निर्वाचन आयोगं नेपाल विद्युत प्राधिकरणया कार्यकारी निर्देशक कुलमान घिसिङयात स्पष्टीकरण न्यंगू दु।

निर्वाचन आचार संहिता उल्लंघन याउगु धासे आयोगं उमित स्पष्टीकरण न्यंगु खः। नेकपा माओवादी केन्द्रं घिसिङया फोटो तया निर्वाचन प्रचार सामग्री दयकूगु खः।

‘फोटो तया प्रचार सामग्री दयकूगु विषय छिगु सहमति खः कि मखु धका स्पष्टीकरण न्यनेगु जुगु दु’ आयोगया स्रोतंं धाउगु दु, ‘सहमति मखुगु खःसा अथे फोटो सहितया प्रचारसामग्री खन्कंन छि आयोगय् छाय् उजुरी मयानागु धका न्यनेगु धका निर्णय जुगु खः।’

आयोगं माओवादी केन्द्रया प्रचार सामग्रीइ फोटो सहमतिइ तःगु खः वा मखु धइगु न्ह्यसः खः। उगु स्पष्टीकरण पत्रय् सचिवालयं धाउगु दु, ‘न्ह्यन्हुया दुने आयोगयात चित्तबुझे जुगु कथं लिसः बिइत इनाप याृगु खः।’

‘सार्वजनिक संस्था व उगु थासय् ज्या याइपि कर्मचारी जुगुलि पालना यायेमाःगु कथं छु न राजनीतिक दल वा उम्मेदवारया प्रचार प्रसार याये मज्युगु विषय आचारसंहिताया उल्लंघन याउगु आधारय् छितः निर्वाचन आयोग ऐन, २०७३ या दफा २३ बमोजिम छाय् कारवाही यायेम्वाः?’ आयोगं कुलमानयात न्यंगु खः।

अथेहे निर्वाचन आयोगं गण्डकी प्रदेशया सभामुख नेत्रनाथ अधिकारीयात न स्पष्टीकरण न्यंगू दु। गण्डकी प्रदेशया सभामुखं म्हिगः बुधबाः पोखराय् छगु ज्याझ्वलय् थम्हेसिया न निर्वाचन खर्च विवरण मखुगु पेश यानागु धका धाउगु खः।

राष्ट्रपति विद्यादेवी भण्डारीं संविधान दिवस २०७८ या लसताय् थीथी मनू तयेत थौं छगु ज्याझ्वः दथुइ पदक लल्हानादीगु दु।

वंगु असोज ३ गते संविधान दिवसया लसताय् सरकारं याउगु सिफारिसय् राष्ट्रपति भण्डारीपाखे घोषितमध्ये नेपाल रत्न मानपदवी पूर्वप्रधानमन्त्री मदुम्ह कृष्णप्रसाद भट्टराई, राष्ट्र गौरव मन्त्रिपरिषदया पूर्वअध्यक्ष मदुम्ह सुवर्णशमशेर राणा व पूर्वप्रधानमन्त्री झलनाथ खनालयात लल्हानादीगु खः।

अथेहे महाउज्ज्वल राष्ट्रदीप राजनीतिज्ञपि मदुम्ह तुलसीलाल अमात्य, मदुम्ह मङ्गलादेवी सिंह, मोहनचन्द्र अधिकारी, प्रजातान्त्रिक योद्धा मदुम्ह दुर्गानन्द झा व स्वरसम्राट मदुम्ह नारायणगोपाल गुरुवाचार्ययात लल्हानादीगु खः। अथेहे सुप्रसिद्ध प्रबल जनसेवाश्रीपाखे राजनीतिज्ञपि प्रदीप नेपाल, मदुम्ह पोष्टबहादुर बोगटी, मदुम्ह मार्शलजुलुम शाक्य व उज्ज्वल कीर्तिमय राष्ट्रदीप सर्वाेच्च अदालतया न्यायाधीश विश्वम्भरप्रसाद श्रेष्ठयात लल्हानादीगु खः।

थौं विभूषण कयादीपि न्यासःया ल्याखं दु। उपराष्ट्रपति नन्दबहादुर पुन, प्रधानमन्त्री शेरबहादुर देउवा, कायममुकायम प्रधानन्यायाधीश दीपककुमार कार्की, प्रतिनिधि सभाया सभामुख अग्निप्रसाद सापकोटा, राष्ट्रिय सभाया अध्यक्ष गणेशप्रसाद तिमिल्सिना, गृहमन्त्री बालकृष्ण खाण लगायतया मन्त्री व उच्चपदस्थ अधिकारीपिनिगु उपस्थितिइ राष्ट्रपति भवन शीतल निवासय् छगु विशेष समारोह दथुइ लल्हायेगु ज्या जुगु खः।

