कोभिडविरुद्धया फाइजर खोप थौं १२ निसे १७ दँ दुपिन्त बिइगु जुगु दु।

म्हिगः थुगु खोप १२ दँ स्वया च्वय्यापिन्त दीर्घ रोगीपिन्त जक बिया वयाच्वंगु खः। स्वास्थ्य सेवा विभाग खोप शाखा प्रमुख सागर दाहालया कथं थौं १२ निसे १७ दँ दुपि निरोगी मस्तय्त व दीर्घ रोगी जुपि १२ दँ स्वया च्वय्यापिन्त दक्को समूहया लागि थुगु खोप बिइगु व्यवस्था मिले याउगु दु।

कोभ्याक्स सुविधा अन्तर्गत नेपालय् वंगु १ लाख ६२० डोज खोप स्वनिगः दुने च्याउगु व पिने १६ गु २४ गु अस्पतालय् केन्द्र तोके याउगुलि वंगु २८ कात्तिकनिसे बिउगु सुरु याउगु खः। थुगु खोपया दोस्रो मात्रा प्यंगु वाःलिपा २७ मंसिरनिसे २ पुस तक बिउगु खः।

येँया सुन्धाराय् धरहरा ल्यूने मस्जिद धकाः दावी यानावःगु जग्गा थुवाःत संचारमाध्यममार्फत न्ह्यःने वःगु दु ।

सुन्धारा धरहरा ल्यूने दक्षिणपाखे लाःगु व जग्गाया थुवाः रत्नकाजी महर्जन व जुजुकाजी महर्जनं जग्गा सम्वन्धि भ्वं, विभिन्न मितिइ जूगु येँ महानगरपालिकानिसें सर्वोच्च अदालतया फैसला आदिलिसें संचारमाध्यमय् न्ह्यःने वयाः थःपिनिगु मर्का न्यंकूगु दु ।

जग्गा थुवाः महर्जन दाजुकिजां बुधबाः येँय् पत्रकार सम्मेलन यासें देय्या न्यायालयं उगु जग्गा थःपिनिगु हे खःगु फैसला न्यंकाब्यूगु खुदँ बीधुंकलं नं थःपिन्सं आःतक्क भोगचलन यायेमखंगु धाल ।

पत्रकार सम्मेलनय् नवासें जग्गा थुवाः रत्नकाजी महर्जनं २०७२ असार ७ गते सर्वोच्च अदालतया वृहत इजलाशं तकं व जग्गा थःपिनिगु हे खःगु फैसला यायेधुंकूगु व पटक पटक फैसला कार्यान्वयन यायेत निर्देशन बीधुंकलं तकं महानगरपालिकां सर्वोच्चया फैसला कार्यान्वयनय् च्यूताः मक्यंगु द्वपं बियादिल ।

‘सर्वोच्च अदालतया वृहत इजलासं हे व जग्गाया स्वामित्व जिमिके दुगु फैसला यायेधुंकूगु दु व सर्वोच्च अदालत फैसला कार्यान्वयन समितिं न्याक्वःतक्क ला फैसला कार्यान्वयन यायेत निर्देशन बीधुंकल तर, येँ महानगरपालिकां धाःसा अवैध रुपं दयेकातःगु व टहरा थुनेत थौंतक्क च्यूताः मक्यंनि, थन सर्वोच्च अदातलया हे अपमान जूगु दु’ महर्जनं धयादिल ।

थ्वयां न्ह्यः पटक पटक यानाः येँ महानगरपालिका, पुनरावेदन अदालत यल व सर्वोच्च अदालतं तकं व जग्गा थःपिनिगु हे खःगु व अवैध रुपं दयेकातःगु टहरा थुनेत आदेश बीधुंकूगु दावी महर्जनया दु ।

‘२०५९ माघ १३ गते येँ महानगरपालिकां थम्हं हे नं व जग्गाय् दुगु टहरा थुनाबीगु फैसला यायेधुंकल, अझ २०६२ पुष २८ गतेकुन्हु न्हापाया फैसला बदर मजुइगु फैसला नं यायेधुंकल । थःगु हे फैसला कार्यान्वयन यायेत नं महानगरपालिकायात छाय् थाकूगु खः, थुइके मफुत’ महर्जनं अजू क्यनादिल ।

