स्थानीय तहया जनप्रतिनिधिपिन्स पदय् बहाल जुगु अवस्थाय् उम्मेदवार बिइ मदइगु जुगु दु।

पदपाखे राजीनामा बिया जक उम्मेदवार जुइ दइगु जुगु दु। स्थानीय तह निर्वाचन ऐनय् दुगु व्यवस्थाय् आयोगं निर्वाचन आचार संहिताय् न समावेश याउगु दु।

आचारसंहिताया मस्यौदाय् बहालवाला जनप्रतिनिधिपिन्स स्थानीय तहया निर्वाचनय् उम्मेदवार जुइ मदइगु व्यवस्था दु। स्थानीय तह निर्वाचन ऐन, २०७३ या दफा १३ या स्वगु तहमध्ये छु न स्वामित्व, नियन्त्रण वा अनुदान काये दइगु कथं पदय् बहाल दुम्ह वा संस्थापाखे पारिश्रमिक काइम्ह मनूखं उम्मेदवार जुइ मदुइगु व्यवस्था दु।

उगु व्यवस्था कथं आचारसंहिताय् राजीनामाया व्यवस्था याउगु दु। 

वंगु २४ घण्टाया दुने देयन्यक थप ६३९ म्हेसित कोरोना संक्रमण पुष्टि जुगु दु।

अथेहे कोरोना सक्रमणं स्वम्हेसिगु ज्यान वंगु दु। स्वास्थ्य तथा जनसंख्या मन्त्रालयया कथं देयन्यक ९ हजार ७५६ म्हेसिगु नमुना परीक्षण याउगु खः।

६ हजार ७८२ म्हेसिगु पीसीआर परीक्षण यासे ५४८ म्ह व २ हजार ९७४ म्हेसिगु एन्टीजेन परीक्षण याउगुलि १८५म्ह याना ६३९ म्हेसित कोरोना संक्रमण पुष्टि जुगु दु।

अथेहे वंगु २४ घण्टाय् १ हजार ६०० म्ह संक्रमणमुक्त जुगु दु। स्वनिगलय् थप २२६ म्ह कोरोना संक्रमितपि थपे जुगु दु। उकि मध्ये येँ १६२ म्ह, यलय् २५ म्ह व ख्वपय् १२ म्ह संक्रमित जुगु दु धका मन्त्रालयं धाउगु दु।

ईमर्जिङ नेपाल लिमिटेडया साधारण सेयर (आईपीओ) ५१ हजार ६७० म्हेसित १० कित्ताया दरं लाउगु दु।

आवेदकपि मध्ये बुधबाः याउगु गोला प्रथां ५१ हजार ६७० म्हेसित १० कित्ताया दरं व थुकि मध्ये च्याम्हेसित ११ कित्ताया दरं आईपीओ ल्हातय् लाउगु खः।

कम्पनीया आईपीओय् २३ लाख ३१ हजार २५८ म्हेसिगु आवेदकपाखे २ अर्ब ६४ करोड ३० लाख ३३ हजार रुपैयाँ बराबरया २ करोड ६४ लाख ३० हजार ३३० कित्ता सेयरया लागि आवेदन लाउगु खः।

कुल आवेदक मध्ये २ हजार ५५२ म्हेसिगु आवेदन रद्द जुगु बिक्री प्रबन्धक एनआईसी एशिया क्यापिटलं जानकारी बिउगु खः। क्यापिटलया कथं २३ लाख २८ हजार २०६ म्ह योग्य आवेदकपाखे २ करोड ६४ लाख १ हजार ९७० कित्ता आईपीओ माग जुगु खः।

५१ हजार ६७० म्हेसिया १० कित्ताया दरं ५ लाख १६ हजार ७०० कित्ता सेयर लाउगु खःसा बाँकी दुगु ८ कित्ता थुपि मध्ये च्याम्हेसिया थप १÷१ कित्ताया दरं सेयर ल्हातय् लाउगु खः।

बेलायतया लागि नेपाली राजदूत ज्ञानचन्द्र आचार्य न पद व गोपनीयताया शपथ काउगु दु।

बुधबाः राष्ट्रपति भवन शीतल निवासय् छगु समारोहय् आचार्ययात राष्ट्रपति विद्यादेवी भण्डारीं पद व गोपनीयताया शपथ बिउगु खः।

उगु समारोहय् परराष्ट्रमन्त्री डा.नारायण खड्का लगायत सरकारया उच्च पदाधिकारीपिनिगु उपस्थिति दुगु खः थ्व स्वया न्ह्यः मन्त्रिपरिषदया सिफारिसय् राष्ट्रपति भण्डारीं वंगु माघ १४ गते आचार्ययात बेलायतया राजदूतय् नियुक्त याउगु खः।

नेकपा माओवादी केन्द्रया नेता नारायणकाजी श्रेष्ठ न एमसीसीविरुद्ध प्रदर्शनय् सहभागी जुगु दु।

न्हुगु बानेश्वरय् भेला जुया प्रदर्शन यायेगु झ्वलय् पार्टी कार्यकर्तापि दथुइ श्रेष्ठ थ्यःगु खः। माओवादी केन्द्रया संसदीय दलया बैठकं एमसीसीया विपक्षय् निर्णय यायेवं श्रेष्ठ न प्रदर्शनय् सहभागी जुगु खः।

माओवादी केन्द्रया वाईसीएल, अखिल क्रान्तिकारी लगायतया भ्रातृ संस्थां थौं सुथनिसे न्हुगुबानेश्वरय् भेला जुया प्रदर्शन यानाच्वंगु खः।

उगु थासय् नेकपा एकीकृत समाजवादी, राप्रपा, विप्लव नेतृत्वया नेकपा, मोहन वैद्य नेतृत्वया नेकपा क्रान्तिकारी माओवादी लगायत न प्रदर्शन याउगु खः।

प्रहरी व प्रदर्शनकारीपि दथुइ झडप जुया  न्हुगु बानेश्वरय् तनावग्रस्त जुगु खः।