स्वास्थ्य तथा जनसंख्या मन्त्रालयया कथं स्वनिगलय् थौं थप ५२९९ म्हेसित कारोना संक्रमित पुष्टि जुगु दु।

मन्त्रालयया कथं थौं येँ जक ४२७९ म्हेसित कोरोना सक्रमित पुष्टि जुगु दु। अथेहे, ख्वपय् ४५३ म्ह व यलय् ५६७ म्हेसित कोरोना संक्रमित पुष्टि जुगु दु।

आःतक स्वनिगलय् ४२ हजार ५६ म्ह सक्रिय संक्रमितपि दु। उकि मध्ये येँ ३०६८८ म्ह, यलय् ७१४५ म्ह व ख्वपय् ४२२३ म्ह सक्रिय संक्रमितपि दु।

प्रधानमन्त्री शेरबहादुर देउवां स्वगूगु तहया निर्वाचनया पूर्वतयारी यायेत सम्बन्धित निकाययात इनाप याउगु दु।

थौं शुक्रबाः राष्ट्रया नामय् सम्बोधन यासे प्रधानमन्त्री देउवा अथे इनाप याउगु दु। न्यागु दलीय सत्ता गठबन्धनया छगु घटक नेकपा माओवादी केन्द्रया अध्यक्ष पुष्पकमल दाहाल प्रचण्डं स्थानीय तहया स्वया न्हापा प्रतिनिधिसभाया चुनाव यायेगु प्रस्ताव याउगु खः।

प्रचण्डया प्रस्ताव याउगु सम्बन्धय् वयकल छु न प्रतिक्रिया बिउगु मदु। तर, दच्छिया दुने स्वगूगु तहया निर्वाचन यायेमाःगु उल्लेख यासे वयकलं पूर्वतयारी यायेत सम्बन्धित निकाययात इनाप याउगु खः।

प्रधानमन्त्री शेरबहादुर देउवां आः देशबासीया नामय् सम्बोधन यानादीगु दु।

वंगु असार २९ गते प्रधानमन्त्री जुइ धुका थ्व देउवाया न्हापागु पटक देशबासीया नामय् सम्बोधन खः।

वंगु २४ घण्टाया दुने देयन्यक थप १० हजार ७०३ म्हेसित कोरोना संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं १८ हजार ६१८ म्हेसिगु पीसीआर परीक्षण याउगुलि ८ हजार ८१५ म्हेसित ४ हजार ४७४ म्हेसिगु एन्टीजेन परीक्षणय् १ हजार ८८८ म्हेसित याना १० हजार ७०३ म्हेसित कोरोना संक्रमण पुष्टि जुगु दु।

अथेहे वंगु २४ घण्टाय् स्वम्ह सीउगु दु सा ७६६ म्ह कोरोनामुक्त जुगु दु।

थौं शुक्रबाः थपे जुगु नाप नेपालय् कोरोना संक्रमित जूपि १० लाख ६ हजार ५९१ म्ह थ्यंगु दु।

स्वास्थ्य तथा जनसंख्या मन्त्रालयं निगुगु वा बुस्टर डोजया रुपय् न्हापा कयातःगु हे खोप कायेत इनाप याउगु दु।

मेगु खोप कायेगु इलय् म्ह्यय् फरक प्रतिक्रिया वयेफुगुलि थज्यागु सिफारिस यानागु धका मन्त्रालयया सहप्रवक्ता डा.समीरकुमार अधिकारीं धाउगु दु। वयललं धाउगु दु, ‘न्हापा छु खोप कयातइगु खः वहे कायेत सिफारिस यानागु दु। छगु खोप कयातःगुलि मेगु कायेत सिफारिस यानागु मदु।’

वयकःया कथं कोभिशिल्ड व अस्ट्रजेनेकाया खोपया बनावट छगु हे खः। उकिइ अस्ट्राजेनेकाया थासय् कोभिशिल्ड, कोभिशिल्डया थासय् अस्ट्रजेनिका कायेगु इलयु छु न फरक जुइमखु। तर कोभिशिल्ड वा अस्ट्रजेनेका कयातःपिन्स भेरोसेल कयातःपिन्त सरकारं सिफारिस मयानागु धका सहप्रवक्ता अधिकारीं  धाउगु दु। वयकलं धाउगु दु, ‘भ्याक्सिनं याइगु प्रतिक्रिया फरक जुइफु।

उकिइ म्ह्यय् दुने मेगु प्रतिक्रिया बिइफु । उकिइ सकसिया न्हापा कयातइगु खोप हे बिइ, वहे खोप हे अतिरिक्त मात्राया रुपय् कायेत न इनाप याये’