मुस्ताङया कोबाङ क्षेत्रय् हिमपहिरो वंगु दु। थौं आइतबाः न्हिनय् मानापाथी हिमालं हिमपहिरो वगु मुस्ताङया प्रहरी प्रमुख डीएसपी रामकुमार दानीं जानकारी बिउगु दु।

हिमपहिरोया कारण गुलि क्षति जुल धयागु सिमदुनि। हिमपहिरो वया भागदौड जुगुलि गुम्ह घाइते जुगु दु। मानापाथी हिमालया फेदी थासाङ गाउँपालिका– २ या जनआदर्श माविका शिक्षक व विद्यार्थीपि घाइते जुगु खः।

शेयर बजाःया परिसूचक नेप्से थौं आइतवाः सामान्य घटे जुगु दु। न्हिच्छियकं थहाकुहा वना नेप्से बन्द जुगु इलय् १ दशमलव ३८ अङ्कं घटे जुया २ हजार ६ सय ८८ दशमलव ९२ विन्दुइ कुहावंगु दु।

थौं बैंक, जलविद्युत्, जीवन बीमा व म्युचल फन्ड समूहया शेयर घटे जुगु दु सा मेमेगु समूहया शेयर सामान्य थहावंगु दु। २ सय ३० कम्पनीया ७४ लाख ३४ हजार कित्ता शेयर ४ अर्ब ९करोड रुपैयाँया कारोबार जुगु दु।

दकलय् अप्वो महालक्ष्मी विकास बैंकया २७ करोड ३९ लाख रुपैयाँया शेयर किनबेच जुगु दु। अथेहे एचआईडीसीएलयो शेयर दकलय् अप्वो १० प्रतिशतं घटे जुगु दु।

समग्र बजार घटे जूसा बोटलर्स नेपाल, तेह्रथुम पावर कम्पनी व मानुषी लघुवित्त कम्पनीया शेयर १० प्रतिशतं थहावंगु दु।

विवेकशील साझा पार्टीया सचिवालय सदस्य महेश भण्डारीनाप गण्डकी प्रदेशया १३ म्हेसिया पार्टीपाखे राजीनामा बिउगु दु।

पार्टीया गण्डकी प्रदेश संयोजकतक जुयादीम्ह भण्डारीं १७ साउनय् राजीनामा बिउगु खःसा थप १२ म्हेसिया मंकाः राजीनामा बिउगु दु।

राजीनामा बिउपि पार्टीया केन्द्रीय अभियान विभाग सदस्य तक जुयादीम्ह केन्द्रीय सदस्य दीपक पौडेल, पार्टी व युवा संगठनया केन्द्रीय सदस्य प्रकाश आचार्य, गण्डकी प्रदेश सदस्य नाप अभियान विभाग प्रमुख अशोक खड्का, गण्डकीया प्रदेश सदस्य नाप कार्यालय व्यवस्थापन प्रमुख सुदीप ओझा, पदम न्यौपाने व तनहुँ जिल्ला संयोजक नाप गण्डकी प्रदेश सदस्य सागर घिमिरेपि खः।

अथेहे युवा संगठनया केन्द्रीय सदस्य मनिषा मगर, व्यास नगर संयोजक नाप प्रदेश सदस्य सलमान अलि, युवा संगठनया केन्द्रीय सदस्य महेन्द्र आचार्य, स्याङ्जा जिल्ला संयोजक भीमनारायण कोइराला, बाग्लुङ जिल्ला संयोजक सुरज श्रेष्ठ व म्याग्दी जिल्ला संयोजक विश्वराज अछामेपिन्स न राजीनामा बिउगु दु।

आइतबाः छगु विज्ञप्ति जारी यासे उमिस अध्यक्ष रवीन्द्र मिश्रया प्रस्तावय् असहमति प्वकूगु खः।

वंगु २४ घण्टाया दुने देयन्यक ३०६ म्हेसित कोरोना भाइरस संक्रमण पुष्टि जुगु दु।

८ हजार ८ म्हेसिगु पीसीआर परीक्षण याउगुलि २९१ म्ह व १ हजार ५ सय ९८ म्हेसिगु एन्टिजेन परीक्षण याउगुलि १५ म्ह याना मुक्क ३०६ म्हेसित कोरोना भाइरसया संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।

अथेहे वंगु २४ घण्टाय् कोरोना संक्रमणं खुम्ह सीउगु दु सा ३४८ म्ह कोरोनामुक्त जुगु दु।

सरकारं मंसीर १ निसें विद्युतीय राहदानीया परीक्षण न्ह्याकीगु जूगु दु ।

अंग्रेजी न्हूदँ २०२२ निसें नेपालय् औपचारिक रूपं प्रचलनय् हयेत्यंगुलिं उकिया हे तयारी कथं परीक्षण वितरण न्ह्याकागु राहदानी विभागं न्ह्यथंगु दु । मङ्सिर १ निसें छुं वाः विभागपाखें हे विद्युतीय राहदानी इनेगु योजना दुगु विभागया निर्देशक अले प्रवक्ता शरदराज अरनं धयादिल  ।

व धुंकाः औपचारिक वितरण न्ह्याइगुलिसें प्रदेश अले जिल्ला स्तरय् विद्युतीय राहदानी वितरण याइ । उकिया लागिं थुगु इलय् विभाग अन्तिम तयारीइ जाःगु दु । विद्युतीय राहदानी इनेत प्राविधिक अले प्रशासनिक दक्वं तयारी लिपांगु चरणय् थ्यंगु धाःगु दु ।

विभागया कथं न्हापांगु चरणय् २० लख पाः विद्युतीय राहदानी छापे याइ । सरकारं पासपोर्टया डिजाइन स्वीकृति कायेधुंकाः न्हापांगु चरणया छपाइ क्वचायेधुंकूगु दु । उकिया प्रिन्ट धाःसा वितरणया इलय् नेपालय् हे यायेगु कथं प्राविधिक तयारी विभागं पूूवंकूगु दु ।

आईएसओ १९०३ मान्यता दुगु विश्वस्तरया हे प्रविधियुक्त स्वंगूगु पुस्ताया विद्युतीय राहदानी खः । विद्युतीय राहदानीया पोलिकार्बोनेट पाना दुने जडान यानातःगु डिजिटल चिप्सय् राहदानी बाहकया दक्वं विवरण सुरक्षित दइ ।

न्हूगु राहदानी इनेज्या न्ह्याःसां पुलांगु एमआरपी राहदानीया म्याद मफूनिपिनि हकय् म्याद दत्तले व हे राहदानीया हे मान्यता बी । तर वितरण न्ह्याये हे त्यंगुलिं पुलांगु राहदानीया म्याद फूपिन्सं नं छुं दिं पियाः विद्युतीय राहदानी हे कायेत विभागं इनाप याःगु दु ।

विद्युतीय राहदानीया लागिं नेपालय् दुपिं नेपाली नागरिकया हकय् राष्ट्रिय म्हसिका पौ अनिवार्य याःगु दु । विदेशय् दुपिं नेपाली नागरिकया हकय् नागरिकता नम्बरयात मान्यता बी ।