प्रेस चौतारी नेपाल लुम्बिनी प्रदेशया अध्यक्षय् शोभाखर पन्थी सर्वसहमत ल्यउगु दु।

लुम्बिनी प्रदेशया स्थायी राजधानी दाङया देउखुरीइ जुगु न्हापागु अधिवेशनं पन्थीया अध्यक्षताय् ४६ म्ह सदस्यीय कार्यसमिति ल्यउगु खः।

उकिइ उपाध्यक्षय् दशरथ घिमिरे, लक्ष्मी तिमिल्सेना, महासचिवय् निरा गौतम, सचिवय् वेनी माधव बस्याल, ओपेन्द्र बस्नेत व कोषाध्यक्षय् एलवी थापायात ल्यउगु खः।

राप्रपाया नेता गणेश शेरचन ७८ दँय् मन्त।

चिनी ल्वय् व जँलास्य समस्यां पीडित शेरचन आइतबाः सुथय् ग्राण्डी अस्पतालय् उपचारया झ्वलय् मदुगु धका राप्रपाया प्रवक्ता मोहन श्रेष्ठं जानकारी बिउगु दु।

शेरचन राप्रपाया संस्थापक नेता नाप तत्कालीन राप्रपा नेपालया महामन्त्री खः। शेरचनयात थौं हे पशुपति आर्यघाटय् अन्तिम संस्कार याइ धका पारिवारिक स्रोतं धाउगु दु।

शेरचनया जहान, स्वम्ह काय् व छम्ह म्ह्याय्दी।

येँ महानगरपालिकाया मेयर विद्यासुन्दर शाक्यं धर्मकीर्ति महाविहारया विस्तारित भवन छगु ज्याझ्वः दथुइ उलेज्या यानादीगु दु।

वडा २५ या श्रीघः, नघलय् पुननिर्माण सम्पन्न जुगु भवन मेयर शाक्य उलेज्या यानादीगु खः। भवन पुननिर्माण यायेत २०७७ मंसिर २० गते मेयर शाक्यं शिलान्यास यानादीगु खः।

उगु ज्याझ्वलय् उपमेयर हरिप्रभा खड्गी श्रेष्ठ, प्रमुख प्रशासकीय अधिकृत लोकनाथ पौड्याल, वडाध्यक्ष नीलकाजी शाक्यपिनिगु न सहभागी दुगु खः।

भवन उलेज्या याये धुका मेयर शाक्यं, क्वाःपा, द्यःछेँ, बहाः, बही, सतः थे जागु गुठीं सञ्चालन याना सांस्कृतिक सम्पदा संरक्षण याय्त सरकार दुगु महसुस यायेगु कुतः यानागु दु। गुठी परम्परायात जीवन्त दयकेत समुदायया ज्याय् राज्यपाखे महानगरं साथ बिइ। थज्यागु सांस्कृतिक सम्पदा पुननिर्माण याना सञ्चालन व्यवस्थापनया लागि जिमिसं गुठीयात हे हस्तान्तरण यानागु दु। गुठीया स्वामित्व व क्रियाकलापय् जिमिसं छु न हस्तक्षेप याये मखु। मेयर शाक्यं धयादीगु खः। ‘बुद्ध दर्शन प्रवर्धनया लागि जिमिसं बज्रयानी, थेरवादी व महायानी विहारया पुननिर्माण नाप अन जुगु ज्याझ्वलय् ग्वाहालि यानागु दु।

महानगरया ग्वाहालि निर्माण जुगु अन्तरराष्ट्रिय बौद्ध भावना केन्दय् धम्महल भवन उलेज्या याये धुकागु दु। बागबजारय् बुद्ध विहार पुननिर्माण जुइ धुकुगु दु। थुकिया उलेज्या जुयाच्वंगु दु।’ धका मेयर शाक्यं धयादीगु दु। स्थानीय सरकार धइगु स्थानीय स्तरय् दुगु चिचिधःगु समस्या समाधान यायेत व स्थानीय पहिचान बचे यायत खः। धका उपमेयर हरिप्रभा खड्गी श्रेष्ठं धयादीगु खः, ‘सम्पदा संरक्षण यायेत छु न योजना प्रस्तावया रुपय् वइगु बैठकय् मतभेद दइमखु। सर्वसम्मतं स्वीकृत जुइ। वुद्ध दर्शनं झीत हलियक म्हसिकूगु दु। थ्व झिगु सम्भावना खः।’

