वंगु २४ घण्टाया दुने देयन्यक ३ सय १८ म्हेसित (कोभिड–१९) कोरोना भाइरसया सङ्क्रमण पुष्टि जुगु दु।

पीसीआर, एन्टिजेन व आरडीटी याना ७ हजार ७ सय ४३ म्हेसित नमुना परीक्षण याउगुलि ३ सय १८ म्ह सङ्क्रमण पुष्टि जुगु दु धका स्वास्थ्य तथा जनसङ्ख्या मन्त्रालयं धाउगु दु।

वंगु २४ घण्टाय् ५ सय ६२ म्ह कोरोना सङ्क्रमणमुक्त जुगु दु। आः नेपालय् ९ हजार ६ सय ७८ म्ह कोरोनाया सक्रिय सङ्क्रमितपि दु।

थौं बुधबाः सेयर बजाः नेप्से परिसूचक ५८ दशमलव ९९ अंकं घटे जुया २ हजार ६ सय ६१ दशमलव ४४ अंकय् कुहावंगु दु।

‘क’ वर्गया कम्पनी याइगु कारोबार मापन सेन्सेटिभ इन्डेक्स न १० दशमलव ३६ अंक घटे जुगु दु। नेप्से परिसूचक घटे जूसा सेयर कारोबार रकम धासा म्हिगः स्वया सुधार जुगु दु।

बुधबाः ३ अर्ब कारोबार जुगु खःसा बिहीबाः कारोबार रकम ४ अर्ब स्वया अप्पोगु दु। न्हिच्छियक ६५ हजार ११ कारोबारपाखे २२९ कम्पनीया ८४ लाख ९० हजार ६८९ कित्ता सेयर किनबेच जुगु खः।

उगु कारोबार रकम ४ अर्ब २९ करोड ३८ लाख ६४ हजार १९२ रुपैयाँ थ्यंगु खः। बिहीबाः यक्को घटे जुगु फाइनान्स कम्पनीपि खनेदु।

फाइनान्स कम्पनीपिनिगु सब इन्डेक्स ३ प्रतिशत स्वया अप्पो घटे जुगुलि हिमालयन जनरल इन्स्योरेन्स न्हापागु दु थासय् लाउगु दु।

सत्तारुढ नेपाली कांग्रेस व नेकपा एमालेया शीर्ष नेतापि दथुइ छलफल सुरु जुगु दु।

अमेरिकी सहयोग परियोजना एमसीसीबारे सत्तारुढ गठबन्धन दथुइ सहमति जुइमफुगुलि प्रधानमन्त्री शेरबहादुर देउवानाप निगु दलया नेतापि दथुइ छलफल सुरु जुगु खः।

संसद भवन, न्हुगु बानेश्वरय् एमाले अध्यक्ष केपी शर्मा ओलीया कार्यकक्षय् छलफल एमाले वरिष्ठ उपाध्यक्ष ईश्वर पोखरेल, एमाले संसदीय दलया उपनेता सुवास नेम्वाङ, कांग्रेस महामन्त्री गगनकुमार थापा, सञ्चारमन्त्री ज्ञानेन्द्रबहादुर कार्की लगायतया नेतापिनिगु न सहभागी दुगु खः।

प्रतिनिधिसभाया बैठक च्वने न्ह्यः सत्तासाझेदार दल दथुइ नेकपा (माओवादी केन्द्र)या अध्यक्ष पुष्पकमल दाहाल ‘प्रचण्ड’ व नेकपा (एकीकृत समाजवादी) या अध्यक्ष माधवकुमार नेपाल दथुइ भेटवार्ता जुगु दु।

बिहीबाः सिंहदरबारय् एकीकृत समाजवादीया संसदीय दल कार्यालयय् जुगु भेटवार्ताय् प्रचण्ड व नेपालनाप माओवादीया नेतापि नारायणकाजी श्रेष्ठ, देव गुरुङपि न सहभागी जुगु खः।

प्रतिनिधिसभाया बैठक न्हिनसिया १ बजे च्वनेत्यंगु खः। थौंया बैठकय् अमेरिकी सहयोग परियोजना (एमसीसी) सम्झौतय् छलफल याइगु सम्भावित कार्यसूची दु।

थौं नेतापि दथुइ एमसीसीया विषय छलफल जुइ धका धाउगु खः।

प्रतिनिध सभाया बैठकय् थौं बिहीबाः च्वननिइगु जुगु दु।

मिलेनियम च्यालेन्स कर्पोरेसन (एमसीसी) नेपाल कम्प्याक्ट संसदय् टेबल जुया स्थगित जुगु संसद बैठक थौं च्वनेत्यःगु खः।

थौंया बैठकय् मुख्य एजेण्डा अमेरिकी सहयोग परियोजना एमसीसी नेपाल कम्प्याक्ट हे जुइ। संघीय संसद सचिवालयं बुधबाः सार्वजनिक याउगु प्रतिनिधिसभाय् सम्भावित कार्यसूचीइ एमसीसी सम्झौता छलफल जुइ धका उल्लेख याउगु दु।

वंगु आइतबाः प्रतिनिधिसभा बैठकय् सञ्चार तथा सूचना प्रविधिमन्त्री ज्ञानेन्द्रबहादुर कार्की न एमसीसी सम्झौता पेस याउगु खः।

एमसीसीबारे छलफल सुरु जुइगुलि नेपाली कांग्रेसं थःपि सांसदपिन्त अनिवार्य उपस्थितिया लागि निर्देशन तक बिउगु दु।