वंगु २४ घण्टाय् वीरगञ्जय् ७ कोरोना संक्रमण पुष्टि जूगु दु।

२४ गु स्वाब नमुना परीक्षण याउगुलि ७ गु पोजेटिभ खनेदुगु दु धका प्रयोगशाला प्रमुख शुक्ष्म जीव विज्ञ प्रभाकर पाण्डे  न जानकारी बिउगु दु।

संक्रमित शून्य अवस्थाय् खने दये धुकुगु दु वीरगञ्जय् आः संक्रमितपि अप्पो खनेदया वंगु दु। पुस १६ गते २२ गु स्वाब नमुना परीक्षण याउगुलि स्वम्ह, १९ गते २४ गु याउगुलि स्वम्ह व २१ गते ३३ गु परिक्षणय् प्यम्हेसित पोजेटिभ खनेदुगु खः।

वीरगञ्ज इनर्वास्थित हेल्थ डेस्कय् छन्हु हे झीम्हेसित कोरोना संक्रमण पुष्टि जूगु दु।

प्रधानमन्त्री शेरबहादुर देउवां कोरोना संक्रमण अप्पोया वंगुलि तधःगु सतर्कता अपने यायेगु निति सम्बन्धित निकायपिन्त निर्देशन बिउगु दु

थौं शुक्रबाः कोभिड–१९ संकट व्यवस्थापन केन्द्र (सीसीएमसी) निर्देशक समितिया बैठकय् प्रधानमन्त्री देउवां ओमिक्रोन भेरियन्टया संक्रमणपिन्त परीक्षण व उपचारय् विशेष ध्यान बिइत निर्देशन बिउगु दु।

सीमा नाकाय् सतर्कता अपने यायेगु व कोभिड–१९ विरुद्ध खोप बिइगु ज्या न्ह्याकेत प्रधानमन्त्रीं निर्देशन बिउगु दु। बैठकय् ओमिक्रोन भेरियन्टया संक्रमणदर अप्पोया वनकि स्मार्ट लकडाउन यायेगु विषय न छलफल जूगु दु।

सीसीएमसी बैठकं स्वगूगु चरणया बुस्टर डोज खोप बिइगु ज्या न्ह्याकेत न अनुमति बिउगु दु।

नेपालय् थप २४ म्हेसित ओमिक्रोन भेरियन्टया संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं जिन सिक्वेन्सिङ याउगु २४ गू नमुनाय् ओमिक्रोन भेरियन्ट पुष्टि जूगु दु।

पुस महिनाय् संकलित कोरोना भाइरसया ११४६ पोजेटिभ नमुना स्क्रिनिङ याउगुलि २५० गु एस जिन नेगेटिभ वगु खः।

एस जिन नेगेटिभ यागु मध्ये २४ गु जिन सिक्वेन्सिङ याउगुलि उगु दक्को ओमिक्रोनया संक्रमण पुष्टि जुगु दु धका प्रवक्ता डा. संगीता मिश्रां जानकारी बिउगु दु।

वंगु २४ घण्टाया दुने देयन्यक थप ९६८ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं पीसीआर व एन्टिजेन याना १४ हजार ९७१ म्हेसिगु परीक्षण याउगुलि ९६८ म्हेसित संक्रमण पुष्टि जूगु दु।

शुक्रबाः ५४० म्हेसित संक्रमण पुष्टि जुगु दु। अथेहे २४ घण्टाय् २६२ म्ह कोरोना संक्रमणमुक्त जुगु दु।

वंगु २४ घण्टाय् येँ २८४, यलय् ६२, मोरङय् २९, ख्वपय् २३, चितवनय् २०, दाङय् १५, कास्कीइ १३, धनुषाय् १०, सुनसरीइ ९, काभ्रे व कैलालीइ ८÷८ म्हेसित संक्रमण पुष्टि जुगु दु।

नेपालभाषा परिषदया अध्यक्ष नाप नांजाःम्ह साहित्यकार बौद्ध विद्धान प्रा. सुवर्ण शाक्य यलया स्टार हस्पिटलय् भर्ना जुयादीगु दु।

प्रा. शाक्य ब्रेन ह्यूमरेज जुया वासःया लागि स्टार अस्पताल यंकूगु निष्ठानन्द स्मृति गुथिया छयाञ्जे पवित्र बज्राचार्य धयादिगु दु।

आः वयकःयात आइसीयुलय् तया वासः जुयाच्वंगु दु।