नेकपा एमालेया महासचिव शंकर पोखरेल न कोरोना भाइरस संक्रमण पुष्टि जूगु दु।

पोखरेल थः कोरोना संक्रमित जूगु धका फेसबुकपाखे धाउगु दु। लिपागु निवाः न्ह्यःनिसे लगातार नेपालय् कोरोना संक्रमितपि अप्पो जुया वनाच्वंगु खः।

निर्वाचन आयोगं थौं सर्वदलिय मुँज्या सःतूगु दु । राष्ट्रिय सभा निर्वाचन, कोरोना महामारी व स्थानीय तहया निर्वाचनया विषयलय् सहलह यायेत आयोगं फुक्क दलतयेत सःतूगु खः ।

मँुज्याय् १२ माघया नितिं क्वजिउगु राष्ट्रिय सभा निर्वाचनयात स्वास्थ्य मापदण्ड पालना याना क्वचायेकेगु विषयलय् सहलह जुइ । अथेहे स्थानीय तहया निर्वाचनया नितिं सरकारयात मिति प्रस्ताव यायेधुंकुगुलिं दलया राय कायेगु तयारी नं निर्वाचन आयोगं याःगु दु ।

आयोगं माघया न्हापांगु वाय् दुने निर्वाचनया मिति क्वमजिउसा वैशाखय् स्थानीय तहया निर्वाचन याये मफइगु तकं धयावःगु दु । स्थानीय तहया निर्वाचनया नितिं आयोगं बैशाख १४ व २२ या मिति प्रस्ताव याःसा नं सरकारं क्वजिउगु मदुनि ।

स्थानीय तह निर्वाचन ऐन, २०७३या व्यवस्था कथं  स्थानीय तहया पदाधिकारीया पदावधि ५ जेठय् क्वचायेत्यंगु दु ।

संविधानया धारा २२५ य् स्थानीय जनप्रतिनिधिया कार्यकाल क्वचागु  ६ ला दुने निर्वाचन यायेमाःगु धाःसा नं स्थानीय तह निर्वाचन ऐनय् कार्यकाल क्वचाइगु सिवें २ ला न्ह्यःया निर्वाचन जुइमाःगु व्यवस्था दु ।

वंगु २४ घण्टाया दुने स्वनिगः दुने १ हजार ९१६ म्हेसित कोभिड–१९ संक्रमित थपे जुगु दु।

थौं येँ १ हजार ४४९ म्ह, ख्वपय् १५० म्ह व यल ३१७ म्ह संक्रमितपि थपे जुगु दु। थ्व नाप स्वनिगलय् सक्रिय संक्रमितपि ८ हजार ३९६ म्ह थ्यंगु दु।

 स्वनिगः नाप मोरङ व कास्कीइ न संक्रिय संक्रमितपि न्यासः स्वया अप्पोगु दु।

स्वास्थ्य तथा जनसंख्या मन्त्रालयया तथ्यांक कथं बिहीबाः निगु जिल्ला मोरङ व कास्कीइ न सक्रिय संक्रमितपि न्यासः स्वया अप्पो जुगु दु।

थ्व नाप सक्रिय संक्रमित ५ सय अप्पो जुगु आः न्यागू थ्यःगु दु। थ्व स्वया न्ह्यः येँ, ख्वप, यलय् सक्रिय संक्रिमितपि ५ सय स्वया अप्पो थ्यःगु खः।

वंगु २४ घण्टाया दुने देयन्यक थप ३ हजार ५५३ म्हेसित कोरोना संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं देयन्यकया प्रयोगशालाय् १५ हजार ८१ म्हेसिगु परीक्षण याउगुलि उलि संक्रमण पुष्टि जूगु खः।

मन्त्रालयया कथं आःतक ८ लाख ४१ हजार २९७ म्हेसित संक्रमित जुइ धुकुगु दु। अथेहे थौं छम्ह सीउगु दु।

थ्वनाप आःतक सीपि ११ हजार ६१० म्ह थ्यंगु दु धका मन्त्रालयं धाउगु दु। अथेहे २७१ म्ह कोरोनामुक्त जुगु दु।