प्रधानमन्त्री सुशीला कार्कीलिसे नेपाःया निंतिं भारतीय राजदूत नवीन श्रीवास्तवं नापलागु दु।

सिंहदरबारया प्रधानमन्त्री नापं मन्त्रिपरिषदया ज्याकुथिइ थौं नापलायेगु झ्वलय् वय्कःपिं दथुइ निगू पक्षीय हित व थवंथः च्यूताःया थी थी विषय सहलह जूगु प्रधानमन्त्रीया सचिवालयं धाःगु दु।नापलायेगु झ्वलय् प्रधानमन्त्री कार्कीं आःया सरकारया प्रमुख कार्यदेश निर्वाचन यायेगु जूगुलिं उकिइ ग्वाहालिया निंतिं इनाप यानादिल।

उगु झ्वलय् राजदूत श्रीवास्तवं प्रधानमन्त्री कार्कीयात नेपाःया प्रधानमन्त्री पदय् नियुक्त जुयादीगुलिं भारतया प्रधानमन्त्री नरेन्द्र मोदीया भिंतुना सन्देश लःल्हानादिल। परराष्ट्र मन्त्रालयया कथं प्रधानमन्त्री मोदीया सन्देशय् नेपाल–भारत दथुइया मित्रता व ग्वाहालिया सम्बन्धयात अझ सुदृढ यायेत मिले जुयाः ज्या यायेगु प्रतिबद्धता प्वंकाः तःगु खः।

राजदूत श्रीवास्तवं भिंम्ह जःलाखला नातां नेपाःया आवश्यकता कथं भारतया ग्वाहालि दइगु प्रतिबद्धता प्वंकादिल। उगु झ्वलय् वय्कलं वइगु असोज २ गते भारतीय प्रधानमन्त्री नरेन्द्र मोदीं प्रधानमन्त्री कार्कीलिसे टेलिफोनं खँल्हाबल्हा यायेगु तयारी जूगु जानकारी बियादिल।

गृह मन्त्रालयं ‘जेनजी’ आन्दोलनया झ्वलय् मदुपिंत हनेकथं राष्ट्रिय शोक यायेत बुधबाः सार्वजनिक बिदा ब्यूगु दु।

मन्त्रालयया प्रवक्ता आनन्द काफ्लें थौं छगू विज्ञप्ति पितब्वयाः मन्त्रिपरिषद्या थ्व हे भदौ ३० गतेया निर्णयकथं कन्हय् सार्वजनिक बिदा बिइगु घोषणा याःगु जानकारी बियादिल। उ

गु विज्ञप्तिइ धयातःगु दु, “भदौ २३ व २४ गते जेनजी पुस्तापाखें याःगु प्रदर्शनया झ्वलय् मदुपिंत हनेकथं राष्ट्रिय शोक यायेत असोज १ गते बुधबाः नेपाःन्यंक सरकारी ज्याकुथि, विदेशया नेपाली दूतावास व नियोगय् सार्वजनिक बिदा बिइगु व राष्ट्रिय ध्वाँय् बच्छि क्वछुकेगु नेपाल सरकार (मन्त्रिपरिषद्)पाखें निर्णय जूगु बेहोरा सकसिगु नं जानकारीया निंतिं थ्व सुचं पिथनागु खः।”

सोमवाः शितलनिवासस्थित राष्ट्रपति कार्यालय स्वम्ह मन्त्रीतयेगु शपथ ग्रहण ज्याझ्वः जुगु खः।उगु ज्याझ्वलय् सभामुख देवराज घिमिरे व उपसभामुख इन्दिरा राना अनुपस्थित जुगु दु।

जेन–जी आन्दोलन लिपा निगु सार्वजनिक ज्याझ्वलय् खनेमदुगु दु। निन्हु न्ह्यः प्रधानमन्त्रीया शपथग्रहण व सोमवाः मन्त्रीतयेगु शपथय् उनी अनुपस्थित जुगु दु।

प्रधानमन्त्री सुशीला कार्की नेतृत्वया सरकारय् नवनियुक्त मन्त्रीतयेसं पद व गोपनीयताया शपथ ग्रहण याःगु दु। थौ सोमवाः शीतल निवासस्थित राष्ट्रपति भवनय् जूगु उगु ज्याझ्वलय् राष्ट्रपति रामचन्द्र पौडेलं पद व गोपनीयता शपथ ग्रहण याकूगु खः।

रामेश्वर खनाल अर्थमन्त्री, कुलमान घिसिङ ऊर्जा, जलस्रोत नाप सिंचाइ, भौतिक पूर्वाधार नाप यातायात, सहरी विकास मन्त्री व ओमप्रकाश अर्यालं गृह, कानुन नाप संसदीय मामिला मन्त्री पदया शपथ काउगु खः।

शपथ ग्रहण ज्याझ्वलय् उपराष्ट्रपति रामसहाय प्रसाद यादव, प्रधानमन्त्री कार्की, प्रधानन्यायाधीश प्रकाशमानसिंह रावत, राष्ट्रियसभा अध्यक्ष नारायण दाहाल, सुरक्षा निकायया उच्च पदस्थ अधिकारीपिनिगु ब्बति दुगु खः।

प्रधानमन्त्री सुशीला कार्कीया राजीनामा फ्वसें सुदन गुरुङया पुचः प्रधानमन्त्री निवास बालुवाटार न्ह्यने नाराबाजी याःगु दु।मन्त्री ल्येगु ज्याय् असन्तुष्टि प्वकूसे युवात चान्ह्य बालुवाटारय् वना नाराबाजी याःगु खः।

नाराबाजी यायेगु झ्वलय् उमिसं प्रधानमन्त्री सुशीला कार्कीया राजीनामा तक फ्वंगु खः। जेनजी आन्दोलनया झ्वलय् सीपिनिगु परिवारया सदस्य तक सुदन गुरुङया उपस्थितिइ ‘प्रधानमन्त्री राजीनामा ’, ‘मुर्दामाथि राजनीति नगर’ लगायतया नारा थ्वय् कूगु खः।

बालुवाटारस्थित प्रधानमन्त्री निवासया ३ नम्बर गेट न्ह्यने सुदन गुरुङं धाःगु दु, ‘दकलय् पावरफुल नेपाली जनता खः।सु ना नं जिमितं पने फइ मखु। गन थासय् यकां, उगु थासं पिकाय् फू।’सुदन नेतृत्वय् ‘हामी नेपाल’ पुचःया प्रस्तावय् सुशीला कार्की वंगु शुक्रवाः प्रधानमन्त्रीइ नियुक्त जूगु खः।

कार्कीं म्हिगः चान्ह्यः स्वम्ह मन्त्री नियुक्त यागु बुखँ सार्वजनिक जुगु खः।तर सुदनया पुचलं थःपिनापं सहलह मयासे मन्त्री नियुक्त यागु धासे असन्तुष्ट प्वकूगु खः।सुदन गुरुङं ओमप्रकाश अर्यालयात थःपिनापं सहलह मसासे गृहमन्त्री दयकेगुलि तं प्वकूगु खः।