प्रधानन्यायाधीश चोलेन्द्र शमशेर राणायात पद त्वःतेत प्यखेरं दबाब लाःगु दु ।

सर्वोच्च अदालतदुने याकःचा जुयादीम्ह राणायात नेपाल बार एशोसियसननिसें पूर्व प्रधानन्यायाधीश व वरिष्ठ अधिवक्तापिन्सं न पद त्वःतेत दबाब ब्यूगु दु । सर्वोच्च अदालतय् आः दुपिं २०म्ह मध्ये १३म्ह न्यायाधीशत, प्रधानन्यायाधीश जबरां राजीनामा बीमाःगु पक्षय् दु ।

राणाया ज्यापहलं न्यायालयया निष्पक्षता व विश्वसनीयताय् न्ह्यसः ब्वलंगु धासें इमिसं प्रधानन्यायाधीस राणायात दबाब ब्यूगु खः । राणाया राजीनामा फ्वंपिं न्यायाधीशत मध्ये दीपक कार्की, मीरा खडका, हरिकृष्ण कार्की, विश्वम्भर श्रेष्ठ, आनन्दमोहन भट्टराई, प्रकाशमान सिंह राउत, बमकुमार श्रेष्ठ, टंकबहादुर मोक्तान, प्रकाशकुमार ढुंगाना, सुष्मालता माथेमा, हरि फुयाँल, कुमार रेग्मी, मनोजकुमार शर्मा व नहकुल सुवेदी दु ।

प्रधानन्यायाधीशं सःतूगु फुल कोर्टय् न मवनेगु अडान काःपिं इमिसं थौं प्रधानन्यायाधीश राणायात नापलानाः पद त्वःतेत औपचारिक रुपय् इनाप याइगु जूगु दु ।

पद त्वःतेत प्यखेरं दबाब लाःसां प्रधानन्यायाधीश राणां आःतक राजीनामा मबीगु अडान कयाच्वंगु दु ।

भारत जुयाः अफगानी शरणार्थीत नेपाः दुहाँवयेगु झ्वः न्ह्याःगु दु ।

अफगानिस्तानय् तालिवान शासन सुरु जुइवं अनं बिस्युवःपिं अफगानी नागरिक भारत जुयाः नेपाः दुहाँवयेगु झ्वः अप्वःगु खनेदु । भारतय् नक्कली भ्वँ दयेकाः इपिं नेपाः दुहाँवयाच्वंगु धागु दु ।

अथेहे, सरकारं परिचयपत्र मदुपिन्त कोठा बालं मबीत इनाप याःगु दु । विदेशी नागरिकत सीमा नाकां घूसपैठ यानाः नेपालय् दुहाँवयाः च्वनेगु यानाच्वन धइगु खँ सीवं गृहमन्त्रालयं विज्ञप्ति हे जारी यानाः अन्यागु इनाप याःगु खः ।

सोमवाः ११म्ह अफगान नागरिकतय्त येँया सिनामंगलं नियन्त्रणय् काःगु दु ।

“छगु वडा, छगु पार्क” नीति अनुरुप येँ महानगरपालिका छन्हू हे वडा ३२ यु निगू पार्कया शिलान्यास याःगु दु ।

येँ महानगरपालिका प्रमुख विद्यासुन्दर शाक्यं थ्यंमथ्यं ४गू रोपनी ११ आनाय् “बागमती दोभान” व “अमरावती” याना निगू पार्कया शिलान्यास यानादिगु खः ।

ज्याझ्वलय् प्रमुख शाक्यं तःधंगु व चीधंगु याना येँ महानगरपालिकाय् ५०गू सिबें अप्वः पार्कया देयेकेज्या जुयाच्वंगु धयादिल । सार्वजनिक जग्गाया संरक्षण याय्गु, हरियालीया थपू यायेगु व स्थानीयपिनिगु ब्वतिइ संरक्षणया जिम्मा नं उपिन्त हे बिइकथं प्रत्येक वडाय् म्होतिइ छगू पार्क निर्माण यायेगु अभियान न्ह्याकागु, मेयर शाक्यं न्ह्यथनादिल ।

