सत्तारुढ गठबन्धनया समन्वय समितिं सर्वोच्च अदालतय् छु दिं न्ह्यःनिसे खनेदुगु समस्या व गतिरोधयात तत्काल निकास बिइमाः धका धाउगु दु।

मंगलबाः च्वंगु समन्वय समितिं न्यायपालिकाया स्वतन्त्रता, गरिमा, विश्वसनीयता व स्वच्छतायात कायम यायेत याकन हे निकास बिइमाः धका धाउगु दु।

उमिसं सम्बन्धित दक्को थासं याकन हे निकास बिइगु विषय कुतः जुइगु भलसा काउगु दु।

मंगलबाः प्रदेश २ या उद्योग, पर्यटन, वन तथा वातावरण मन्त्रीयात बर्खास्त जुम्ह रामनरेश राय यादवं थम्हेसिया मुख्यमन्त्री लालबाबु राउतया राजीनामा फ्वनागु कारण थःत हटे याउगु धका धाउगु दु।

म्ह्याय् ब्बके, म्ह्याय् बचे यायेगु अभियान अन्तर्गत कक्षा ८ या छात्रायात वितरण याउगु साइकल खरिद जुगुलि अनियमितता जुगु धका अख्तियार दुरुपयोग अनुसन्धान आयोगं मुख्यमन्त्री कार्यालय छापा मारे जुइ धुका थःम्हेसिया मुख्यमन्त्री राउतयात राजीनामा बिइत धयागु धका यादवं धाउगु दु।

‘मुख्यमन्त्रीयात भ्रष्टाचारया द्धपः फयाच्वम्हगुलि राजिनामा बिया लँ चिलेमाः धका धयागु खः। न्हुगु ख्वापा दुम्हेसित मुख्यमन्त्री दयका जनताया दथुइ वनेमाः धयागु खः’ वयकलं धयादीगु दु, ‘सुयाउगु छविइ दाग दु वयाउगु छवि ज्वना गये यान निर्वाचनय् वनेगु? धका थम्हेसिया धया वयाच्वनागु खः।’

वंगु २४ घण्टाया दुने देयन्यक थप ३७७ म्हेसित कोरोना भाइरस संक्रमण पुष्टि जुगु दु।

६ हजार ५ सय ५ म्हेसिगु पीसीआर परीक्षण याउगुलि ३३९ म्ह व २ हजार ६ सय ४४ म्हेसिगु एन्टिजेन परीक्षण याउगुलि ३८ म्ह याना ३७७ म्हेसित कोरोना भाइरस संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।

अथेहे वंगु २४ घण्टा कोरोना संक्रमणं प्यम्ह सीउगु दु सा १७० म्ह कोरोनामुक्त जुगु दु।

सेयर बजाःया परिसूचक नेप्से झण्डै ७० अंकं थहावंगु दु।

लगातार निन्हुयक दोहोरो अंकं थहावना नेप्से थौं मंगलबाः ६९.२२ अंक थहावना २७८४.५८ बिन्दुइ थ्यंगु दु।

कारोबार जुगु खुगु कम्पनीया शेयर भाः सकारात्मक सर्किटय् वना न्ह्यगू कम्पनीया शेयर भाः ९ प्रतिशत स्वया अप्वो थहावंगु दु। थौं दोस्रोे बजारय् दुगु २२७ गु कम्पनीया १ करोड ९३ हजार २२१ कित्ता शेयर खरिद बिक्री जुगुलि कारोबार रकम ५ अर्ब ५२ करोड १६ लाख रुपैयाँ थ्यंगु दु।

उकि मध्ये १७१ गु कम्पनीया शेयर भाः थहावना १५ गु कम्पनीया जक शेयर भाः कुहावंगु दु। छगु जक कम्पनीया शेयर भाः ह्यूपाः वंगु मदु। महालक्ष्मी विकास बैंक, नेशनल हाइड्रोपावर कम्पनी व अपि पावर कम्पनीया शेयर लगानीकर्तापिन्त आकर्षण खंगु दु।

महालक्ष्मीया ३७ करोड २६ लाख, नेशनलया ३० करोड ४२ लाख व अपिको २३ करोड ३६ लाख रुपैयाँ स्वया अप्वो शेयर दोस्रो बजारय् खरिद बिक्री जूगु दु।