बुद्ध धर्म संगीत ख्यलय आजीवन योगदान बियादिइम्ह यल ओकुवहाःया वरिष्ठ संगीतकार किरण शाक्यया तिरिमयजु चिनानी शाक्यजु मन्त।

मुटु ल्वचं पिडित जुयाच्वम्ह वय्कः फागुण १८ गते सुथय् ८ः४५ बजे अल्का हस्पिटल–२ उपचार झ्वलय् मदुगु खः ।

वयेकया जहान नाप निम्ह म्ह्याय् व छम्ह काय् दी। 

येँ महानगरपालिका सूर्यविनायक नगरपालिकाय् सञ्चालन याउगु सूर्यविनायक नगर अस्पतालयात छगः व येँ महानगर वडा ६ य् सञ्चालित स्तुपा सामुदायिक अस्पतालयात निगः भेन्टिलेटर लल्हाःगु दु।

राष्ट्रिय सभा गृहय् महानगरया मेयर विद्यासुन्दर शाक्य व उपमेयरया रोहवरय् प्रमुख प्रशासकीय अधिकृत लोकनाथ पौडयालं सूर्य विनायक नगरया प्रमुख प्रशासकीय अधिकृत राजेन्द्रप्रसाद कँडेल व स्तुपा सामुदायिक अस्पतालया निर्देशक पेम्बा लामानाप सम्झौता पत्रय् हस्ताक्षर यासे उगु भेन्टिलेटर उपलब्ध याउगु खः। महानगरया भगिनी सहर तिव्वतया ल्हासा नगरंं न्यागः भेन्टिलेटर उपलब्ध याना बिउगु खः। थुगु मध्ये स्वगः भेन्टिलेटर वितरण याउगु खः ।

भेन्टिलेटर लल्हाये धुका न्ववानादिसे मेयर शाक्यं धयादीगु दु, ‘जिमिसं महानगरबासीया जक मखु। महानगरय् वइपि दक्को जनताया स्वास्थ्य व शिक्षा जिम्मा काये। थन उपचार व शिक्षाया लागि वइपि उपचार मयास्ये सु न लिहा वनेम्वालेमाः।’ शाक्यं धयादीगु दु, ‘जिमिसं येँ जिल्लाया दक्को नगरनापा नगर—नगर साझेदारी कार्यक्रम यानागु दु।

न्यागु प्रदेशय् न्याः नगरनाप भगिनी सम्बन्ध स्थापना यासे पार्क व हरियाली यायेगु योजनाया लागि १ करोड ५० लाख रुपैयाँया दरं ग्वाहालि यानागु दु। ख्वपया मध्यपुर थिमी व चाँगुनारायण नगरयात न ग्वाहालि यानागु दु। थ्वया लिपा यल महानगर व गोदावरी नगरनाप न साझेदारी ज्याझ्वःया विषय खँ जुइ धुकुगु दु।’

उगु ज्याझ्वलय् सूर्यविनायक नगरया मेयर बासुदेव थापां, सूर्यविनायक नगर अस्पतालयात महानगरं भेन्टिलेटर उपलब्ध याउगुलि आकस्मिक सेवाया लागि याउसे च्वंगु दु। ‘जिमिसं संघ व प्रदेश सरकारया ग्वाहालि १ सय वेडया अस्पताल दयकेगु योजना दु। महानगरं बिउगु भेन्टिलेटर व एचडीयु व आइसीयुया लागि सामाग्री व उपकरण वये धुका आः अत्यावश्यक सेवा कायेत विरामीपि मेथाय् अस्पताल वनेमालि मखु। थुकिइ मेगु अस्पतालया चाप घटे जुइ।’ मेयर थापां धाउगु दु।