उगु विहारया भवन लागत ४ करोड २८ लाख रुपैयाँया खः। उकि मध्ये न्हापागु चरणय् करिब १ करोड लागतय् ज्या जुगु खः। थुगु चरणय् ९९ लाख ९९ हजार १६५ रुपैयाँ मध्ये १५ प्रतिशत अर्थात् १४ लाख ९९ हजार ८७४ रुपैयाँ उपभोक्ता समितिं व्यहरे याइ। बाँकी ८५ प्रतिशत अर्थात् ८४ लाख ९९ हजार २९० रुपैयाँ महानगरं ग्वाहालि याइ।

येँ महानगरपालिकाया मेयर विद्यासुन्दर शाक्यं महानगर मेयरय् हाकन थःम्हेसिया उम्मेदवारी बिइ धका धयादीगु खः।

नेपाल पत्रकार महासंघ उपत्यका प्रदेश समितिपाखे जुगु छगु ज्याझ्वलय् न्ववानादीसे वयकलं पार्टीं टिकट बिलकि हाकनं महानगरया मेयरय् उम्मेदवारी बिइ धका धयादीगु खः।

भेट येँ महानगरया मेयर विद्यासुन्दर शाक्यनाप नेपाःया लागि थाइल्याण्डया राजदूत भोसिता भोरासाफं शिष्टाचार भेट यानादीगु दु। येँ महानगर व थाइल्याण्डया बैंकक महानगर दथुइ भगिनी सम्बन्ध स्थापना यायेगु विषय भेटघाट जुगु खः।

भगिनी सम्बन्ध स्थापना यायेत नेपाल सरकारं २०७२ भदौ ६ गते स्वीकृति बिउगु खः।

मेयर शाक्यं, सहरी व्यवस्थापनय् न्हुगु अभ्यास, सेवा व विकास व्यवस्थापन, प्रकोप व्यवस्थापन, वातावरणीय सुधार, संस्कृति, कलालगायत क्षेत्रय् थःपिन्स सउगु मेम्हेसित स्यने माः धका धयादीगु दु। ‘सहरया दथुइ सामाजिक, सांस्कृतिक व आर्थिक क्षेत्रय् सहयात्राया सम्भाव्यता दुगुलि निगु पक्ष दथुइ संवाद व क्षमता विकासया कार्यक्रम, समुदायया शशक्तिकरण नाप शुशासनया माध्यमपाखे भूगोल, जाति व बिचाःपाखे ताःपासा जनता दथुइ सामाजिक सद्भाव, सम्मान व बिश्वाश थहावनिइ।’ मेयर शाक्यं भगिनी सम्बन्धपाखे अपेक्षित उपलब्धीया विषय थःगु धारणा तयादीगु खः।

अथेहे राजदूत भोरासाफं, थाइल्याण्ड महानगर येँ महानगरनाप भगिनी सम्बन्ध तयेगु निति तयार दु धका धयादीगु खः। ‘थःपिनिगु ज्ञान व सीप अभिवृद्धिया लागि भगिनी सम्बन्ध स्थापना मदयकः मगाः धका धयादीगु खः। थुकिइ निगु महानगरं थःपिन्स न्ह्यने म्हसिइकेगु अवसर दइ।’ धका राजदूत भोरासाफं धयादीगु खः।

उगु भेटय् महानगरया प्रमुख प्रकाशकीय अधिकृत लोकनाथ पौड्याल, सहरी योजना आयोगया उपाध्यक्ष सरोज बस्नेत, प्रशासन विभागया प्रमुख महेश काफ्ले, दूताबासपाखे मामिला उपप्रमुख युटुमपोन एम्पाइभिट नाप पदाधिकारीपिनिगु सहभागी दुगु खः। अन्तरराष्ट्रिय सम्बन्ध सचिवालयया प्रमुख सुदर्शन भट्टराईया कथं आःतक येँ महानगरं अन्तरराष्ट्रिय १८ गु व देय् दुने न्यागु नगरनाप भगिनी सम्बन्ध स्थापना याये धुकुगु दु।