प्रतिनिधि सभाया बैठक थौं न्हिनसिया १ बजे च्वनिइगु जुगु दु।

बैठकया कार्यसूची क्वछित सभामुख अग्नि सापकोटां थौं सुथय् ११ः३० बजे कार्यव्यवस्था परामर्श समितिया बैठक सःतूगु दु।

सरकारया नेतृत्वकर्ता दल नेपाली कांग्रेसं एमसीसी थौं टेबुल यायेत्यःगु दु। तर सत्ता गठबन्धनया एमसीसीबारे सहमति जुइफुगु मदुनि। सहमतिया कुतः थौं सुथय् १० बजे गठबन्धनया शीर्ष नेतापिनिगु बैठक च्वनेत्यःगु दु।

संघीय संसदया महासचिव भरतराज गौतमं म्हिगः बहनि सार्वजनिक याउगुलि सम्भावित कार्यसूचीइ एमसीसीयया विषय छु न उल्लेख याउगु मदु।

सम्भावित कार्यसूचीइ प्रधानमन्त्री शेरबहादुर देउवां राष्ट्रिय समावेशी आयोगया स्वक्वmगु वाषिर्क प्रतिवेदन २०७७÷७८ प्रतिनिधि सभामा पेश याउगु दु।

नेपाल आयल निगमं हाकन डिजेल, पेट्रोल व मचिकंया भाः थकाउगु दु।

थौं चान्ह्यनिसे लागु जुइगु कथं डिजेल, पेट्रोल व मचिकनय् लिटरय् स्वतका थकानागु दु धका निगमया प्रवक्ता विनितमणि उपाध्ययं धाउगु दु।

न्हुगु भाः कथं आः पेट्रोल छगु लिटरया १४५ थ्यःगु दु सा डिजेल व मचिक लिटरं १२८ रुपैयाँ थ्यंगु दु। पेट्रोल, डिजेल व मचिकंया भाः आतकया हे दकलय् अप्पो खः।

थ्व स्वया न्ह्यः वंगु माघ १८ गते निगम भाः थकाउगु खः।

नेकपा एकीकृत समाजवादीं सहमति जुउसा अमेरिकी सहयोग परियोजना एमसीसी संसदय् पेस यायेगु निर्णय याउगु दु।

शनिबाः न्हुगु बानेश्वरय् च्वंगु स्थायी कमिटी बैठकं सहमति जुउसा एमसीसी पेस याकेमबिउगु निर्णय याउगु धका प्रवक्ता जगनाथ खतिवडां धाउगु खः।

तर, नेकपा एमाले न संसदय् जुयाच्वंगु पंगः हटे जूसा एकीकृत समाजवादीया सर्त तःगु दु। ‘संसद अवरोध हटे जुइमाः। एमसीसीबारे छलफल जुइगु वातावरण दयेमाः’, खतिवडां धाउगु दु।

बैठकं यथास्थितिइ एमसीसी अनुमोदन याये मफइगु निर्णय याउगु खः। ‘यथास्थितिइ एमसीसी पारित याये फमखु। संशोधन मयासे मज्यू,’ खतिवडां धाउगु दु। एसमीसीबारे थप निर्णय कायेगु अधिकार सचिवालययात बिउगु दु।

वंगु २४ घण्टाया दुने देयन्यक ३५० म्हेसित कोरोना संक्रमण पुष्टि जुगु दु।

अथेहे थौं कोरोना सक्रमणं प्यम्हेसिगु ज्यान वंगु दु। स्वास्थ्य तथा जनसंख्या मन्त्रालयया कथं ३ हजार ५३८ म्हेसिगु पीसीआर परीक्षणय् १९८ म्ह व ३ हजार ५५८ म्हेसिगु एन्टिजेन परीक्षणय् १५२ म्ह याना ३५० म्ह संक्रमण पुष्टि जुगु दु।

वंगु २४ घण्टाय् १ हजार २७२ म्ह संक्रमणमुक्त जुगु दु। वंगु २४ घण्टाय् येँ ५१ म्हेसित कोराना संक्रमण पुष्टि जुगु दु। अथेहे कास्कीइ २२, कैलालीइ ९, लमजुङय् ८, झापा, यल व दाङय् ७÷७ म्ह, रुपन्देही व सर्लाहीइ ६÷६ म्हेसित संक्रमण पुष्टि जुगु दु।

प्रधानमन्त्री शेरबहादुर देउवां राजनीतिक आन्दोलनपाखे वंगु उपलब्धिया रक्षायासे देशयात समृद्ध दयकेत सरकार क्रियाशील जुगु धका धयादीगु दु।

थुगु ज्या सकसिगु सकारात्मक ग्वाहलि माः धका धयादीगु खः। ७२ क्वःगु प्रजातन्त्र दिवसया लसताय् थौं सैनिक मञ्च टुँडिखेलय् जुगु विशेष समारोहय्  सम्बोधन यासे प्रधानमन्त्री देउवां धयादीगु दु, ‘वर्तमान सरकार, प्रतिपक्ष दल, नागरिक समाज, निजी तथा सहकारी क्षेत्र, दातृ निकाय सकसिगु कुतलं देशय् समृद्ध व सुशासनया लँपुइ न्ह्यने यकेत प्रतिबद्ध दु।’

प्रधानमन्त्री देउवां स्थानीय, प्रदेश व संघीय तहया चुनावयात निष्पक्ष, स्वतन्त्र व भयरहित वातावरणय् सम्पन्न जुइमाः धका बःबियादीगु खः।

२००७ सालया राजनीतिक क्रान्तिनिसे २०४६ साल, २०६२÷६३ या जनआन्दोलन लगायतया कारण राजनीतिक रुपं देशय् तधःगु ह्यूपाः वःगु व झीसं स्वतन्त्र देशया सम्मानित सार्वभौम नागरिक जुगु स्मरण न वयकलं यानादीगु दु।