पूर्वाधार विकास बैंक न ऊर्जा ऋणपत्र जारी याये फइगु जुगु दु।

नेपाल राष्ट्र बैंकं बिहीबाः मौद्रिक नीतिया अर्धवार्षिक समीक्षा यासे थथे व्यवस्था याउगु खः।

पूँजी बजार क्षेत्रया नियमनकारी निकाय नेपाल धितोपत्र बोर्डया अध्यक्षय् रमेश हमाल नियुक्त जुगु दु।

बिहीबाः च्वंगु मन्त्रिपरिषद् बैठकं हमालयात बोर्ड अध्यक्षय् नियुक्त जुगु दु धका छम्ह मन्त्रीं जानकारी बिउगु दु। राष्ट्रिय योजना आयोगया उपाध्यक्ष विश्वनाथ पौडेल संयोजकत्वय् छनोट समितिं बोर्ड अध्यक्षय् स्वम्हेसिगु नां सिफारिस याउगु खः।

छनोट समितिं हमालनाप नेपाल राष्ट्र बैंकया पूर्व कार्यकारी निर्देशक डा. गोपाल भट्ट व बोर्डया हे कार्यरत कृष्ण पोखरेलया नां सिफारिस याउगु खः। सर्वोत्तम सिमेन्टया सेयर खरीद प्रकरण मुछे जुइवं तत्कालिन अध्यक्ष भीष्मराज ढुंगानायात सरकारं पदमुक्त याउगु खः।

नेपाल स्टक एक्सचेञ्जया प्रमुख कार्यकारी अधिकृत व बोर्ड अध्यक्षय् सत्ता साझेदार प्रमुख दल नेपाली कांग्रेस व नेकपा माओवादी केन्द्र दथुइ सहमति जुइवं बोर्ड अध्यक्ष नियुक्ति प्रक्रिया न्हयाकूगु खः। प्रधानमन्त्री शेरबहादुर देउवाया चाहे जुगु कथं हमाल अध्यक्ष नियुक्त जुगु अनुमान याउगु दु।

वंगु २४ घण्टाय् देयन्यक थप ५७० म्ह कोरोना संक्रमण पुष्टि जुगु दु।

अथेहे थौं थप खुम्हेसिगु ज्यान वंगु दु। स्वास्थ्य तथा जनसंख्या मन्त्रालयया कथं देयन्यक ९ हजार ७८९ म्हेसिगु नमुना परीक्षण याउगु खः ।

७ हजार २८ म्हेसिगु पीसीआर परीक्षण याउगुलि ३६४ म्ह व २ हजार ७६१ म्हेसिगु एन्टीजेन परीक्षण याउगुलि २०६ म्ह याना ५७० म्हेसित संक्रमण पुष्टि जुगु दु।

अथेहे वंगु २४ घण्टाय् १ हजार ९९३ म्ह संक्रमणमुक्त जुगु दु। अथेहे स्वनिगलय् थप १९९ म्ह कोरोना संक्रमितपि थपे जुगु दु। उकि मध्ये येँ १६२, यलय् २५ व ख्वपय् १२ म्हेसित संक्रमित जुगु दु धका मन्त्रालयं धाउगु दु।

स्थानीय तह निर्वाचनया लागि निर्वाचन आयोगय् थप स्वगू दल दर्ता जुगु दु।

थ्व नाप आयोगय् दर्ता जुगु दलया ल्याः १०६ थ्यंगु दु। थौं बिहीबाः जुगु पत्रकार सम्मेलनय् आयोगया प्रवक्ता शालिग्राम शर्मा पौडेलं लिपागु इलय् आयोगय् जनता प्रगतिशील पार्टी नेपाल, सामाजिक एकता पार्टी व नागरिक उन्मुक्ति पार्टी दल दर्ता जुगु जानकारी बिउगु दु।

सरकारं वैशाख ३० गतेया लागि स्थानीय तहया निर्वाचन घोषणा याउगुलि आयोगं दल दर्ताया लागि आह्वान याउगु खः। दल दर्ताया लागि फागुन १५ गते तक ई तोके  याउगु खः।

आयोगं जनशक्ति व्यवस्थापन निर्देशिका २०७८ स्वीकृत गरी पालिकास्तरय् कार्यरत कर्मचारीपिन्त उगु हे पालिकाया निर्वाचन अधिकृतया कार्यालय परिचालन यायेगु व्यवस्था याउगु दु।

सत्तारुढ न्यागु दलीय गठबन्धनया बैठक सुरु जुगु दु।

प्रधानमन्त्री निवास बालुवाटारय् सुरु जुगु बैठकय् अमेरिकी सहयोग परियोजना एमसीसीबारे छलफल जुइ धका छम्ह नेतां धाउगु दु।

प्रधानमन्त्री शेरबहादुर देउवा एमसीसी अनुमोदनया लागि संसदय् पेश यायेमाःगु अडानय् दु। तर माओवादी केन्द्र व एकीकृत समाजवादीं संसदय् अवरोध कायम दुगुनि एमसीसी टेबल यायेमज्यु धका धाउगु खः।

सरकारं जबरजस्ती न्ह्यने यकूसा सरकार त्वतिइगु धका माओवादीं चेतावनी बिउगु खः।