नेपालभाषाय् दकलय् न्हापां विद्यावारिधि (पी.एचडी) यानादीम्ह डा. जनकलाल वैद्य मन्त । डा. वैद्य म्हीगः शनिवाः ८८ दँया बैशय् यलया महालक्ष्मीस्थानय् दुगु गणेशमान मेमोरियल अस्पतालय् मदुगु खः।

पार्किन्सन ल्वचं कयाच्वनादीम्ह वय्कयः खुन्हू न्ह्यः अस्पतालय् भर्ना जुयादिगु खः। वयकलं नेपालभाषाया प्राचीन काव्य प्रवृत्ति विषयय् विद्यावारिधि यानादीगु खः। अथे हे वय्कलं ख्वपया न्यातपौ देगः निर्माण जूबलनिसेया दक्को दस्तावेज संकलन यानाः मेगु ऐतिहासिक सफू नं तयार यानादीगु खः सा वय्कःया सम्पादनय् नेपालभाषाया दँपौ ‘खेलुइताः’ नं पिहां वःगु खः।

नेपालभाषा ख्यलय् अनुसन्धान याःपिं आपाःसित हे गाइड जुयाः ग्वाहालि यानादीम्ह वय्कःया निधनं नेपालभाषाया अध्ययन अनुसन्धान ख्यलय् तःधंगु ह्याकिं वंगु महसुस याःगु दु ।वय्कः नेपालभाषा एकेडमीया दुजः नाप नेपालभाषा परिषदया सल्लाहकार जुयादिइ।

नेपालय् १५दँ न्ह्यः थौंया हे दिं तत्कालीन सरकार व माओवादीं विस्तृत शान्ति सम्झौता मार्फत छगू दशक ताहाकःगु माओवादी युद्ध अन्त्यया घोषणा याःगु खः ।

विसं २०६३ मंसिर ५ गते तत्कालीन प्रधानमन्त्री गिरिजाप्रसाद कोइराला व माओवादी नायः पुष्पकमल दाहाल (प्रचण्डं)  ल्हाचिं तःगु शान्ति सम्झौताया मू कार्यभार खः– संविधान सभापाखें न्हूगु संविधान निर्माण, माओवादी लडाकुया व्यवस्थापन, संक्रमणकालीन न्याय व आर्थिक–सामाजिक रुपान्तरण ।

शान्ति सम्झौतां निर्धारणा याःगु आज्जु मध्ये ६ दँ न्ह्यः संविधान सभामार्फत संविधान निर्माण जुइधुंकुगु दु । अथेहे ९ दँ न्ह्यः हे माओवादी लडाकुया समायोजन व व्यवस्थापनया ज्या नं क्वचायेधुंकुगु दु । तर संक्रमणकालिन न्याय संपादनया ज्या धाःसा अझं लिच्वःस थ्यने फूगु मदुनि ।

१० दँया ल्वापुया झ्वलय् तत्कालीन राज्य पक्ष व माओवादीपाखें जूगु मानव अधिकार उल्लंघनया छानविन याना सत्य तथ्य लुइकेगु व दोषीयात कार्वाही यायेगु ज्याय् छुं नं प्रगति जुइ फूगु मदुनि । आः नं द्वलंद्वःम्ह द्वन्द्व पीडित सत्य व न्याययात पियाच्वंगु दु  ।

बाँकेया नेपालगञ्जस्थित भेरी अस्पतालय् वासः यानाच्वंपि निम्ह कोरोना संक्रमितपि मन्त। सीपि दाङया छम्ह मिसा व छम्ह मिजंम्ह खः।

मंसिर २५ गते अस्पताल भर्ना जूम्ह गढवा गाउँपालिका–७, दाङया ४९ दँ दुम्ह मिसा थौं सुथय् ३ बजे मदुगु धका बाँकेया कोरोना फोकल पर्सन तेज वलीं जानकारी बिउगु दु।

अथेहे मंसिर ३० गते अस्पताल भर्ना जूम्ह बाँकेया बैजनाथ गाउँपालिका–५ च्वम्ह ६८ दँ दुम्ह मिजंम्ह ११ बजे मदुगु धका वलीं धाउगु दु। बाँकेय् आःतक कोरोना संक्रमणं सीपि ३४१ थ्यंगु दु स्वास्थ्य कार्यालय बाँके धाउगु दु।

यलया प्रहरी प्रमुख सरुवा जूगु दु। यलया प्रहरी प्रमुख एसएसपी किरण बज्राचार्य सरुवा जूगु दु धका प्रहरी प्रवक्ता बसन्तबहादुर कुँवरं पुष्टि याउगु दु।

यलया प्रहरी प्रमुख बज्राचार्ययात प्रहरी मुख्यालय नक्शालय् यकूगु दु। अथेहे एसएसपी यज्ञविनोद पोखरेलयात यलया प्रहरी प्रमुखया जिम्मेवारी बिउगु दु।

पोखरेल प्रहरी प्रधान कार्यालय नक्शालं यलय् वंगु खः।

कोभिडविरुद्धया फाइजर खोप थौं १२ निसे १७ दँ दुपिन्त बिइगु जुगु दु।

म्हिगः थुगु खोप १२ दँ स्वया च्वय्यापिन्त दीर्घ रोगीपिन्त जक बिया वयाच्वंगु खः। स्वास्थ्य सेवा विभाग खोप शाखा प्रमुख सागर दाहालया कथं थौं १२ निसे १७ दँ दुपि निरोगी मस्तय्त व दीर्घ रोगी जुपि १२ दँ स्वया च्वय्यापिन्त दक्को समूहया लागि थुगु खोप बिइगु व्यवस्था मिले याउगु दु।

कोभ्याक्स सुविधा अन्तर्गत नेपालय् वंगु १ लाख ६२० डोज खोप स्वनिगः दुने च्याउगु व पिने १६ गु २४ गु अस्पतालय् केन्द्र तोके याउगुलि वंगु २८ कात्तिकनिसे बिउगु सुरु याउगु खः। थुगु खोपया दोस्रो मात्रा प्यंगु वाःलिपा २७ मंसिरनिसे २ पुस तक बिउगु खः।