नेकपा माओवादी केन्द्रया अध्यक्ष पुष्पकमल दाहाल प्रचण्ड नेता नारायणकाजी श्रेष्ठ नापलायेत वयकःया निवास हात्तीवन वंगु दु।

अमेरिकी सहयोगसम्बन्धी सम्झौता एमसीसी सम्झौता प्रतिनिसधसभापाखे अनुमोदन यायेगु पार्टीया निर्णय नेता श्रेष्ठ असन्तुष्ट जुगु खः।

एमसीसी पास यायेमज्यु धका अडान तया वयाच्वंम्ह नेता श्रेष्ठं १२ बुँदे ब्याख्यात्मक घोषणायात स्वीकार याउगु मदुनि। थुगु विषययात कया माओवादी केन्द्रया अध्यक्ष प्रचण्ड व नेता श्रेष्ठ दथुइ मतभेद जुगु खः।

एमसीसीया विषय पार्टी दुने असहमति तयावया च्वम्ह श्रेष्ठयात नापलायेत अध्यक्ष प्रचण्ड मंगलबाः न्ह्यिनय् वयकः निवासय् वंगु खः।

नेकपा एमालेया अध्यक्ष केपी ओलीें अमेरिकी सहयोग परियोजना एमसीसी राष्ट्रहितया पक्षय् कार्यान्वयन यायेमाः धका धाउगु दु।

एमसीसीबारे पार्टीया धारणा सार्वजनिक यासे एमाले न मंगलबाः याउगु पत्रकार सम्मेलनय् अध्यक्ष ओलीं एमसीसी सम्झौता थःपिन्स यानागु मखु व संसदपाखे अनुमोदन यायेगु इलय् अनुचित ढंगं अलग तःगु धका धाउगु दु।

वयकलं धाउगु दु, ‘छगु सम्झौता संसदपाखे पारित जुइ धुका कार्यान्वयन यायेमखु धका धाये धइ मखु। प्रक्रियागत त्रुटि याये दइमखु, सरकारं यात। तर न्ह्याथे याना न पास जुइ धुका छ कार्यान्वयनय् वनेमा विकल्प मदु।’ आः एमसीसी कार्यान्वयन यायेगु इलय् राष्ट्रिय हितया प्रत्याभूति जुइमाः धका एमाले अध्यक्ष ओलीं धाउगु दु। ओलीं गठबन्धन सरकार विघटन याना जनादेश कथं न्ह्यावनेमाः धका धाउगु दु।

वयकलं धाउगु दु, थ्व सरकार दयके मबिउगु व, ढाले याये थ्व छु न्हुगु जुल ले?’ नेपाली कांग्रेसनाप थःगु दलया खँ जुगु, तर पार्टीया अडान मत्वताउगु धका अध्यक्ष ओलीं धाउगु दु।

नेवाः न्ह्यलुवाः, नेवाः देय् दबूया महासचिब नाप नेवाः गुथिया अध्यक्ष पवित्र बज्राचार्य न नेवाः देय् दबूया आः जुइगु महाअधिवेशनय् अध्यक्ष पदय् उम्मेदवारी बिइगु घोषणा यानादीगु दु।

नेवाः न्ह्यलुवाः बज्राचार्यं देय् दबूया येँ जिल्लाया अधिबेसनय् थः म्हेसिया आः धरानय् जुइगु महाधिबेसनय् अध्यक्ष पदया लागि उम्मेदवार जुइगु घोषणा यानादीगु खः।

नेवाःतय्गु राष्ट्रिय संगठन नेवाः देय् दबूयात खलः पुचः नाप सकल नेवाःपिन्त कःघानाः यंकेगु नितिं थःगु दक्षता व अनुभवयात छ्यलाः न्ह्याकेगु विचाः जुइ धका धयादीगु खः।

नेप्से थौं १.६२ प्रतिशतं कुहावंगु दु। संसदं एमसीसी अनुमोदन जुइवं बजाः थहावइ धका धासा थौं नेप्से तसकं कुहावंगु दु।

नेप्से ४३.१२ अंकं कुहावया २६१०.५९ बिन्दुइ बन्द जुगु दु। थौं बजाःया परिसूचक नाप दक्को उपसूचकय् यक्को कुहावंगु दु। विशेष याना एमसीसी संसदपाखे अनुमोदन नाप हाइड्रोपावरया सेयर तसकं थहा वनिइ धका हल्ला यासा ३.०९ प्रतिशतं कुहावंगु दु।

थौं ३ अर्ब ६६ करोडया सेयर कारोबार जुगु दु। कारोबार रकम अपी पावरया १६ करोड, अरुण भ्याली हाइड्रोपावरया  करिब १५ करोड व हिमानलयन डिस्टिलरीया १३ करोड रुपैयाँ सेयर किनबचे जुगु खः।

बजार कुल १९१ कम्पनीया सेयर कारोबारय् १८३ कम्पनीया सेयर भाः कुहावंगु दु। थौं तारागाउँ रिजेन्सी होटेलया भाः १.११ प्रतिशत, सानिमा जनरल इन्स्योरेन्स ०.८७ प्रतिशतं थहावंगु दु।

अथेहे तेह्रथुम पावर व सामलिङ पावरया सेयर भाः १० प्रतिशतं कुहावंगु दु। दिव्येश्वरी हाइड्रोपावरया ८.५५ प्रतिशत, मैलुङ खोला जलविद्युत् कम्पनीया ६.७८ प्रतिशत व न्यादी हाइड्रोपावरया सेयर भाः ६.७८ प्रतिशतं कुहावंगु दु।

वंगु २४ घण्टाया दुने देयन्यक थप १८० म्हेसित कोरोना भाइरस संक्रमण पुष्टि जुगु दु।

अथेहे छम्हसिगु ज्यान वंगु दु। स्वास्थ्य तथा जनसंख्या मन्त्रालयया कथं ५ हजार २१८ म्हेसिगु पीसीआर परीक्षण याउगुलि ११९ म्ह व ३ हजार १२३ म्हेसिगु एन्टिजेन परीक्षण याउगुलि ६१ म्ह याना १८० म्ह संक्रमण पुष्टि जुगु दु।

वंगु २४ घण्टाय् ४०० म्ह कोरोना संक्रमणमुक्त जुगु दु। अथेहे ८ हजार २३५ म्ह संक्रिय संक्रमितपि दु।