धरानया मेयर हर्क साम्पाङं पत्रकार गोपाल दाहालयात ख्याच्वः बिउसे पत्रकारिता सिधय्का बिइ धका धाःगु दु। साम्पाङं धम्की बिइ धुका पत्रकार दाहालं असुरक्षित महसुस जुगु दु धका धाःगु दु।

दाहालं खोज पत्रकारिता केन्द्र (खोपके)या निति ‘हर्क साम्पाङया मनमौजी शासन, बेथितीइ दलदलय् धरान’ शीर्षकय् बुखँ च्वंगु खः।

उगु बुखँय् हर्क साम्पाङ नक्कली माओवादी जूगु, तत्कालीन वाईसीएल कार्यकर्ता तय्स वयात नियन्त्रणय् कया दाःगु धका धयातःगु खः।

साम्पाङं थुकियात कया थौ सुथय् पत्रकार सम्मेलन यासे थःगु खँ तइगु जुगु दु।

चीनया प्रधानमन्त्री ली छयाङया ब्बनाय् चीनया औपचारिक भ्रमणय् झायाच्वनादीम्ह प्रधानमन्त्री केपी शर्मा ओलीं चिनियाँ कम्युनिस्ट पार्टी याःगु बेइजिङस्थित सङ्ग्रहालयय् अवलोकन यानादीगु दु।

प्रधानमन्त्रीया नापं भ्रमण दलय् दुथ्यापि सदस्य तय्स न उगु सङ्ग्रहालयया अवलोकन यानादीगु दु। चीनया जनवादी क्रान्तिनिसे आधुनिक चीनया विकास यात्रा तक थीथी पक्षबारे सङ्ग्रहालयय् दुथ्याकातःगु खः

चीनया प्यन्हु भ्रमण क्वचाय्का प्रधानमन्त्री केपी शर्मा ओली थौ बिहीवाः स्वदेश लिहावइगु ज्याझ्वः दु।

प्रधानमन्त्री ओलीयात चीनया उपपरराष्ट्रमन्त्री सुन बेइदोङं बेइजिङ क्यापिटल अन्तर्राष्ट्रिय विमानस्थलय् स्थानीय ई कथं थौ सुथय् ११ बजे बिदाइ बिइगु ज्याझ्वः दु।

प्रधानमन्त्री ओली नेपाःया ई कथै थौ न्हिनय् २ः३० बजे येँ वइगु ज्याझ्वः दु धका प्रधानमन्त्रीको सचिवालयं धाःगु दु।

नेपालभाषा मंकाः खलःया स्वक्वःगु तःमुँज्या जूगु दु।

नेवाः न्ह्यलुवाः लिसें मंकाः खलःया न्वकू मल्ल के सुन्दरया सभाध्यक्षताय् जूगु उगु तःमुँज्यां सर्वसम्मत कथं नायः पदय् रमेश मान पियायात ल्यःगु दु।

उगु तःमुँज्यां न्वकू पदय् बालकृष्ण प्रजापति, छ्याञ्जेय् राजा शाक्य, दांभरी अमेश बज्राचार्य ल्यःगु खः। अथेहे मू दुजलय् महेशमान डंगोल, माधवप्रसाद श्रेष्ठ, ज्ञानेन्द्र मानन्धर, प्रतापमान शाक्य व रविनदास मानन्धरयात ल्यःगु खः।

तःमुँज्याय् रामशरण डंगोलया अध्यक्षताय् निर्वाचन कमिटी नीस्वंगु खःसा उगु निर्वाचन कमिटीं थथे सर्वसम्मतिपाखें पदाधिकारी ल्ययेगु ज्या जूगु घोषणा याःगु खः।

नेपाल व चीन दथुइ बेल्ट एण्ड रोड इनिसियटिभ (बिआरआई) सहकार्यया खाकाय् थौं सम्झौता जूगु दु।

बेइजिङय् थौं जूगु सम्झौताय् नेपाःया पाखें परराष्ट्र मन्त्रालयया निमित्त सचिव अमृतबहादुर राई व चीनया पाखें नेशनल डेभलपमेन्ट एण्ड रिफर्म कमिसनया उपाध्यक्ष लि सुशें ल्हाःचिं तयादीगु खः।

चीनया प्रधानमन्त्री ली छयाङया मैत्रीपूर्ण ब्वनाय् प्रधानमन्त्री केपी शर्मा ओली चीनया औपचारिक भ्रमणय् वनाच्वनादीगु स्वन्हु कुन्हु थ्व सम्झौता जूगु खः। (रासस)