न्यादी हाइड्रोपावर लिमिटेडया धितोपत्रय् प्राथमिक सार्वजनिक निष्कासन (आईपीओ) बाँडफाँड याउगु दु।

बिक्री प्रबन्धक ग्लोबल आईएमई क्यापिटलया कार्यालयं थौं शुक्रबाः आईपीओ बाँडफाँड याउगु दु। बिक्री प्रबन्धक ग्लोबल आईएमई क्यापिटलया कथं २ लाख ९ हजार २५० म्हेसित १० कित्ताया दरं सेयर प्राप्त जुगु दु। कम्पनीं आईपीआय् २२ लाख ५५ हजार ८४ आवेदकपिन्स २ करोड ७० लाख ८९ हजार १५० कित्ताया लागि आवेदन बिउगु खः।

उकि मध्ये १३ हजार ९४६ म्हेसिगु आवेदन रद्द जुगु दु धका बिक्री प्रबन्धकं धाउगु दु। २२ लाख ४१ हजार १३८ म्हेसिगु आवेदन भेरिफाइड जुगुलि आवेदकपि मध्ये गोलाप्रथापाखे २ लाख ९ हजार २५० म्हेसित १० कित्ताया दरं सेयर बाँडफाँड जुगु खः। योग्य आवेदकपि मध्ये करिब २० लाख ३२ हजार आवेदकपिनिगु ल्हाः खाली जुगु खः।

कम्पनीं वंगु असोज १५ निसे १९ गते तक सर्वसाधारणया लागि २२ करोड ५० लाख रुपैयाँ बराबरया २२ लाख ५० हजार कित्ता सेयर निष्कासनय् हःगु खः। निष्कासनय् हःगु कुल सेयरमध्ये २ प्रतिशत अर्थात् ४५ हजार कित्ता कर्मचारीपिन्त व ५ प्रतिशत अर्थात् १ लाख १२ हजार ५०० कित्ता सामूहिक लगानी कोषयात छुटे यागु खःसा बाँकी ल्यः दुगु २० लाख ९२ हजार ५०० कित्ता सेयर जक सर्वसाधारणयात बिक्री याउगु खः।

नेकपा एमालेया सचिव योगेश भट्टराई अस्पताल भर्ना जुयादीगु दु।

ज्वरो वःगुलि भट्टराई थौं शुक्रबाः वीर अस्पतालय् भर्ना जुयादीगु खः। स्वन्हु निसे अस्वस्थ जुगुलि भट्टराई छेँ हे आराम यानाच्वंगु खः।

तर ज्वरो झन बढे जुगुलि अस्पताल भर्ना जुगु धका वयकःया सचिवालयं धाउगु दु।

नेपाल पत्रकार महासंघ, प्रदेश–२ या उपाध्यक्ष रमानन्द गुप्ता थौं शुक्रबाः मन्त।

मस्तिष्कघात जुया विराटनगरय् उपचार यायेगु झ्वलय् वयकः मदुगु धका प्रदेश अध्यक्ष राजेश कुमार कर्ण न जानकारी बिउगु दु।

६० दँ दुम्ह गुप्ता सिरहा निवासी खः।

राष्ट्रपति विद्यादेवी भण्डारीया समक्ष नेपालया लागि ब्राजिल, इटाली, माल्टा व दक्षिण अफ्रिकाया नवनियुक्त राजदूतपिन्स थःथःगु ओहोदाया प्रमाणपत्र पेश याउगु दु।

राष्ट्रपति भवन, शीतल निवासय् थौं ग्वसाः ग्वंगु विशेष समारोहय् नेपालया लागि ब्राजिलया आवासीय राजदूत कार्लोस अल्वेर्टो माइकल्सेन डेन हार्टोगसहित इटाली, माल्टा व दक्षिण अफ्रिकाया गैरआवासीय राजदूतपिन्स भिन्चेञ्जो डि लुक्का, रुबिन गाउची व जोएल सिबुसिसो एन्डेबेलेपिन्स थःथःगु ओहोदाया प्रमाणपत्र प्रस्तुत याउगु खः।

उगु ज्याझ्वलय् परराष्ट्रमन्त्री डा नारायण खड्का, प्रधानसेनापति प्रभुराम शर्मा, राष्ट्रपतिया कार्यालय व परराष्ट्र मन्त्रालयया उच्च अधिकारीपिनिगु उपस्थिति दुगु खः।

स्वास्थ्य तथा जनसंख्या मन्त्रालयया कथं थौं दकलय् अप्वो येँ १७१ म्हेसित कोरोना सक्रमण पुष्टि जुगु दु।

झापाय् ५९म्ह, रुपन्देहीइ ४१म्ह, मोरङय् ३४म्ह, यलय् ३३ म्ह, कास्कीइ २३ म्ह, चितवनय् २२ म्ह, ख्वपय् १८ म्ह, नुवाकोटय् १३ नाप मकवानपुर व कैलालीइ १०÷१० म्हेसित कोरोना संक्रमण पुष्टि जुगु दु।