किपू नगरपालिकां वडा नं. १ या ज्याकू (लायकुलिइ च्वंगु) यात दरबार पहः वयेक न्हूगु छेँ दनेगु तातुनां टेण्डर समेत पिथने धुंकूगु दुु।

आः उगु थासय् किपूया ऐतिहासिक सम्पदा तलेजु देगः दुगुलिं उगु थासय् तलेजु देगः नं दयेकेमाः धकाः विरोधया सः थ्वयेवं वंगु छुं न्हि न्ह्यः किपू नगरपालिकां छगू अध्ययन दल दयेकाः तलेजु देगःया बारे अध्ययन याकेब्यूगु खः।

उगु हे अध्ययनया प्रतिवेदन मंगलवाः नगर प्रमुखया कार्यकक्षय् अध्ययन दलया कजि प्रयागमान प्रधानं नगर प्रमुखयात उगु अध्ययन प्रतिवेदन लःल्हाःगु दु।

अध्ययन प्रतिवेदनया लिच्वः कथं आः उगु थासय् तलेजु देगःसहित दरबार पहःवयेक छेँ दनीगु जूगु दु। उगु छेँय् वडा नं. १ या ज्याकू नं न्ह्याकीगु जूगु दु।

शेयर कारोबार मापक नेप्से परिसूचक थौं हाकन घटे जुगु दु। आइतबाः ७२ अंक घटे जुगु परिसूचक सोमबाः ३२ अंक थहावंगु खःसा मंगलबाः धासा ३७ दशमलव १८ अंकं घटे जुया २ हजार ५ सय ८ दशमलव ९० अंकय् कुहावंगु खः।

‘क’ वर्गया कम्पनीया कारोबार मापन याइगु सेन्सेटिभ इन्डेक्स न ६ दशमलव ८६ अंक घटे जुगु दु। नेप्से परिसूचकनाप शेयर कारोबार रकमय् न कम जुगु खने दु। सोमबाः साढे ४ अर्ब स्वया च्वय् शेयर कारोबार जुगुलि मंगलबाः ३ अर्ब १२ करोडय् रोके जुगु खः। न्हिच्छि यक ४९ हजार ७४१ कारोबारपाखे २३१ कम्पनीया ८३ लाख ३० हजार ९३ कित्ता शेयर किनबेच जुगु खः। उकिइ शेयर कारोबार ३ अर्ब १२ करोड ८३ लाख ४१ हजार ७ सय रुपैयाँय् रोके जुगु खः।

म्युचुअल फण्ड न भचा थहावंगु दुसा दक्को समूहया अधिकांश कम्पनीया शेयर भाः घटे जुगु दु।

वंगु २४ घण्टाया दुने देयन्यक थप ३१५ म्हेसित कोरोना संक्रमण पुष्टि जुगु दु।

९ हजार ३ सय ८६ म्हेसिगु पीसीआर परीक्षण याउगुलि २७२ म्ह व २ हजार ४ सय २४ म्हेसित एन्टीजेन परीक्षण यागुलि ४३ म्ह याना ३१५ म्ह याना कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं निम्ह सीउगु दु सा ३०४ म्ह कोरोनामुक्त जुगु दु।

सभापतिया साझा उम्मेदवारया निति नेपाली कांग्रेसया संस्थापनइतर समूहया बैठक जारी जुगु दु।

चाक्सीबारीस्थित नेता प्रकाशमान सिंहया निवासय् बैठक च्वंगु दु। बैठकय् नेता रामचन्द्र पौडेल, महामन्त्री डा. शशांक कोइराला, कोषाध्यक्ष सीतादेवी यादव, प्रकाशमान सिंह, डा.शेखर कोइराला, बलबहादुर केसी, महेश आचार्य, दीपक गिरी, हृदयराम थानी, डा. मिनेन्द्र रिजाल, चन्द्र भण्डारी, रामकृष्ण यादवलगायत उपस्थित दुगु खः।

संस्थापनइतरपाखे वरिष्ठ नेता रामचन्द्र पौडेल, महामन्त्री डा. शशांक कोइराला, पूर्वमहामन्त्री प्रकाशमान सिंह व नेता डा. शेखर कोइराला सभापतिया आकांक्षीपि खः। आः सभापति नाप पदाधिकारी टिम गुकथ दयकेगु धइगु विषय छलफल जुयाच्वंगु दु।

निर्वाचन आयोगं वइगु माघ १२ गते जुइगु राष्ट्रिय सभा सदस्य निर्वाचनया लागि निर्वाचन तालिका व कार्यक्रम स्वीकृत याउगु दु।

आयोगया सहसचिव नाप प्रवक्ता शालिग्राम शर्मा पौडेलया कथं पुस २० गते उम्मेदवारी दर्ता यायेगु ज्याझ्वः तःगु दु। २१ गते उम्मेदवारीइ दाबी विरोधया उजुरी बिइगु, २२ व २३ गते उजुरीइ जाँचबुझ निर्णय यायेगु, २४ गते उम्मेदवारं नां लित कायेगु व २५ गते उम्मेदवारया अन्तिम नामावली प्रकाशन यायेगु कार्यतालिका दयकूगु दु।

उगु दिं उम्मेदवारयात निर्वाचन चिं लल्हायेगु व तोके याउगु मतदान केन्द्रय् माघ १२ गते सुथय् ९ बजेनिसे ३ बजे तक मतदान जुइगु धका आयोगं धाउगु दु। थ्व स्वया न्ह्यः निर्वाचनय् ब्बति कायेत दलपिन्त पुस १ गतेनिसे १० गते तक दल दर्ता यायेगु ई बिउगु खः।