बागमती प्रदेश सरकारया नेतृत्वय् नेकपा एकीकृत समाजवादी व नेपाली कांग्रेसं पालंपाः यायेगु सहमति जुगु दु।

बिहीबाः प्रदेशसभाय् विपक्षी गठबन्धनदुपि नेकपा माओवादी केन्द्र, नेपाली कांग्रेस, नेकपा एकीकृत समाजवादी व जनता समाजवादी दलया बैठकं प्रदेशसभाया कार्यकालं बच्छि बच्छि ई सरकारया नेतृत्व यायेगु सहमति याउगु दु।

नेपाली कांग्रेस बागमती प्रदेश संसदीय दलया प्रमुख सचेतक राधा घले न प्रदेशसभाया ल्यःदनिइगु कार्यकाल एकीकृत समाजवादी पार्टीया राजेन्द्र पाण्डेयात मुख्यमन्त्रीइ समर्थन यायेगु बाँकीगु बच्छि कार्यकाल कांग्रेसया ईन्द्रबहादुर बानियाँ मुख्यमन्त्री जुईगु सहमति जुगु दु।

लुँया भाः थौं स्वसः थहावंगु दु।

थौं तोलां लुँया भाः ९१ हजार ७ सय रुपैयाँ तोके याउगु दु धका नेपाल सुनचाँदी व्यवसायी महासङ्घं धाउगु दु।

अथेहे वहः तोलां २५ रुपैयाँ थहावगु दु। थौं नीन्यातका थहावना तोलाया १२ सय ६० रुपैयाँ कारोबार जुगु दु धका नेपाल सुन चाँदी व्यवसायी महासङ्घं धाउगु दु।

म्हिगः शेयर बजाःया परिसूचक नेप्से थहा वंसा थौं धासा हाकनं कुहावंगु दु।

कारोबार जुइगु वाःया थौं लिपागु दिं नेप्से १४ दशमलव ७ अङ्कं कुहावया २ हजार ५५६ दशमलव ९५ विन्दुइ कुहावंगु खः। थौं म्युचल फन्ड व मेमेगु बाहेक दक्को समूहया शेयर कुहावंगु दु।

उत्पादन, व्यापार, जलविद्युत् व विकास बैङ्क समूहया शेयर तसक कुहावंगु दु। थौं २१६ गु कम्पनीया ६१ लाख ६ हजार कित्ता शेयर २ अर्ब ६३ करोड ३५ लाख रुपैयाँ शेयर कारोबार जुगु दु।

जोशी हाइड्रो व गुडवील फाइनान्स शेयर दकलय् अप्वो ५ प्रतिशतं घटे जुगु दु। समग्र बजार घटे जूसा मेरो माइक्रो फाइनान्स लघुवित्त कम्पनीया शेयर १० प्रतिशतं थहावंगु दु।

स्वास्थ्य मन्त्रालयया कथं थौं दकलय् अप्वो येँ १४७ म्हेसित कोरोना सक्रमण पुष्टि जुगु दु।

अथेहे, यलय् ५१म्ह, रुपन्देहीइ ३५म्ह, पाल्पाय् २६म्ह, कास्कीइ २५म्ह, चितवनय् २२म्ह, मोरङय् १८म्ह, ख्वपय् १६म्ह, मकवानपुरय् १३म्ह, तनहुँइ १२ म्ह व कैलालीइ १० म्हेसित कोरोना संक्रमण पुष्टि जुगु दु।

वंगु २४ घण्टाया दुने देयन्यक ५४५ म्हेसित कोरोना भाइरस संक्रमण पुष्टि जुगु दु।

६ हजार ५८६ म्हेसिगु पीसीआर परीक्षण याउगुलि ४७० म्ह व १ हजार ९६३ म्हेसिगु एन्टिजेन परीक्षण याउगुलि ७५ म्ह याना ५४५ म्हेति कोरोना भाइरसया संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाउगु दु।

अथेहे वंगु २४ घण्टाया दुने कोरोना संक्रमणं च्याम्ह सीउगु दु सा ७२६ म्ह कोरोनामुक्त जुगु दु। बिहीबाः थपे जुगु नाप नेपालय् कोरोना संक्रमित जूपिनिगु ल्याः ८ लाख ७ हजार ५२२ म्ह थ्यःगु दु।

थ्व नाप आःतक नेपालय् सीपिनिगु ल्याः ११ हजार ३२६ म्ह थ्यःगु दु सा ७ लाख ८४ हजार ८८१ म्ह संक्रमणमुक्त जुइ धुकुगु दु।