विवेकशील साझा पार्टीया सचिवालय सदस्य महेश भण्डारीनाप गण्डकी प्रदेशया १३ म्हेसिया पार्टीपाखे राजीनामा बिउगु दु।

पार्टीया गण्डकी प्रदेश संयोजकतक जुयादीम्ह भण्डारीं १७ साउनय् राजीनामा बिउगु खःसा थप १२ म्हेसिया मंकाः राजीनामा बिउगु दु।

राजीनामा बिउपि पार्टीया केन्द्रीय अभियान विभाग सदस्य तक जुयादीम्ह केन्द्रीय सदस्य दीपक पौडेल, पार्टी व युवा संगठनया केन्द्रीय सदस्य प्रकाश आचार्य, गण्डकी प्रदेश सदस्य नाप अभियान विभाग प्रमुख अशोक खड्का, गण्डकीया प्रदेश सदस्य नाप कार्यालय व्यवस्थापन प्रमुख सुदीप ओझा, पदम न्यौपाने व तनहुँ जिल्ला संयोजक नाप गण्डकी प्रदेश सदस्य सागर घिमिरेपि खः।

अथेहे युवा संगठनया केन्द्रीय सदस्य मनिषा मगर, व्यास नगर संयोजक नाप प्रदेश सदस्य सलमान अलि, युवा संगठनया केन्द्रीय सदस्य महेन्द्र आचार्य, स्याङ्जा जिल्ला संयोजक भीमनारायण कोइराला, बाग्लुङ जिल्ला संयोजक सुरज श्रेष्ठ व म्याग्दी जिल्ला संयोजक विश्वराज अछामेपिन्स न राजीनामा बिउगु दु।

आइतबाः छगु विज्ञप्ति जारी यासे उमिस अध्यक्ष रवीन्द्र मिश्रया प्रस्तावय् असहमति प्वकूगु खः।

वंगु २४ घण्टाया दुने देयन्यक ३०६ म्हेसित कोरोना भाइरस संक्रमण पुष्टि जुगु दु।

८ हजार ८ म्हेसिगु पीसीआर परीक्षण याउगुलि २९१ म्ह व १ हजार ५ सय ९८ म्हेसिगु एन्टिजेन परीक्षण याउगुलि १५ म्ह याना मुक्क ३०६ म्हेसित कोरोना भाइरसया संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।

अथेहे वंगु २४ घण्टाय् कोरोना संक्रमणं खुम्ह सीउगु दु सा ३४८ म्ह कोरोनामुक्त जुगु दु।

सरकारं मंसीर १ निसें विद्युतीय राहदानीया परीक्षण न्ह्याकीगु जूगु दु ।

अंग्रेजी न्हूदँ २०२२ निसें नेपालय् औपचारिक रूपं प्रचलनय् हयेत्यंगुलिं उकिया हे तयारी कथं परीक्षण वितरण न्ह्याकागु राहदानी विभागं न्ह्यथंगु दु । मङ्सिर १ निसें छुं वाः विभागपाखें हे विद्युतीय राहदानी इनेगु योजना दुगु विभागया निर्देशक अले प्रवक्ता शरदराज अरनं धयादिल  ।

व धुंकाः औपचारिक वितरण न्ह्याइगुलिसें प्रदेश अले जिल्ला स्तरय् विद्युतीय राहदानी वितरण याइ । उकिया लागिं थुगु इलय् विभाग अन्तिम तयारीइ जाःगु दु । विद्युतीय राहदानी इनेत प्राविधिक अले प्रशासनिक दक्वं तयारी लिपांगु चरणय् थ्यंगु धाःगु दु ।

विभागया कथं न्हापांगु चरणय् २० लख पाः विद्युतीय राहदानी छापे याइ । सरकारं पासपोर्टया डिजाइन स्वीकृति कायेधुंकाः न्हापांगु चरणया छपाइ क्वचायेधुंकूगु दु । उकिया प्रिन्ट धाःसा वितरणया इलय् नेपालय् हे यायेगु कथं प्राविधिक तयारी विभागं पूूवंकूगु दु ।

आईएसओ १९०३ मान्यता दुगु विश्वस्तरया हे प्रविधियुक्त स्वंगूगु पुस्ताया विद्युतीय राहदानी खः । विद्युतीय राहदानीया पोलिकार्बोनेट पाना दुने जडान यानातःगु डिजिटल चिप्सय् राहदानी बाहकया दक्वं विवरण सुरक्षित दइ ।

न्हूगु राहदानी इनेज्या न्ह्याःसां पुलांगु एमआरपी राहदानीया म्याद मफूनिपिनि हकय् म्याद दत्तले व हे राहदानीया हे मान्यता बी । तर वितरण न्ह्याये हे त्यंगुलिं पुलांगु राहदानीया म्याद फूपिन्सं नं छुं दिं पियाः विद्युतीय राहदानी हे कायेत विभागं इनाप याःगु दु ।

विद्युतीय राहदानीया लागिं नेपालय् दुपिं नेपाली नागरिकया हकय् राष्ट्रिय म्हसिका पौ अनिवार्य याःगु दु । विदेशय् दुपिं नेपाली नागरिकया हकय् नागरिकता नम्बरयात मान्यता बी ।

नेपालय् १२ दं च्वय्या दिर्घल्वगितय्त थौंनिसें कोरोनाविरुद्धया फाइजर खोप बियाच्वंगु दु ।

कोभ्याक्स सुविधा कथं अमेरिकां ब्यूगु कोरोना भाइरसविरुद्धया फाइजर खोप थौंनिसें बीत्यंगु खः । मन्त्रालयया कथं थौंनिसें न्ह्याइगु खोप अभियान मंसिर ४ गतेतक्क जुइ । निगूगु मात्राया खोप मंसीर २७ निसें पुस २ गतेतक्क बी ।

१२ दं च्वय्या ८ ताजिया दीर्घल्वय् नुगः, जँलास्येँ, स्वँ, अङ्ग प्रत्यारोपण याःपिं, उच्च रक्तचाप वा चिनी ल्वय्, मस्तिष्क व मस्तिष्क रक्तनली सम्बन्धी ल्वय् दुपिं व रोग प्रतिरोधात्मक शक्ति म्ह्वः जूपिं मनूतय्त खोप बीगु महाशाखां न्ह्यथंगु दु ।

५०द्वः दीर्घल्वगितय्त खोप बीगु धाःगु महाशाखां १८ दं च्वय्या खोप काये त्वःफ्यूपिं दीर्घल्वगितय्त नं मंसिर ५ निसें ७ गतेतक्क कायेमफइगु कथं योजना दयेकागु न्ह्यथंगु दु ।

निवाः न्ह्यःनिसे आन्दोलनर याना वयाच्वंपि कानून व्यवसायीपिन्स थौं न सर्वोच्च अदालतया गेटय् धर्ना बिउगु दु।

प्रधानन्यायाधीश चोलेन्द्रशमशेर जबरायात मुख्य प्रवेशद्वारय् हे रोके यायेगु तयारी कथं कानून व्यवसायीपिन्स कार्यालय ई न्ह्यः गेटय् धर्ना बिउगु दु। वंगु शुक्रबाः न प्रधानन्यायाधीश जबरायात रोके यायेगु उद्देश्यं कानून व्यवसायीपिन्स प्रदर्शन याउगु खः।

तर प्रधानन्यायाधीश जबरा मेगु गेटपाखे सर्वोच्च अदालत दुहावंगु खः। नेपाल बारया कार्यालयपाखे सर्वोच्च दुहावनिगु गेट थौं बन्द याउगु दु।