वय्कलं, गलिखे जमिन गुथीया नामय् जुयाच्वंगुलिं पार्क निर्माण यायेगु व हरियाली कायम यायेगु ज्याय् पंगु ब्वंलना च्वंगु धयादिल । व्यावसायिक भवन तं आः निजी क्षेत्रपाखें यक्वः हे दयेकेज्या जुयाच्वंगु दु, गुथीया जमिनय् व्यावसायिक भवन आवश्यक मदु, अन पार्क निर्माण जुइमाःगु नं ज्याझ्वलय् मेयर शाक्यं धयादिल ।

ज्याझ्वलय् उपमेयर हरिप्रभा खड्गी श्रेष्ठं बागमती खुसि सिथय् पार्क व हरियाली यायेत बागमती सभ्यता एकीकृत विकास समितिइ जम्मा जूगु राजस्व पर्याप्त जूगु उल्लेख यानादिसें थुकियात कार्यान्वयन यायेमाःगलिइ बः बियादिल ।

वय्कलं महानगरपालिकां न्ह्याकूगु सार्वजनिक जग्गा संरक्षण व हरियालि विकास यायेगु नीति व्यवहारिक कथं हे न्ह्याःगु धयादिल । वय्कलं महानगर दुने पार्क दयेकेत सम्भवय् मजुइधुंकूलिं बाहिरी शहरय् गन सम्भव दु अन अन पार्क दयेकेत इनाप यानादिल ।

बागमती दोभान पार्क थ्यंमथ्यं ११ आनाय् ६७ लखःया लागतय् निर्माण जुइत्यंगु दु धाःसा करिब प्यंगु रोपनी निर्माण जुइगु अमरावती पार्क ९०गू लखया लागतय् निर्माण जुइत्यंगु खः ।

 

नेपाल कम्युनिष्ट पार्टी (एमाले) या झीक्वःगु महाधिवेशनया उलेज्या नारायणी खुसिया सिथय् नारायणगढ व बन्द सत्र सौराहाय् जुइगु दु।

वइगु मङ्सिर १० निसे १२ गतेतक जुइगु महाधिवेशनया लागि जिल्लां निगु थाय् सिफारिस याउगु दु। एमाले चितवनया अध्यक्ष पार्वती रावलं महाधिवेशनया तयारी सुरुआत जुइ धुकगु जानकारी बिउगु दु।

थुकिया लागि थाय् स्थलगत अवलोकन यायेगु ज्या जुगु दु। वयकलं धाउगु दु, “महाधिवेशनया यलेज्या जुइगु नारायणी खुसिइ सिथय् व बन्द सत्र सौराहा जुइगु कथं केन्द्रयात थौं सिफारिस छ्वयेत्यनागु दु।” 

वंगु मोहनिया इलय् मनमानेश्वरी भवानी जात्रा व पायः जात्रा सफलता पूर्वक क्वचाःगु लसताय् महालक्ष्मीस्थानय् छगू विशेष पुजा जुगु दु।

मोहनिया कौलाथ्व सप्तमि (फुलपाति) निसें कौलाथ्व एकादशि कुन्हु तक न्ह्याःगु भवानी व पायः जात्रा सफलतापूर्वक क्वचाःगु लसताय् महालक्ष्मी द्यःयाथाय् विशेष पुजा यासें प्रसाद वितरण याःगु खः।

उगु ज्याझ्वलय् मनमानेश्वरी भवानीया मूछेँ आगंछेँया मू गुथिया साम्राज्यदेव श्रेष्ठं जात्रा संचालन यायेत विशेष ग्वाहालि याःगु धासें गुथि संस्थानया प्रमुख प्रशासक किरण शाक्य व यल महानगरपालिका १६ वडाअध्यक्ष निर्मलरत्न शाक्ययात मतिनाया चिं न लःल्हागु खः।

अथेहे मूर्तिकार नरेशमान शाक्यं मू गुथ्याः श्रेष्ठलिसें थुगुसीनिसें जात्राय् दुथ्यानादीम्ह सुनिल श्रेष्ठ व सुहेल श्रेष्ठयात नं मतिनाया चिं लःल्हानादीगु खः ।

ज्याझ्वलय् यल महानगरपालिकाया प्रमुख चिरिबाबु महर्जन, उपप्रमुख गीता सत्याललिसें विशिष्टि व्यक्तित्वपिनिगु उपस्थिति दुगु खः ।