ज्याझ्लय् सक्रिय जुयादीपिं नं ब्बति काइगु जुगु।

नेपाली कांग्रेस व नेकपा एकीकृत समाजवादीं पोखरा महानगरया प्रमुखय् दाबी याउगु दु।

वंगु चुनावय् नेकपा एमाले न त्याउगुलि पोखराया मेयरया निति गठबन्धन दुने थःपिन्त माः धका नेकपा एकीकृत समाजवादी न अडान तःगु दु ।

तर, पोखराय् कांग्रेसं न समाजवादीया नेतृत्व स्वीकार मयायेगु अडानया कारण भागबन्डा टुग्ये याये मफयाच्वंगु खः। मेगु न्यागु महानगरय् सहमति जुइ धूकुगु दु धका धाउगु दु।

केन्द्रपाखे खुगु महानगर व झीछगु उपमहानगरपालिकाया प्रमुख व उपप्रमुख याना ३४ सिट न्यागु दल दथुइ भागबन्डा यायेगु थ्व स्वया न्ह्यः न सहमति जुइ धुकुगु खः।

गठबन्धनय् नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी व राष्ट्रिय जनमोर्चा खः। म्हिगःया बैठकय् विराटनगर, वीरगञ्ज, भरतपुर, येँ व यलय् सहमति जुइ धुकुगु धासा पोखराय् टुग्ये मजुनिगु खः।

कांग्रेसयात येँ, यल व विराटनगरय् प्रमुख बिइगु, भरतपुरय् माओवादी केन्द्र व वीरगञ्जया प्रमुख जसपायात बिइगु तयारी दु।

थौं सुथय् ११ बजे बैठक च्वनेगु तयारी दु।

नेपाल राष्ट्र बैंकय् निलम्बित गभर्नर महाप्रसाद अधिकारीं सम्पत्ति शुद्धिकरणया द्धपःया फाइल छानबिन जुयाच्वंगु इलय् अर्थमन्त्री जनार्दन शर्मा न पटक–पटक बैंकखाता फुकुवा यायेत दबाव बिउगु धका धयादीगु दु।

थःत गैरकानूनी रुपं निलम्बन याउगु व थःत छानविन यायेत गठन जुगु जाँचबुझ समिति कानूनसम्मत मजुगु धका दाबी यासे अधिकारी सर्वोच्च अदालत वंगु दु। रिट निवेदन सुनुवाइया लागि पाः पियाच्वंगु दु।

रिट निवेदनय् अधिकारीं सम्पत्ति शुद्धीकरणसम्बन्धी विषयया विवाद जुगुलि व छानबिनया झ्वलय् छम्ह मनू (अछामया पृथ्वीबहादुर शाह) बैंक खाता फुकुवा यानाबिइत मन्त्रीं पटकपटक दबाब बिउगु दाबी याउगु खः।

रिट निवेदनय् शाहया नां उल्लेख मयासे अधिकारी धाउगु दु, ‘सम्पत्ति शुद्धीकरण सम्बन्धी विवाद जुगलि उम्ह मनूया रोके यानातःगु बैंक खाता फुकुवा जुइफैमखु धका जि निवेदकं पटकपटक अडान कयाउगु खः।’

कानून कथं हे अनुसन्धान याइम्हेसित अधिकार बिउगु सम्पत्ति शुद्धीकरण अनुसन्धान विभाग नाप नेपाल प्रहरी, केन्द्रीय अनुसन्धान ब्यूरापाखे अनुसन्धान जुयाच्वंगु विवादित मनूया निवेदनय् तोक लगेयाना अर्थमन्त्रीं जानकारी माग यायेगु गलत खः धका वयकलं धाउगु दु।

खाता रोक्का जुगलि पृथ्वीबहादुरं करिव ६ बैंकया कारोवार खुले यायेत माग यासे सर्वोच्च अदालतय् निवेदन बिउगुलि अन्तरिम आदेश मजुगु खः।

पृथ्वीबहादुरया खाता फुकुवा यायेत अर्थमन्त्री शर्मां  पटकपटक मौखिक दबाव बिउगु व अदालतय् मुद्दा विचाराधीन जुगुलि धाये मिलेमजु धका धया न लिसः तक न्यने तयार मजुगु धयादिसे गभर्नर अधिकारीं थःगु निवेदनय् उल्लेख याउगु दु।

पुरातात्विक सम्पदाया वास्तुकला ज्ञाता नाप वरिष्ठ चित्रकार व संगीतज्ञ भ्वाइलिन गुरु हरिप्रशाद बैद्यं सृजना याउगु चित्रकला प्रदर्शन याइगु जुगु दु।

नेवाः ग्वाहालि पुचः नेपाः १३ व १५ वडा येँया ग्वसालय् थ्व हे वइगु बैशाख २२, २३ व २४ गते नेपाल कला परिषद, बबरमहलय् वयकलं सृजना यानादीगु चित्रकला प्रदर्शनी यायेत्यःगु खः।

सम्पदा निर्माणय् आर्किटेक्चरया भूमिका निर्वाह यानाच्वनादीम्ह वयकः आः ८५ दँ दयेधुकुगु दु।

वयकःयात २२ गते छगु ज्याझ्वः दथुइ सम्मान यायेगु जानकारी बिइत छगु पत्रकार सम्मेलन याउगु खः।

भ्वालिन गुरु जुयादीम्ह बैद्य न स्यानातःपिन्स उगु ज्याझ्वलय् भ्वाइलन संगीत प्रस्तुति व चित्रकला प्रदशनी यायेत्यःगु खः।

ख्वपया तधःगु बिस्काः जात्रा म्हिगः क्वचाःगु दु।

वंगु चैत्र २७ निसे सुरु जुगु जात्रा च्याचाः व गुन्हुलिपा क्वचाःगु खः।

प्यागोडा शैलीइ निर्माण जुगु स्वःगु तल्लाया भैरव द्यः मू द्यः व बेताल द्यःयात विराजमान यासे न्यागू तल्लाया द्यः सालेग परम्परा दुगु खः।