कोरोनाया न्हूगु भेरियन्ट ओमिक्रोनया हाथ्यायात मध्यनजर यानाः सरकारं दक्षिण अफ्रिकी देय्या नागरिकतय्त मेगु व्यवस्था मजूतले नेपाः दुहाँवये मदइगु कथं निर्णय याःगु दु ।

गृहमन्त्रालयया अध्यागमन विभाग, त्रिभुवन विमानस्थलया ज्याकू अले सीमा क्षेत्रया स्थानीय प्रशासन ज्याकूयात दक्षिण अफ्रिकी देय्या नागरिकतय्त नेपाः दुमकायेगु व्यवस्था यायेत धागु दु ।

थ्व निर्णय कार्यान्वयनया नितिं अध्यागमन विभागं तकं थः मातहतया अध्यागमन ज्याकूतय्त परिपत्र याःगु दु । दक्षिण अफ्रिकी देय्नाप मेमेगु देशय् ओमिक्रोन भेरियन्ट लुइवं छिमेकी देय् भारतं न थुकिया रोकथाम व नियन्त्रणया नितिं उच्च् सतर्कता नालेगु निर्णय यायेधुंकूगु दु ।

उखे, विश्व स्वास्थ्य संगठन (डब्लूएचओं) कोरोनाया न्हुगु भेरियन्ट ओमिक्रोन लूगु लिसें नेपाः लिसेंया दक्षिण पूर्वी एशियाया देय्यात उच्च सतर्कता नालेत छ्याता बिउगु दु ।

डब्लूएचओया दक्षिण– पूर्वी एशिया स्वइगु क्षेत्रीय ज्याकुथिं विज्ञप्ति जारी याना फु्क्क देय्तयेसं सर्भेलेन्स, जनस्वास्थ्यया मापदण्ड, सामाजिक दूरी लिसें खोप ज्याझ्वयात अप्वयेकेमाःगु धाःगु दु ।

डब्लूएचओया क्षेत्रीय निर्देशक डा पुनम क्षेत्रपाल सिंहं उगु क्षेत्रया अप्वः धैथें देशय् कोभिड– १९ संक्रमितया ल्याः तुलनात्मक रुपय् म्हो जुयावंसा नं हलिंया छुं देशय् न्हूगु भेरियन्ट लूगु धका अझं नं संक्रमणया जोखिम पूर्णरुपय् मचिउगु जानकारी बियादीगु दु ।

दक्षिण–पूर्वी एशियाया फुक्क देय्तयेसं सर्भेलेन्स लिसें सिक्वेन्सिङय् नं बः बिइमाःगु विज्ञप्तिइ उल्लेख यानातःगु दु । लिसें मेगु देय्पाखें थःगु देशय् न्हूगु भेरियन्टयात दुहाँवयेके मबिइगु नितिं अन्तर्राष्ट्रिय यात्रा याइपिन्त थप निगरानी लिसें नियन्त्रणया पायेछि उपाय नालेत तकं डब्लूएचओं छ्याता बिउगु दु ।

नेकपा (एमाले) या नेता टंक कार्कीं सचिव पदय् उम्मेदवारी दर्ता याउगु दु।

सौराहय् न्ह्यानाच्वंगु झीक्वःगु महाधिवेशनया बन्दसत्रय् केपी शर्मा ओलीं सहमतिया लागि १९ म्ह पदाधिकारी व ३०१ म्ह केन्द्रीय सदस्यपिनिग नां पेश याउगु खः।

उगु धलखय् सचिव टोपबहादुर रायमाझी, छविलाल विश्वकर्मा, रघुवीर महासेठ, लेखराज भट्ट, योगेश भट्टराई, गोकर्ण विष्ट व पद्मा अर्यालं दुगु खः।

उगु धलखय् असहमति प्वकूसे उम्मेदवारी दर्ता याउगु खः। कार्की नाप भीम आचार्य न सचिवय् उम्मेदवारी दर्ता याउगु खः।

भीम रावलं अध्यक्षय् उम्मेदवारी दर्ता याये धुकुगु दु।

नेपाली कांग्रेसया १४ क्वःगु महाधिवेशन अन्तर्गत येँ जिल्ला समितिइ प्रकाशमान सिंह व गगन थापाया प्यानल विजयी जुगु दु।

थुगु समूहया प्यानल हे विजयी जुगु खः। सभापतिइ कृष्ण बानियाँ न १ हजार ९५७ मत हया विजयी जुगु खः।

उपसभापतिइ गोकर्ण केसी १ हजार ९२२ मत, सचिवय् इन्द्र बहादुर थापा १ हजार ९१५ मत हया विजयी जुगु खः।

सहसचिवय् अमिता प्रधान २ हजार ६६ मत हया विजयी जुगु खः।

चितवनया सौराहय् जुयाच्वंगु नेकपा एमालेया झीक्वःगु राष्ट्रिय महाधिवेशनय् केपी शर्मा ओलीं अध्यक्षया उम्मेदवारी दर्ता याउगु दु।

अध्यक्ष पदय् भीम रावलं उम्मेदवारी दर्ता यायेवं ओलीं न उम्मेदवारी बिउगु खः।

ओलीयात विष्णु पौडेलं प्रस्ताव याउगु दु सा शंकर पोखरेलं समर्थन याउगु खः।