प्रधानमन्त्री सुशीला कार्की नेतृत्वया सरकारय् सहभागी जुइपि स्वम्ह मन्त्रीया नां क्वछिइ धुकुगु दु।

प्रधानमन्त्री निवास बालुवाटार स्रोतया कथं, अर्थ मन्त्रालयय् रामेश्वर खनाल, गृहमन्त्रालय ओमप्रकाश अर्याल व ऊर्जा मन्त्रालय कुलमान घिसिङया नां क्वछिइ धुकुगु दु।गृहमन्त्री अर्यालं कानुन मन्त्रालयया तक जिम्मेवारी काइगु जुगु दु।

घिसिङयात ऊर्जा नापं भौतिक पूर्वाधार व यातायात, शहरी विकास मन्त्रालयया जिम्मेवारी ब्यूउगु दु। शपथ ग्रहण धाःसा कन्ह्य जक जुइ धका स्रोतं धाःगु दु।

प्रधानमन्त्री सुशीला कार्कीयात गृहमन्त्री माग यासे धरान उपमहानगरपालिकाया मेयर हर्क साम्पाङ प्रधानमन्त्री निवास बालुवाटारय् वःगु दु।साम्पाङ आइतवाः सुथय् ७ बजे प्रधानमन्त्री निवास बालुवाटार वःगु खः।

साम्पाङ प्रधानमन्त्री कार्कीयात नापलायेगु अनुमति फ्वःगु खः। बालुवाटारय् सुरक्षाकःमि तय्स साम्पाङयात सुरूइ दुहावनेत रोके याःगु खः।ताः ईलिपा साम्पाङयात नापलागु धका बालुवाटार स्रोतं धाःगु दु।

साम्पाङ सुथय् ७ बजेनिसे १ बजे तक बालुवाटारय् पियाच्वंगु खः। प्रधानमन्त्री कार्की न ई कया मवगुलि नापलाये मखु धका धाःगु खः। साम्पाङ नापमलास्ये लिहावनेमाःगु खः।

अथेहे, नेपाल प्रहरीया पूर्व आइजिपी सर्वेन्द्र खनाल न म्हिगः नापलायेगु निति प्रधानमन्त्री निवास बालुवाटारय् वःगु स्रोतं धाःगु दु।

जेनजीया विषय जुयाच्वंगु विवादया झ्वलय् ‘हामी नेपाली’ नां यागु संस्थां थौ आइतवाः रिपोटर्स क्लबय् जुगु छगु पत्रकार सम्मेलनय् ल्हाः ल्हाःतया ल्वापु जूगु दु।

पत्रकार सम्मेलनया झ्वलय् उगु संस्थाय सुदन गुरुङं थःगु खँ तया च्वंगु इलय् ल्याय्म्ह तयेगु दथुइ विवाद सुरु जुगु खः। उगु ज्याझ्वलय् सञ्चारकःमि तय्त न ल्हाः तयेवं स्थिति झन् तःच्वंगु खः।

अन ल्याय्म्हत थः दथुइ तक ल्वापु जुगु व पत्रकार सम्मेलनय् घुसपैठ जुगु धका आशङ्का याःगु खः।

जिल्ला प्रशासन ज्याकुथि येँं ज्याकुथिपाखें बिया वयाच्वंगु सेवायात न्हापाथें हे सञ्चालन यायेत फयां फक्वः कुतः याना च्वंगु व छुं छुं सेवाया निंतिं वैकल्पिक व्यवस्था याःगु धाःगु दु।

ज्याकुथिया सहायक प्रमुख जिल्ला अधिकारी लिसें प्रवक्ता मुक्तिराम रिजालया कथं थ्वहे भदौ ६ गते न्ह्यः राहदानीया निंतिं किपा काये धुंकूपिं सेवाग्राहीपिंसं राहदानी कायेगु निंतिं भदौ ३१ गतेनिसें स्वापू तये फइगु जूगु दु।

अथे हे, राष्ट्रिय परिचयपत्र सम्बन्धी माःगु सेवाया निंतिं नारायणहिटी दरबारय् च्वंगु सेवा इकाइपाखें सेवा काये फइगु जुगु दु। राहदानी सम्बन्धी अत्यावश्यक सेवाया नितिं राहदानी विभागपाखें हे सेवा काये फइगु सहायक प्रमुख जिल्ला अधिकारी रिजालं धयादिगु दु।

थ्व बाहेकं मेमेगु सेवाया नितिं धाःसा भौतिक संरचना, माःगु प्रणाली व यन्त्र, उपकरणया व्यवस्था यानाः फयां फक्वः याकनं व्यवस्थापन यायेत्यंगु दु। सेवा प्रवाह सम्बन्धी मेमेगु जानकारीया नितिं ज्याकुथिं नियमित कथं सुचंपाखें जानकारी बिइगु नापं वय्कलं धयादिल।

बारबरा फाउन्डेशनं ‘हामी नेपाल’ नांया संस्थानाप कोभिड महामारीया इलय् सहकार्य यानागु खःसा छु न कथं आर्थिक सम्बन्ध यानागु मदु धका स्पष्ट याःगु दु।

फाउन्डेशनं थःगु नां स्वाना भ्रामक प्रचार यागु धका आपत्ति प्वकूगु दु। आइतवाः पत्रकार सम्मेलन यासे फाउन्डेशनं हामी नेपालनाप कोभिड महामारीया इलय् सहकार्य जुगु, तर उगु संस्था नाप थुकिया पदाधिकारीनाप छु न आर्थिक सम्बन्ध मदु धका धाःगु दु।

फाउन्डेशनं लिपागु राजनीतिक अवस्थाया कारण थःपिन्त बिउगु द्धपःयात ‘अनर्गल प्रचार’ जुगु धका खण्डन याःगु दु। गैरनाफामूलक सामाजिक संस्था बारबरा फाउन्डेशनं स्थापना अमेरिकी नागरिक बारबरा एडम्सया नामय् याःगु खः।

वयकलं थःगु दक्को सम्पूर्ण सम्पत्ति फाउन्डेशनयात दान याःगु व नेपाली नागरिक कथं व संस्कृति,सम्पदा संरक्षणया निति फेलोसिप नाप टक सेरिज सञ्चालन याःगु दु।फाउन्डेशनं धाःगु दु आःतक बारबरा एडम्सया सम्पत्तिपाखे २ करोड ८८ लाख व नेपाली दाता तयेगु पाखे कुल ७ करोड ८२ लाख वःगु खः। संस्थाया वार्षिक बजेट ५० लाख दु व च्यादँय् ३ करोड ६४ लाख खर्च याये धुकुगु दु। आःतक ३ करोड ९५ लाख बैंक मौज्दात दुगु फाउन्डेसनं धाःगु दु।

अथेहे, सामाजिक सञ्जालय् भाइरल भिडियो, उकिइ हामी नेपालं ‘जिमिसं दक्को खँ सन्दुक रुइतयात न्यना वयकः न निर्देशन याइ’ धका धाःगुलि, उकियात फाउन्डेशनया सन्दुक रुइतं खण्डन याःगु खः।