वंगु झीन्हुनिसे येँया टेकुइ च्वंगु शुक्रराज ट्रपिकल तथा सरुवा रोग अस्पतालया आईसीयूलय निम्ह जक कोरोना संक्रमित बिरामी उपचार याना च्वंगुलि आः च्याम्ह थ्यंगु दु।

छवाःनिसे गम्भीर जूपि बिरामीपि अप्वोया वंगु दु। उकि मध्ये ३५ प्रतिशत स्वया अप्वोे खोप मकापि धका अन उपचार यानाच्वंपि डाक्टरं धाउगु दु।

अस्पताल प्रशासनया तथ्यांक कथं आइसोलेसनय् ११ म्ह संक्रमितपि उपचार यानाच्वंगु दु।

प्रदेश २ या नां मधेस तयेगु निति सत्तारुढ जनता समाजवादी पार्टी (जसपा), नेकपा माओवादी केन्द्र व लोकतान्त्रिक समाजवादी पार्टी (लोसपा) न प्रस्ताव याउगु दु।

बिहीबाः प्रदेशसभा बैठकय् जसपाया नेता शैलेन्द्रकुमार यादव, नेकपा माओवादी केन्द्रया सांसद भरत साहं मधेस नां प्रस्ताव याउगु खः। विपक्षी दल लोसपाया सांसद रानी कुमारी तिवारी न मधेस नामय् समर्थन याउगु दु।

१०४ म्ह सदस्यीय दुगु प्रदेशसभाय् जनता समाजवादी पार्टीया ३९, लोकतान्त्रिक समाजवादी पार्टीया १६ व माओवादी केन्द्रया ८ म्ह सांसदपि दु। प्रदेशसभापाखे नां पारित यायेत प्रदेशसभाय् निगु तिहाइ अर्थात ६९ म्ह सांसदपिनिगु समर्थन आवश्यक जुइ।

जसपा, लोसपा व माओवादी केन्द्रया समर्थन जक प्रदेशसभाय् मधेस नां पारित जुइ सम्भावना धासा मदु।

नेपाली कांग्रेसया सांसद शिवचन्द्र चौधरी मधेस स्वया त्रेतायुगनिसे वंगु संस्कृति व इतिहासयात जगेर्ना जुइगु कथं प्रदेशया नां मिथिला भोजपुरा तयमाः धका धाउगु दु।

शेयर कारोबार लिपगु दिं थौं बिहीबाः शेयर कारोबार मापक नेप्से परिसूचक दोहोरो अंकं थहावंगु दु ।

चालु आर्थिक वर्षया मौद्रिक नीतिया न्हापागु प्रथम त्रैमासिक समीक्षा लिपा लगातार कुहा वनाच्वंगुलि शेयर बजारय् राष्ट्र बैंकं आयातय् याउगु कडाइ लिपा लगातार थहावना च्वंगु दु। मंगलबाः व बुधबाः थहावंगु नेप्से परिसूचक बिहीबाः १२ दशमलव ५३ अंकं थहावना २ हजार ५ सय २० दशमलव २३ अंकय् थ्यंगु दु। कारोबार ल्याः व रकम न बिहीबाः बालागु खनेदु।

न्हिच्छियक जूगु कारोबापाखे ८३ लाख २३ हजार ९ सय २३ कित्ता शेयर किनबेच जुगुलि शेयर कारोबार रकम ४ अर्ब ४९ करोड २ लाख ६६ हजार ४ सय १० रुपैयाँ थ्यंगु दु। ‘क’ वर्गया कम्पनीपिनिगु कारोबार मापन याइगु सेन्सेटिभ इन्डेक्स धासा बिहीबाः स्थिर खनेदुगु दु।

हाइड्रोपावर, विकास बैंक व फाइनान्स कम्पनीपिनिगु यक्को थे शेयर भाः घटे जुगु दु। उखे बैंकिङ, व्यापार, होटल व पर्यटन, लघुवित्त, जीवन व निर्जीवन बिमा कम्पनीपिनिगु धासा शेयर भाः थहावंगु दु।

शिखर इन्स्यारेन्सया शेयर भाः ९ दशमलव ९७ प्रतिशतं थहावना १ हजार ६ सय ८८ रुपैयाँ थ्यंगु दु। अथेहे बरुण हाइड्रोपावर व जीवन विकास लघुवित्त न थहावंगु दु।

अथेतु घटे जुगुलि गोर्खाज फाइनान्स, सामलिङ पावर कम्पनी, सिन्धु विकास बैंक व हिमालयन उर्जा विकास कम्पनीपिनिगु शेयर भाः कुहावंगु दु।

वंगु २४ घण्टाया दुने देयन्यक थप २९३ म्हेसित कोरोना संक्रमण पुष्टि जूगु दु।

९ हजार ५१० म्हेसिगु पीसीआर परीक्षण याउगुलि २४१ म्ह व २ हजार १ सय १६ म्हेसिगु एन्टीजेन परीक्षण याउगुलि ५२ म्ह याना २९३ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयलं धाउगु दु।

अथेहे २४ घण्टाय् निम्ह सीउगु दु सा २६३ म्ह संक्रमणमुक्त जूगु दु।

लुँया भाः थौं हाकन तोलां न्ह्यसः थहावंगु दु।

थौ लुँ तोलां न्ह्यसः थहावना ९३ हजार ३ सय रुपैयाँ थ्यंगु दु धका नेपाल सुनचाँदी व्यवसायी महासङ्घं धाउगु दु।

अथेहे वहः न तोलां झीन्यातक थहावंगु दु।

थौं वहः झी न्यातका थहावना १२ सय ६० रुपैयाँ न कारोबार जुयाच्वंगु धका महासङ्घं धाउगु दु।