फैसला कार्यान्वयन मजूबलय् थःपिन्सं सर्वोच्च अदालत फैसला कार्यान्वयन समितिइ निवेदन बियागु व समितिं फैसला कार्यान्वयन यायेत २०७५ असोज १० निसें २०७७ कार्तिक २१ गतेतक्क यानाः न्याक्वः निर्देशन बीधुंकलं नं फैसलाया कार्यान्वयन मजूगु महर्जनया धापू खः ।

पत्रकार सम्मेलनमार्फत जग्गा थुवाः महर्जनद्वयं येँ महानगरपालिका प्रमुख विद्यासुन्दर शाक्य, कामपाया प्रमुख प्रशासकिय अधिकृत राजेश्वर ज्ञवालीयात सर्वोच्च अदालतया फैसला अविलम्ब कार्यान्वयन यायेत माग याःगु दु ।

नरेन्द्र बिक्रम राणाया नामय् जग्गा धनि पुर्जा दुगु उगु जग्गा सावित्री तिमिल्सिना व भेषराज न्यौपाने जुयाः २०६१ सालय् रत्नकाजी महर्जन व जुजुकाजी महर्जन दाजुकिजां न्यानाकाःगु खनेदु । व जग्गाया नियमित रुपं भूमिकर महर्जन दाजुकिजां हे पुलावःगु खनेदु ।

पटक पटक विवादित जुयावःगु उगु जग्गा मस्जिदया रुपं दुगु छुं हे कानुनी प्रमाण मदुगु व गुगुं इलय् मुसाफिर खाना जक खःगु जग्गाधनी महर्जनद्वयया दावी खः ।

नेकपा माओवादी केन्द्रया अध्यक्ष नाप पूर्वप्रधानमन्त्री पुष्पकमल दाहाल ‘प्रचण्ड’ व नेपाल भ्रमणय् वंपि अमेरिकी सहायक विदेशमन्त्री डोनाल्ड लू दथुइ शिष्टाचार भेटघाट जुगु दु।

सिंहदरवारय् थौं शुक्रबाः जुगु उगु शिष्टाचार भेटघाटय् अमेरिकी सहायक विदेशमन्त्री लू न अध्यक्ष प्रचण्डयात अमेरिकी अनुदानसम्बन्धी सम्झौता (एमसीसी) बारे याकन निर्णयय् यायेत इनाप याउगु दु धका प्रचण्डया स्वकीय सचिव रमेश मल्लं जानकारी बिउगु दु।

उकिया लिसः बिइगु झ्वलय् प्रचण्डं अमेरिकी सहयोग काये मखु धइगु थःपिनिगु धारणा मदु एमसीसीइ उल्लेखित जुगु छु न प्रावधान नेपालय् विवादया विषय जुगु धका धयादीगु खः। प्रचण्डं एमसीसीबारे दक्को पक्षया छगु हे साझा समझदारी दयकेगु कुतः जुयाच्वगु दु धका धाउगु दु।

अमेरिकी पक्षं अनुदान सहयोग कायेगु वा मकायेगु बारेय् नेपालं याकन हे निर्णय यायेमाःगुलि बःबि दु। उकिया लिसलय् प्रचण्डं थुकिया राष्ट्रिय सहमति दयका निर्णय यायगु धका लिसः बिउगु दु धका मल्लं जानकारी बिउगु दु।

वंगु २४ घण्टाया दुने देयन्यक थप २९६ म्हेसित कोरोना भाइरस (कोभिड–१९) संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं पीसीआर व एन्टिजेन ८,९७२ म्हेसिगु नमुना परीक्षण याउगुलि  म्हेसित २९६ संक्रमण पुष्टि जुगु खः।

अथेहे २४ घण्टाय् ३६९ म्ह संक्रमणमुक्त जूगु दु सा कोरोना संक्रमणं न्याम्ह सीउगु दु।

पुर्व प्रधानमन्त्री नाप नेकपा एमालेया अध्यक्ष केपि शर्मा ओली थौं येँ काष्ठमण्डपय् अवलोकन भ्रमण यानादीगु दु।

पुर्व प्रधानमन्त्री ओलीयात आःतक याउगु ज्याया प्रगती बागमती प्रदेशया सांसद नाप काष्ठमण्डप पुननिर्माण कमितया अध्यक्ष राजेश शाक्यं जानकारी बियादीगु खः।

काष्ठमण्डपय् अवलोकन भ्रमणय् थःगु खँ तयेगु झ्वलय् पुर्व प्रधानमन्त्री ओलीं नेपाःया दकलय् पुलांगु सम्पदा स्थानीय ग्वाहालि थुलि बालाक्क निर्माण जुगुलि प्रशंसा यानादीगु खः।