नेकपा एमालेया अध्यक्ष नाप पूर्वप्रधानमन्त्री केपी शर्मा ओली स्काउटय् मेधावी पदकपाखे विभूषित जुयादीगु दु।

बिहीबाः नेपाल स्काउटं ग्वसाः ग्वंगुछगु ज्याझ्वः दथुइ राष्ट्रपति विद्यादेवी भण्डारीं उगु पदक हस्तान्तरण यानादीगु खः।

नेपाल स्काउटया विकास व विस्तारया लागि तधःगु योगदान याउगु धका धासे विश्व स्काउट संगठनया एसिया प्रशान्त क्षेत्रं ओलीयात मेधावी पदकपाखे विभूषित याउगु खः।

ओलीं नेपाल स्काउटया न्ह्यगू हे प्रदेश व ७५३ स्थानीय तहय् थ्यकेगु निति संरक्षकया हैसियतं अतुलनीय योगदान याउगु धका नेपाल स्काउटं धाउगु दु।

राष्ट्रपति विद्यादेवी भण्डारीं २० दँनिसे पत्रकारिताय् ख्यलय् क्रियाशीलम्ह नेपाः पत्रकार राष्ट्रिय दबूया महासचिव नाप नेपाल आदिवासि जनजाति पत्रकार महासंघया केन्द्रिय सदस्य सुनील महर्जनयात छगु ज्याझ्वः दथुइ जनसेवाश्री पदवी पञ्चमपाखे विभूषित जुयादीगु दु।

थौं विहीबाः शीतल निवासय् जुगु छगु ज्याझ्वः दथुइ सुशोभन समारोहय् राष्ट्रपति भण्डारीं पत्रकार महर्जनयात उगु पदवी लल्हानादीगु खः। पत्रकार महर्जन वंगु २०५९ सालय् महानगर दैनिकय् प्रशिक्षार्थी पत्रकार जुया २०६० साल श्रावणनिसे नेपाल समाचारपत्र दैनिकपाखे पत्रकारिता शुरु यानादीगु खः।

वयकः आः नेपाल समाचारपत्र दैनिकय् सहसम्पादक न खः। पत्रकार महर्जनं पत्रकारिता ख्यःपाखे बुद्धधर्मया विकास, मूर्त व अर्मूृत संस्कृति, सम्पदाया संरक्षण नाप यलय् बृहत सरोकार नाप निजामती प्रशासन, संघीयता, स्थानीय तह विषय निरन्तर रिपोटिङ याना वयाच्वम्ह खः।

निर्वाचन आयोगं स्थानीय तह निर्वाचनबारे अन्यौल सृजना जुइगु अभिव्यक्ति मबिइगु निति राजनीतिक दलपिन्त इनाप याउगु दु।

३० वैशाख २०७९ य् जुइगु निर्वाचनया लागि तीव्र गतिइ तयारी जुइ धुकुगु दु धका धयादीसे आयोगं निर्वाचनया सम्बन्धय् आशकां जुइगु कथं अभिव्यक्ति मबिइत इनाप याउगु खः।

बिहीबाः ग्वसाः ग्वंगु नियमित पत्रकार सम्मेलनय् आयोगया प्रवक्ता शालिग्राम शर्मा पौडेलं धाउगु दु, निर्वाचनया विषय अन्योलता सिर्जना जुइगु कथं अभिव्यक्ति मबिइत सरोकारवाला सकसित आयोग इनाप यानागु दु।’

वयकया कथं निर्वाचनया लागि माःगु १ करोड ९४ लाख मतपत्र मध्ये ३९ जिल्लाय् ७० लाख ३३ हजार छापे जुइ धुकुगु दु। न्हि न्हि ८ लाख मतपत्र छापे याना च्वंनागु दु। निर्वाचन पर्यवेक्षण यायेत ६५ गु संस्थां निवेदन बिइ धुकुगु दु, उकिइ २० हजार ४ सय ६७ पर्यवेक्षक प्रस्ताव वये धुकुगु दु।

निवेदनय् जाँचबुझ याना याकन हे आयोगं पर्यवेक्षण अनुमति सम्बन्धित निर्णय यायेगु जुइ धका प्रवक्ता शर्मा न धाउगु दु।