मेलम्ची खानेपानी आयोजनां मूल सुरुङय् थौंनिसे लः छ्वया हइगु जुगु दु।

मेलम्चीया अम्बाथानस्थित हेडवर्क्सय् ‘मेलम्चीया लः पुनः पथान्तरण कार्यक्रम’ यासे लः हाकन छ्वया हःगु खः।

लः थौंनिसे छ्वया हःसा हितिइ लः धासा छु दिं लिपा जक वइगु जुगु दु। थौंया ज्याझ्वलय् प्रधानमन्त्री शेरबहादुर देउवा जुइ धासा निर्वाचन आचारसंहिताया कारण सहभागी मजुइगु जुग दु।

६० दँ लिपा यलया हरिसिद्धिया त्रिशक्ति भवानी जात्रा पन्तिइ जुइगु दु।

थौंनिसे बैसाख पन्तिइ यलया जलःप्याखं जुइत्यंगु खः। थौं सांस्कृतिक परिक्रमा याना कन्ह्य व कसं हरिसिद्धि डबली, पन्तिइ प्याखं ल्हुइकिइ।

अथेहे, वैशाख १ गते हरसिद्धि द्यः छेँय् पूजा याये धुका जात्रा क्वचाइगु खः।

झीनिदँया जात्राया झ्वलय धुलिखेल, दोलखा व पशुपतिइ जात्रा सञ्चालन जुइ धुकुगु दु।

नेपाल खड्गी सेवा समितिया ग्वसालय् नायः, सिंह, खड्गी व शाही जातिया धर्म गुर्जु प्रशिक्षण बिइगु नाप झीम्हेसित लुम्बिनी बौद्ध विश्व विद्यालयया पुलांम्ह उपकुलपतिलिसें परम्परागत बौद्ध धर्म संघया संस्थापक अध्यक्ष प्रा.डा. नरेशमान बज्राचार्यया नेतृत्वय् कुलपुत्रतय्त भिक्षु लुइगु अर्थात प्रवज्या संवार प्रदान याउगु खः।

प्रवज्याः प्रदान यायेधुंका प्रशिक्षार्थीपिन्त म्हिगः देय् चाहिकाः येँ लाय्कुइ ग्वयेदां तयेत यंकुगु खः।

प्रवज्रित जुपिं म्हिगः येँया थीथी थासय् वनाः भिक्षाटन काःवंगु खःसाः थौं चैत्र २८ गते सोमवाः येँया बसन्तपुरय् सामुहिक भक्षाटन याइगु ज्याझ्वः दु धका समितिया संरक्षक मनोज नेवाः खड्गी लहनान्युजयात जानकारी बिउगु दु।

संरक्षक खड्गी कथं थौं नेवाः धर्मगुरु प्रशिक्षण व २९ गते मंगलवा प्रवज्याः बिसर्जन याना हाकनं गृहस्थी जिवनय् प्रवेश याकिगु ज्याझ्वः दु धका धयादीगु दु।

नेपालय् शिक्षा व स्वास्थ्य ख्यलय् प्यंगु दशकनिसे योगदान यानावया च्वंगु अरनिको समाजया १७ क्वःगु साधारण क्वचाःगु दु।

समाजया १७ क्वःगु साधारणं ई. बालकृष्ण श्रेष्ठ अध्यक्षय् सर्वसम्मत जुगु दु। अथेहे निर्वाचन अधिकृत डा. उदय कोइराल बिउगु जानकारी कथं डा.सर्वोत्तम श्रेष्ठ प्रथम उपाध्यक्ष, डा.उर्मिला शाक्य द्वितीय उपाध्यक्ष, डा. मनोजमान श्रेष्ठ महासचिव, ईन्जिनियर राजन महर्जन सचिव, डा. सुशील प्रजापती कोषाध्यक्षय् सर्वसम्मत कथं निर्वाचित जुगु दु।

अथेतु दुजलय् ईन्जिनियर विकास राज खड्गी, ईन्जिनियर सजुन कुमार श्रेष्ठ, दीपा प्रधान, न्हुज मानन्धर व हिना बानु  न सर्वसम्मत जुगु खः। अरनिको समाज चीनय् चिकित्सा शास्त्र व ईन्जिनियर लगायतया विषय अध्ययनयाना नेपालय् लिहावया नेपाली बिद्यार्थीपिनिगु संगठन खः ।

थुगु संस्था सन् १९८१ य् स्थपाना जुगु खः।

किपूलिइ अत्याधुनिक मेसिननाप अल्ट्रासाउन्ड सेवा सुरु जुगु दु।

किपूया पाँगाय् नापं कीर्तिपुर अल्ट्रासाउन्ड क्लिनिकं उगु सेवा सुरु याउगु खः। छगु ज्याझ्वः दथुइ किपू नगरपालिकाया मेयर रमेश महर्जनं उलेज्या यानादीगु खः।

मेयर महर्जनं थःगु खँ तयेगु झ्वलय् क्लिनिकया व्यवसायिक सफलताया निति भिंतुना देछानादीगु उगु ज्याझ्वलय् कीर्तिपुर अल्ट्रासाउन्ड क्लिनिकया सञ्चालक डा. मनोजमान श्रेष्ठं किपूया विरामीपिन्स आः पिनेवना यक्को खर्च मयास्ये व याउक सेवा बिइगु निति किपूलि हे अल्ट्रासाउन्ड क्लिनिक सुरु यानागु खः धका धयादीगु खः।

अथेहे ध्यवा पुले मफुपिन्स व असहायपिन्त क्लिनिकं निःशुल्क सेवा बिइगु धका डा. श्रेष्ठं धयादीगु खः।