सरकारं पेट्रोलियम पदार्थया भाः हाकन थकाउगु दु।

थौं चान्ह्यः च्वंगु नेपाल आयल निगम सञ्चालक समितिया बैठकं डिजल, पेट्रोल व मचिकंया भाः लिटरं न्यातका थकाउगु दु।

निगमं अन्तर्राष्ट्रिय बजाःया भाः थकाउगु धासे न्यातका थकागु खः। आः पेट्रोल लिटरं १५० रुपैयाँ थ्यंगु दु सा डिजल व मचिकया भाः १३३ रुपैयाँ लिटरं थ्यंगु दु।

आयल निगमं ज्याथुइगु ग्यासछगः सिलिन्डर ६६५.३४ रुपैयाँ घाटा जूसा भाः थकया मदुगु धका धाउगु दु। हवाई इन्धनया भाः समायोजन याउगु दु।

येँ महानगरपालिका वडा ३ धारापाटीइ च्वंगु सिद्धेश्वर महादेव देगःया उलेज्या जुगु दु। सिल्लाचःह्रेया दिं कुन्हु येँ महानगरया मेयर विद्यासुन्दर शाक्यं उगु देगःया उलेज्या यानादीगु खः।

महानगरया जनसहभागिताया आधाय् ज्याझ्वः यायेगु कथं निर्माण जुगु देगः दयकेत धारापाटी सामाजिक सेवा समितिया संयोजन जुगु खः। धारापाटी साढे ३ रोपनी जग्गा संरक्षण यासे पार्क निर्माण जुगु खः। थुगु जग्गाय् करिब २१ लाख ९४ हजार रुपैयाँ लागतय् देगः निर्माण जुगु खः। देगः उलेज्यायाना थःगु खँ तयेगु झ्वलय् मेयर शाक्यं, सम्पदा पुननिर्माणय् प्रगति जुया च्वंगु दु।

‘स्थानीय तह गठन जुइ धुका न्हापागु कार्यकाल जुगु स्थानीय सरकारया स्वरुप दयकेत कानून व मेमेगु प्रबन्धय् ज्या यायेमाः धका धयादीगु खः। विकास यानागु लिच्वः वयाच्वंगु दु। जिमिस ज्या याना च्वनागु हे दु। गुलिइ सिधल। गुलिइ ल्यदनिइ। थ्व जिं सकारात्मक माने यानागु दु।’

मेयर शाक्यं खाली जग्गाय् संरचना यायेगु कथं पार्क दयका संरक्षण यायेगु नीति हया समुदाय स्तरय् समान धारणा निर्माण यायेत इनाप याउगु दु। शैक्षिक, धार्मिक व स्वास्थ्य क्षेत्र वडा ३ या विशेषता खः।

थुगु विशेषतायात ल्यकेगु ज्यायात महत्व बिया वयाच्वनागु दु धका वडा ३ या अध्यक्ष दीपक के. सी. धयादीगु दु, जिमिसं २ सय रोपनी जग्गा संरक्षण यायेगु कथं पार्क दयकागु दु। ८ किलोमिटर सतक विस्तार यानागु दु। भैरव, नारायण, शिव, दक्षिणकाली व गणेशया देगः निर्माण, पुननिर्माण व मर्मत सम्भार यानागु दु धका वयकलं धयादीगु दु।

स्वनिगलय् बौद्ध विहार (बहाःबही) या इतिहास व संस्कृति सम्बन्धी सफू तयार यायेगु उद्देश्यं फागुण २१ गते शनिबाः यलय् बृहत अन्तक्र्रियात्मक गोष्ठी जुइत्यंगु दु।

बौद्ध विहार संघ यलया पुच्वय् अक्षयेश्वर महाविहारय् निन्हु गोष्ठी यायेत्यनागु दु धका थौं विहीबाः ग्वसाः ग्वःगु पत्रकार भेटघाटय् जानकारी बिउगु दु। गोष्ठीया विषय नेपाल मण्डलं बहाःबहीया इतिहास, संस्कृति व अभ्यास बौद्ध गोष्ठी तःगु खः।

‘लिच्छिविकालीन व मल्लकालीन बौद्ध विहारया इतिहास सम्बन्धी नेपाःमिपिन्स च्वंगु कम जक दु। थीथी इलय् पिहावंगु आः बजारय् मदय धुकुगु दु। अथेहे बहाःबहीया इतिहास, संस्कृति व अभ्यास सम्बन्धी प्रमाणिक, विवरणात्मक व व्याख्यात्मक सफू तयार यायेगु कथं उगु ज्याझ्वः जुइत्य.गु दु धका खः ।’ वरिष्ठ उपाध्यक्ष करणा बज्राचार्य न धयादीगु दु।

