वंगु २४ घण्टाय् देयन्यक थप २१९ म्ह कोरोना भाइरस संक्रमण पुष्टि जूगु दु।

७ हजार १ सय ८० म्हेसिगु पीसीआर परीक्षण याउगुलि २१३ म्ह व २ हजार ४ सय ९७ म्हेसिगु एन्टिजेन परीक्षण याउगुलि खुम्ह याना २१९ म्हेसित कोरोना भाइरसया संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।

वंगु २४ घण्टाया दुने कोरोना संक्रमणं निम्ह सीउगु दु सा २८३ म्ह कोरोनामुक्त जुगु दु।

न्हापागु राष्ट्रिय ज्येष्ठ नागरिक दिवसया लसताय् थीथी ख्यलय् योगदान बिउपि व्यक्तित्वपिन्त अभिनन्दन यायेत थौं आइतबाः छगु ज्याझ्वः जुगु खः।

न्हापागु राष्ट्रिय ज्येष्ठ नागरिक दिवसया लसताय् समाजकल्याण परिषद्, राष्ट्रिय ज्येष्ठ नागरिक कोषं थौं शीतल निवासय् ग्वसाः ग्वंगु उगु समारोहय् राष्ट्रपति विद्यादेवी भण्डारीं वाङ्मय शताब्दी पुरुष सत्यमोहन जोशीनाप थीथी व्यक्तित्वपिन्त अभिनन्दन याउगु खः।

थौं अभिनन्दितजूपि वरिष्ठ पत्रकार भैरव रिसाल, कृष्णा ताम्राकार, अर्थविद् हिमालय शमशेर राणा, शिक्षासेवी नानीमैया श्रेष्ठ, साहित्यकार भद्रकुमारी घले, कलाकार कालु कुमाले व वीरगञ्ज महानगरपालिकाया उपप्रमुख शान्ति कार्कीपि खः।

अथेहे थीथी क्षेत्रपाखे ज्येष्ठ नागरिकया लागि सेवा बिउपि कलाकार मदनदास श्रेष्ठ, पूर्वसचिव कृष्णहरि बाँस्कोटा, पूर्वराष्ट्रसेवक मोहनबहादुर केसी, सामाजिक कार्यकर्ता प्रकाश गौतम, खेमराज उपाध्याय, बालकृष्ण थापामगर व जोगबहादुर महर्जनपिन्त सम्मान याउगु खः।

नेकपा माओवादी केन्द्रया नेता नारायणकाजी श्रेष्ठ प्रकाशं पार्टीया महाधिवेशन औपचारिकता पूरा यायेगु कर्मकाण्ड जक मखु धका धाउगु दु।

आइतबाः शुरु जुगु च्याक्वःगु राष्ट्रिय महाधिवेशनया उलेज्या ज्याझ्वलय् सम्बोधन यासे श्रेष्ठं धाउगु दु, थ्व न्हुगु विचार बहस, रुपान्तरित क्रान्तिकारी पार्टी निर्माणया महत्वपूर्ण अंगया रुपमा सम्पन्न यायेगु जुइ।’ वयकलं वाम लोकतान्त्रिक गठबन्धनया सहकार्य कम्तीइ न वइगु निर्वाचन तक यायेमा धका धाउगु दु।

नेकपा माओवादी केन्द्रया नेता मात्रिका यादवं पार्टीया नेतृत्व त्वत्ये धका धया सुख दइमखु अध्यक्ष पुष्पकमल दाहाल प्रचण्डयात धाउगु दु।

थौं आइतबाः पार्टीय च्याक्वःगु महाधिवेशनको उलेज्या ज्याझ्वलय् यादबं प्रचण्डं क्रान्तियात दथुइ त्वता वने मिले मजुगु धका टिप्पणी याउगु दु। ‘अध्यक्षजुं पत्रकारपिन्स न्यनकि, वयकलं धयादी जि त्वते मास्तिवः, आत्मकथा च्वय् मन दु’ वयकलं धयादी।

क्रान्तियात दथुइ लँ त्वता सू नेता वंगु दु ला? अवसरवादीपि जक वनिइ।’ ल्याम्हपि नेतृत्वय् वयेमाः धाइपि पुँजीवादी शैली खः धका यादवं धाउगु दु।

राष्ट्रियसभा सदस्यया लागि माघ १२ गते जुइगु निर्वाचनय् १२ राजनीतिक दलं भाग काइगु जुगु दु। राष्ट्रियसभा सदस्य निर्वाचनया प्रयोजन लागि १२ राजनीतिक दल दर्ता जुगु दु धका निर्वाचन आयोगया प्रवक्ता शालीग्राम शर्मा न जानकारी बिउगु दु।

आयोगं बिउगु जानकारी कथं, नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी, राष्ट्रिय जनमोर्चा, नेपाल लोकतान्त्रिक पार्टी, जनता समाजवादी पार्टी, राष्ट्रिय प्रजातन्त्र पार्टी व नेपाल परिवार दलं दक्को प्रदेशय् भाग काइगु कथं दल दर्ता याउगु दु।

उगु निर्वाचनया लागि पुस २० गते उम्मेदवारपिन्स मनोनयन दर्ता जुइसा पुस २५ गते उम्मेदवारपिन्त निर्वाचन चिं लल्हाइ।