देय् न्यक कारागारय् च्वपि कैदीबन्दी बिस्यू वने च्वंगु इलय् येँया डिल्लीबजारय् च्वपि कैदीबन्दी न बिस्यू वनेत स्वंगु दु।

उमिसं कारागार दुने तोडफोड याना मिँ च्याकेगुवं नेपाली सेनां हस्तक्षेप याःगु दु। कारागार दुने च्वपि कैदीबन्दी तय्स थःपि न बिस्यू वने दयेमाः धका नाराबाजी याःगु खः।

अन पिने सेनां कडा तैनाथी यागुलि कारागार दुने मिँ च्याका ब्यूगु खः।

सरकार विरोधी आन्दोलनय् कुहावःपि युवा तयेस नेपालय् मिडिया हाउसय् आक्रमण याःगु दु। कान्तिपुर दैनिक थापाथलीस्थित कार्यालयय् न म्हिगः मिँ तया ब्यूगु दु।

सेन्ट्रल बिजनेशय् आक्रमण याःगु खः। कान्तिपुरया पत्रकार तयेगु कथं आक्रमण जुइगु न्ह्यः हे पत्रकार व कर्मचारी पिहावःगुलि मानवीय क्षति धाःसा मजु।

आक्रोशित मिड तीनकुनेस्थित कान्तिपुर टिभी, रेडियो कान्तिपुरया तीनकुने गैरीगाउँस्थित अन्नपूर्ण पोस्टया कार्यालयय् प्रदर्शनकारी तय्स आक्रमण याःगु खः।अथेहे थाहाखबर डटकमया कार्यालय न तोडफोड याःगु दु।

कपिलवस्तु कारागारया कैदीत कारागार तोडफोड याना बिस्यू वंगु दु।जेनजी आन्दोलनया झ्वलय् कारागार तोडफोड याना प्यसः स्वया अप्पो कैदी बिस्यू वंगु दु। कारागारय् ४७० म्ह कैदीत  दुगु खः।

उकि मध्ये ३५ म्ह आः न कारागारय् दु धका प्रमुख जिल्ला अधिकारीं धाःगु दु। निगु ब्लकय् बिस्यूपि मध्ये २० म्हेसित ज्वंगु दु।

जिल्ला कारागार तनहुँपाखे न कैदीत बिस्यू वंगु दु। जेनजी प्रदर्शनकारी तयेगु ग्वहालिं कैदीबन्दीत कारागारं बिस्यू वंगु खु।

दमौलीइ न्हिच्छियकं जेनजी आन्दोलनकारी तय्स सरकारी कार्यालय च्याकाच्वंगु खःसा बहनि बिस्यू वंगु खः। बहनि ८ बजे जेनजीया ग्वहालिं कैदीबन्दीत थःहे कारागारं बिस्यू वंगु खः।

कास्की कारागारय् च्वपि कैदीत बिस्यू वंगु दु। जेनजी प्रदर्शनकारी लिपा कारागार तछ्याना कैदीत बिस्यू वःगु खः।

कास्की कारागार ब्लक ‘ए’ य् ४६६, ब्लक ‘बी’ य् ४८० व मिसा ब्लकय् ३५ म्ह कैदीत दुगु खः।