लुँया भाः थौं न्हुगु रेकर्ड बने जुगु दु।

थौं छन्हु हे तोलाया २५ सय रुपैयाँ थहावना १ लाख ५ हजार ५ सय रुपैयाँ थ्यंगु दु।

थ्व आःतक हे दकलय् अप्पो खः। थ्व स्वया न्ह्यः कोभिड १९ या कारण लकडाउन जुगु इलय् वंगु दँया साउन महिनाय् १ लाख ३ हजार ५ सय रुपैयाँ तक थ्यंगु खः।

अथेहे वहः तोला न ४० रुपैयाँ थहावंगु दु। थौं तोलाया ४० रुपैयाँ थहावंना १४ सय ५० रुपैयाँ थ्यंगु दु।

नेपाल राष्ट्र बैंकं थौंनिसे छतका वंगु न्हुगु सिक्का चलनचल्तीइ हयेत्यंगु दु।

उगु छतका वंगु सिक्काया न्ह्यने भागय् सिक्काया दुने ६४ थोप्ला दइ। उगु थोप्लाया दुने घेराय् हिमाल, पहाड व तराईया पृष्ठभूमिइ न्ह्यगू प्रदेश नाप नेपाःया नक्सा दइ।

सिक्काया च्वयेयाउगु ब्बय् अंग्रेजी रि वान व क्वय् या भागय् देवनागरी लिपिइ छतका धका च्वया तःगु दु। नेपाःया नक्सा जवःपाखे दृष्टिविहीनपिन्स थिया म्हसिके फइगु कथं छगु थोप्लो दइ धका राष्ट्र बैंकं धाउगु दु।

अथेहे सिक्काया बिच भागय् च्यागू थोप्ला दुने वर्गाकार आकृतिइ जवः खवंपाखे चन्द्र, सूर्य, चक्र, संख, पद्म, गदा व दथुइ सगरमाथाया आकृति व आकृति क्वय् अंग्रेजीं सगरमाथा च्वयातःगु दु।

नेकपा (एमाले) या उपाध्यक्ष अष्टलक्ष्मी शाक्यं मिसापिन्स ३३ प्रतिशत जक मखु ५० प्रतिशत अधिकार काये दयेमाः धका धाउगु दु।

थौं मङ्गलवाः १ सय १२ क्वःगु अन्तर्राष्ट्रिय महिला दिवसया लसताय् एमाले नाप च्वंगु अखिल नेपाल महिला सङ्घं येँ जुगु छगु ज्याझ्वलय् न्ववानादीसे शाक्यं आः मिसापिन्स ३३ प्रतिशत जक मखु मिजंपिन्स थे ५० प्रतिशत अधिकार काये दयेमाः धका धयादीगु दु।

वयकलं नेपाःया कुल जनसङ्ख्याया बच्छि मिसापि दुगुलि मिजंपिन्स थे ५० प्रतिशत समान अधिकारया अवधारणा दयकेमाः धका धयादीगु खः।

अथेहे नेकपा एमालेया स्थायी कमिटी सदस्य नाप पूर्वमन्त्री थममाया थापां संविधानय् यानातःगु किटानी व्यवस्था कथं समाजवादया आधार तयार यायेत मिसापिन्त न निर्णायक थासय् थ्यकेमाः धका धयादीगु खः।

वंगु २४ घण्टाया दुने देयन्यक थप १९४ म्ह कोरोना भाइरस संक्रमण पुष्टि जुगु दु।

अथेहे छम्हेसिगु ज्यान वंगु दु। स्वास्थ्य तथा जनसंख्या मन्त्रालयया कथं ३ हजार ६३८ म्हेसिगु पीसीआर परीक्षण यागुलि ७४ म्हजन व २ हजार ७५६ म्हेसित एन्टीजेन परीक्षण याउगुलि १२० म्ह याना १९४ म्हेसित संक्रमण पुष्टि जुगु दु।

वंगु २४ घण्टाया दुने देयन्यक ३४८ म्ह कोरोना संक्रमणमुक्त जुगु दु। अथेहे देयन्यक ५ हजार ८७५ म्ह संक्रिय संक्रमितपि दु।

उकि मध्ये ५ हजार ७५४ म्ह होम आइसोलेसनय् व १३० म्ह संस्थागत आइसोलेसनय् दु।

येँ महानगरया सम्पदा तथा पर्यटन विभागं सञ्चालन याउगु ४५ दिं  काष्ठकला तालिम क्वचाःगु दु।

विभागं नेपाल हस्तकला महासंघ कला तथा शिल्प परिषद् नाप  सहकार्य याना रोजगारमुलक आधारभूत तालिम पुस ८ गतेनिसे राष्ट्रिय सभा गृहय् आयोजना याउगु खः।

समापन ज्याझ्वलय् प्रशिक्षार्थीपिन्स तयार याउगु काष्ठकला प्रदर्शन याउगुलि मेयर विद्यासुन्दर शाक्य, उपमेयर हरिप्रभा खड्गी श्रेष्ठपिन्स अवलोकन याउगु खः।

महानगरया मेयर शाक्यं, तालिम काःपि प्रशिक्षार्थीपिन्स समापन जुइ न्ह्यः ह सिँया वर्कसप चायकूगु खँ न्यना थः तसकं लय्तागु दु धका धयादीगु खः। ‘जिमिसं यक्को तालिम बिया तर तालिम कया प्रमाण पत्र कायेधुका यक्कोसिया ज्या मया।

मेयर शाक्यं धयादीगु दु, ‘२०७२ सालया भुखाचं सम्पदा क्षेत्रय् यक्को क्षति जुगु काष्ठकला ज्याय् कलाकारपि यक्को मागु दु तर उगु इलय कलाकारपि माले थाकू। जिमिसं मेगु न विशेषज्ञ तालिम माःसा उपलब्ध याये।’ उगु ज्याभ्वलय उपमेयर हरिप्रभा खड्गी श्रेष्ठं, काष्ठकला थे धातु, प्रस्तर लगायत मेमेगु विधाय् न तालिम याये। थज्यागु तालिमय् मिसापि न सहभागी जुगु उत्साहित खः धका धयादीगु खः।

सम्पदा विभागया प्रमुख अर्चना शाक्य, उपनिर्देशक श्रृजु प्रधान, तालिमया संयोजक प्रदिप शाक्य, हस्तकला महासंघ कला तथा शिल्पी परिषदया अध्यक्ष राजमान बज्राचार्यपिन्स न थःथःगु खँ तयादीगु खः।