गोष्ठीइ प्रस्तुत कार्यपत्र व उकिया बारे जुइगु छलफलयात दुथ्याका सफूया स्वरुप बिइगु संघया लक्ष्य खः। गोष्ठीइ लिच्छिविकालीन नेपाल मण्डलया बहाः बहीया इतिहास, मध्यकालीन नेपालमण्डलया बहाःबहीया इतिहास, बहाःबही प्रचलनय् दुगु त्रियान परम्पराया दार्शनिक पक्ष, बहाःबहीया कला, बहाःबहीया संरक्षण लगायत याना झीगु कार्यपत्र प्रस्तुत याइ धका कार्यसमिति सदस्य ज्ञानेन्द्र शाक्यं धयादीगु दु। ‘इतिहास, संस्कृति व दर्शनय् केन्द्र जुया बौद्ध विहारया संरक्षण यायेत आधुनिक पुस्तां थुगु सम्बन्धी जानकारी कायेमाः।

थुकिया संरक्षण यायेगु धइगु मानव सभ्यता, संस्कृति संरक्षण यायेगु खः। थुगु सम्बन्धी पठन संस्कृति विकास यायेगु उद्देश्य न गोष्ठी पाखे काइ।’ गोष्ठीया संयोजक गौतममुनि बज्राचार्य न धयादीगु दु। उगु ज्याझ्वलय संघया उपाध्यक्ष सुरेन्द्र बज्राचार्य न इतिहास, दर्शन, संस्कृति सम्बन्धी रुचि दुपि न्ह्याम्हे जूसा न गोष्ठीइ ब्बति कायफइ धका धाउगु दु।

वंगु २४ घण्टाया दुने देयन्यक थप १०५ म्ह कोरोना भाइरस संक्रमण पुष्टि जुगु दु।

अथेहे कोरोना सक्रमणं स्वम्हेसिगु ज्यान वंगु दु। स्वास्थ्य तथा जनसंख्या मन्त्रालयया कथं २ हजार ४४८ म्हेसिगु पीसीआर परीक्षण याउगुलि ७० म्ह व २ हजार ४७६ म्हेसिगु एन्टीजेन परीक्षण याउगुलि ३५ म्ह याना १०५ म्ह संक्रमण पुष्टि जुगु दु।

वंगु २४ घण्टाय् ३२० म्ह कोरोना संक्रमणमुक्त जुगु दु।

येँ महानगरं वडा ६ सिमलटार महामृत्युञ्जय द्यःया थाय् नापं किरियापुत्री भवन उलेज्या यानादीगु दु।

महानगरया मेयर विद्यासुन्दर शाक्य, संघीय संसद सदस्य कृष्ण राई, वडाध्यक्ष दीपेन्द्र लामां उगु  किरियापुत्री भवन व जय गुरुदेव भवन उलेज्या यानादीगु खः। संसद विकास कोष, महानगरपालिका, बौद्धनाथ क्षेत्र विकास समिति, उपभोक्ता समितिया लागत सहभागिताय् निगु तल्ला भवन निर्माण याउगु खः। भवनय् छकलं न्यागु परिवारपि किरिया च्वनेगु थाय् दु। निगु तल्ला भवन करिब १२ लाख रुपैयाँ निर्माण याउगु खः।

उगु भवन उलेज्या याये धुका मेयर शाक्यं, वडाय् दुने पार्क व हरियाली प्रवर्धनया लागि यक्को ज्या यानागु दु धका धयादीगु खः। ‘ वडापाखे सम्पन्न जुगु ज्या एकीकृत संगालो महानगरया प्रगति खः। जिमिसं वडा समितिपाखे जुइगु ज्याया लागि सहजीकरण यानागु दु। माग जुगु योजना प्राथमिकताया आधारय् स्वीकृत यानागु दु।’ मेयर शाक्यं धयादीगु दु, ‘तत्काल मयासे मगागु ज्या दु सा अझ न ज्यायायेत ई दु।

सार्वजनिक जग्गा संरक्षण यायेत व पार्क दयकेगु ज्याय् प्राथमिकता बिया वयाच्वनागु दु।’ धका मेयर शाक्यं धयादीगु खः। उगु ज्याझ्वलय् संघीय संसद सदस्य कृष्ण राई व वडाध्यक्ष दीपेन्द्र लामां न थःगु खँ तयादीगु खः।