प्रधानन्यायाधीश चोलेन्द्र शम्सेर जबराविरुद्ध आन्दोलन यानाच्वपि कानून व्यवसायीपिन्त प्रहरीं बल प्रयोग याउगु दु।

प्रहरीं सर्वोच्च बारया सचिव ऋषिराम घिमिरे, बरिष्ठ अधिवक्ता सविता भण्डारीपिन्त प्रहरीं हातपात याउगु दु।

येँया कागेश्वरी मनहराय् लः बोरिङ यायेत म्हुइगु झ्वलय जमिनं ग्यास पिहावंगु दु।

बुधबाः कागेश्वरी मनहरा ९ या सुन्दरचोकया तरकारी बजाः नाप बोरिङ यायेत म्हुइगु झ्वलय अनं ग्यास पिहावंगु खः। स्थानीय छेँ दयकेत लःया ब्यबस्था यायेत बोरिङ यायेत गाः म्हुइत स्वंगु इलय् ग्यास पिहावंगु खः।

बुधबाः न्हिनसिया १२ बजेति उगु ग्यास पिहावंगु धका स्थानीयपिन्स धाउगु दु। सुरुया ४ घण्टाय् यक्को पिहावंगु खःसा सुक्खा ग्यास जक पिहावया बहनि ४ बजेनिसे ध्याचं न पिहावंगु खः।

ग्यासनाप पिहावंगु ध्याचं पिहावया जःखः छेँ च्वपि न ग्वाउगु दु। बोरिङ यायेत म्हुगु इलय् ग्यास पिहावया न्हिनय् जःखः करीब १ किलोमिटर क्षेत्रय् धुँ न ब्बःगु खःसा बहनि ध्याचं नाप ल्ह्वः न पिहावंगु खः।

स्वनिगलय् थौं दकलय् ख्वाउगु महसुस याउगु दु।जल तथा मौसम विज्ञान विभागया कथं थौं बुधबाः येँ न्यूनतम तापक्रम थुगु दँया दकलय कम ७ दशमलव ४ डिग्री सेल्सियस मापन जुगु दु। मङ्गलबाः येँे न्यूनतम तापक्रम ८.० डिग्री सेल्सियस जुगु खः।

स्वनिगः नाप देयन्यक १ निसे २ डिग्री सेल्सियस तक तापक्रम घटे जुगु दु धका मौसम पूर्वानुमान महाशाखां धाउगु दु।

महाशाखाया कथं नेपाली वायुमण्डलय् पश्चिमी वायुया प्रभावनाप चिकूगु सुरु जुगु दु। अथेहे थौं दकलय कम जुम्लाय् न्यूनतम तापक्रम माइनस ४ दशमलव ५ डिग्री व दकलय् अप्वो जनकपुरय् अधिकतम तापक्रम २९ दशमलव २ डिग्री सेल्सियस जुगु दु।

शेयर बजाःया परिसूचक नेप्से थौं बुधवाः न थहावंगु दु। नेप्से थौं १६ दशमलव ९५ अङ्क थहावना २ हजार ८०१ दशमलव ५२ विन्दुइ थ्यंगु दु।

बैंक, व्यापार, होटल, जलविद्युत्, फाइनान्स, माइक्रोफाइनान्स व मेमेगु समूहया शेयर न थहावंगु दु। विकास बैंक, बीमा, उत्पादन, लगानी व म्युचल फन्ड समूहया शेयर धासा कुहावंगु दु। २ सय २४ कम्पनीया १ करोड १९ लाख कित्ता शेयर ७ अर्ब ३७ करोड रुपैयाँया कारोबार जुगु दु।

दकलय् अप्वो नेपाल टेलिकमया ५८ करोड ६८ लाख रुपैयाँया शेयर किनबेच जुगु दु। थौं पञ्चकन्यामाई हाइड्रो, अपर तामाकोशी जलविद्युत्, मानुषी लघुवित्त व तेह्रथुम पावर कम्पनीया शेयर १० प्रतिशतं थहावंगु दु।

समग्र बजाः थहावंसा बोटलर्स नेपाल व महालक्ष्मी विकास बैंकया शेयर झन्डै साढे ७ प्रतिशतं घटे जुगु दु।

सरकारं लल्हाइगु विभूषण, तक्मा व अलंकार वापत प्रहरी कर्मचारीपिन्त वइगु अंक खारेज जुइगु दु।

कार्यसम्पादन मूल्यांकनय् अंक जोडे याइगुलि विभूषण कायेत अस्वस्थ प्रतिष्पर्धा अप्वोगु निष्कर्ष नाप प्रहरी प्रधान कार्यालय, नक्सालं विभूषण वापतया अंक खारेज यायेगु प्रस्ताव गृह मन्त्रालयय् यकूगु दु। गृहं उगु कथं वइगु २ अंक हटे यायेगु प्रहरी नियमवाली संशोधनया प्रस्ताव मन्त्रिपरिषदय् यकूगु दु। मन्त्रिपरिषदया क्वयाउगु दर्जाया प्रहरी कर्मचारीपिनिगु मनोबल थकायेत निगु दर्जा थपे यायेगुे प्रस्ताव न निर्णायार्थ पेश जुइत्यंगु दु।

महानिरीक्षक शैलेश थापा क्षेत्रीं प्रहरीया क्वयाउगु दर्जाया कर्मचारीपिनिगु मनोबल व समस्याबारे अध्ययन न याउगु दु। उगु कथं हे निर्णय जुइत्यंगु दु। गृहं वंगु निर्णय अर्थ मन्त्रालय व लोक सेवा आयोग न स्वीकृति बिइ धुकुगु दु।

थुगु प्रस्ताव मन्त्रिपरिषद् पाखे स्वीकृत जुलकि प्रहरीइप्रहरी नायब निरीक्षक (सई) व प्रहरी निरीक्षकया दथुइ वरिष्ठ सई नाप जवान व प्रहरी सहायक निरीक्षक (असई) या दथुइ सहायक हवल्दार व वरिष्ठ हवल्दार पद थपे यायेगु प्रस्ताव याउगु दु।