कोविडया इलय् जक मखु मानव जीवनय् स्वास्थ्य संकट वंगु इलय् न भेन्टिलेटर मदक मगाः। महानगरया उपमेयर हरिप्रभा खड्गी श्रेष्ठं धयादीगु दु, ‘जिमिसं सरकारी व सामुदायिक अस्पतालया क्षमता थकायेत ग्वाहालि यानागु दु। कोविडया इलय् विकासया ज्या दीका न स्वास्थ्य सुरक्षाया लागि ज्या यानागु दु।’ उपमेयर खड्गी श्रेष्ठं आवश्यकता व मागया आधारय् ग्वाहालि यानागु दु धका धयादीगु खः।

येँ महानगर वडा २३ य् च्वपि ख्याल प्याखँ व दवूँ प्याखँया कलाकारपिन्त सम्मान याउगु दु।

त्वाः खलः ओमबहाःया ग्वसालय् जुगु उगु ज्याझ्वलय् मूपाहाँ महानगरया मेयर विद्यासुन्दर शाक्यं सम्मान लल्हानादीगु खः।

सम्मान ज्याझ्वलय् न्ववानादीसे मेयर शाक्यं, अमूर्त सम्पदाया अभिलेखीकरण व संरक्षण महानगरं ध्यान बियाउगु दु धका धयादीगु खः। ‘मूर्त सम्पदा व अमूर्त सम्पदा खथुइ अभिन्न सम्बन्ध दु। अमूर्त सम्पदा थः दुने हे यक्को पक्ष दु। मूर्त सम्पदाया क्षति खने दइ। अमूर्त सम्पदा क्षति तत्काल खने दइमखु। उकिइ अमूर्त सम्पदा सम्बन्धी अभिलेखीकरण व संरक्षणय् जिमिसं यक्को ज्याझ्वःसञ्चालन यानागु दु।’

२३ वडाध्यक्ष मचाराजा महर्जनं, परम्परागत चालचलन बचे यायेत यक्को ज्या यानागु दु। न्हापा न्हिइपुकेत दवू प्याखँ क्यनेगु याइ। प्रविधिया विकास जुया वनेवं परम्परागत मनोरञ्जनया विधि ल्युयने लानावन धका धयादीगु खः।

उगु ज्याझवलय् ५५ म्ह कलाकारपिन्त सम्मान याउगु खः।

लुँ तोलां थौं छन्हुया दुने १९ सय रुपैयाँ बढे जुगु दु।

थौं लुँ तोलां १९ सय थहावना ९९ हजार ५ सय रुपैयाँ थ्यंगु दु धका नेपाल सुनचाँदी व्यवसायी महासंघं धाउगु दु।

रुस व युक्रेन दथुइ जुयाच्वंगु युद्धया प्रभाव लुँया भाः थहावना च्वंगु अनुमान याउगु दु। अथेहे, वहः न तोलाया ४० रुपैयाँ न थहावंगु दु।

थौं वहः तोलां ४० रुपैयाँ थहावना १३ सय ७५ रुपैयाँ थ्यंगु दु। 

एमसीसीया कारण पार्टी दुने मतभेद तया वयाच्वम्ह माओवादी केन्द्रया नेता नारायणकाजी श्रेष्ठ व नेकपाया महासचिव नेत्रविक्रम चन्द विप्लव दथुइ भेटवार्ता जुगु दु।

श्रेष्ठयात नाप लायेगुनिति विप्लव थौं बुधबाः सुथय् श्रेष्ठया निवास हात्तीवन वंगु खः। प्रतिनिधिसभां एमसीसी अनुमोदन यायेत माओवादी केन्द्रया नेतृत्वय् जबरजस्ती याउगु धासे राष्ट्रवादया पक्षय् दुपि छप्प जुइगु निति खँ जुगु धका धाउगु दु।

म्हिगः मंगलबाः माओवादी केन्द्रया अध्यक्ष पुष्पकमल दाहाल प्रचण्ड न श्रेष्ठयात नाप लायेगु निति वयकःया निवासय् वंगु खः। एमसीसी संसदपाखे अनुमोदन जुगुलि श्रेष्ठ नाप माओवादी केन्द्रया असन्तुष्ट नेतापि छलफल न्ह्याकाच्वंगु दु।