जिल्ला प्रहरी परिसर येँया प्रमुखया भाला प्रहरी वरिष्ठ उपरीक्षक रमेश थापायात ब्यूगु दु।

बिहीबाः गृहमन्त्रीस्तरीय निर्णयपाखें जिल्ला प्रहरी परिसर येँया प्रमुखया भाला थापायात ब्यूगु परिसरया प्रवक्तालिसें प्रहरी उपरीक्षक अपिलराज बोहरां धयादिगु दु। वय्कलं धयादिल, “परिसर प्रमुखया भाला प्रहरी वरिष्ठ उपरीक्षक थापायात ब्यूगु दु।

आधिकारिक कथं पौ वये ल्यं दनि।” थ्वसिबें न्ह्यःया परिसर प्रमुख लिसें वरिष्ठ उपरीक्षक विश्व अधिकारीयात प्रहरी प्रधान ज्याकुथि नक्सालय् सालाकाःगु खः।

राष्ट्रपति रामचन्द्र पौडेलं वर्तमान संविधानं केन्द्रीकृत व एकात्मक राज्य व्यवस्थापाखें पिहांवयाच्वंगु फुक्कं कथंया विभेद व उत्पीदनयात अन्त्य यानाः जातीय, भाषिक, धार्मिक, सांस्कृतिक लिसें भौगोलिक विविधतां जाःगु नेपालीसमाजयात बृहत् राष्ट्रिय छवाःया सूत्रय् स्वाःगु धयादीगु दु।

संविधान दिवसया लसताय् भिंतुना सन्देश बियादिसें वय्कलं सङ्घीय लोकतान्त्रिक गणतन्त्रात्मक शासन व्यवस्थाया माध्यमं दिगो शान्ति, सुशासन, विकास व समृद्धिया आकाङ्क्षा पूवंकेत झी सकलें छप्पंछधी जुइत हःपाः बिइगु दु धकाः भिंतुना देछानादीगु दु। राष्ट्रपति पौडेलं नेपाःया संविधानं सामाजिक न्यायय् लिधना च्वंगु समतामूलक समाजया परिकल्पना यासें समाजवादपाखे न्ह्यचिला च्वंगु अर्थतन्त्तया निर्माण यायेगु आज्जु कयातःगु धयादिल।

वय्कलं संविधानपाखें प्रत्याभूत यानातःगु राज्यपाखें दइगु सेवा व सुविधाय् सकल नागरिकया समान पहुँच स्थापित यायेगु नापनापं आम नागरिकयात सामाजिक सुरक्षाया प्रत्याभूति यायेमागुलिइ बः बियादिल। राष्ट्रपति पौडेलं संविधानया मर्म व भावनायात व्यवहारय् हिलेत मन, वचन व कर्मं समर्पित जुयाः थःथःगु थासं इमान्दार व प्रभावकारी कुतः याना च्वनेत सकसितं इनाप यानादिल। राष्ट्रपति पौडेलं देय्या संस्कृति व प्रकृतिं देसय् लजगाः व आम्दानीया ल्याखाय् मफइगु ह्वःताःया लुखा चायेकूगु दु धासें फुक्कं कथंया बेथितियात अन्त्य यानाः सुशासनया माध्यमं जलस्रोत व ऊर्जा शक्तिया बांलाःगु व्यवस्थापन याये फुसा जक नेपाः सम्मुनत राष्ट्रया धलखय् न्ह्यचिले फइगु विश्वास प्वंकादिल।

हिमाल, पहाड व तराईया अनुपम भौगोलिक संरचनाया बहुजाति, बहुभाषी लिसें बहुसंस्कृतियात संविधानं ज्वःलाक संरक्षण यानातःगु दु। वय्कलं थुजाःगु अवस्थाय् नेपाःमिपिं दथुया थःथवंय् सद्भाव, भ्रातृत्व व सहअस्तित्वय् किचः लाइगु ज्या सुं गनं मजुइगु अपेक्षा यानादीगु दु। विसं २०७२ साल असोज ३ गते सङ्घीय लोकतान्त्रिक गणतन्त्र नेपाःया संविधान जारी जूगु ऐतिहासिक उपलब्धिया लुमन्ति व सम्मानय् थौं संविधान दिवस (राष्ट्रिय दिवस) न्यायेकाच्वंगु दु।

दिवसया लसताय् राष्ट्रपतिं स्वदेश व विदेशय् च्वनादीपिं सकल नेपाःमि दाजुकिजा तताकेँहेपिंत भिंतुना देछाना दिल। वय्कलं सङ्घीय लोकतान्त्रिक गणतन्त्रया पलिस्था यायेत थीथी आन्दोलनया झ्वलय् थःगु अमूल्य जीवन पानादीपिं सकल ज्ञातअज्ञात सहिदपिंत दुनुगलंनिसें श्रद्धाञ्जली प्वंकादीगु दु।

नापनापं वय्कलं गणतन्त्र नीस्वनेगु निंतिं थीथी इलय् जूगु आन्दोलनया नेतृत्व याःपिं राजनीतिक दलया नेतातप्रति सम्मान लिसें श्रद्धा प्वकादिसें लोकतान्त्रिक आन्दोलनय् ब्वति काःपिं आमनागरिक नापं राजनीतिक कार्यकर्तापिनिगु योगदानया उच्च प्रशंसा यानादीगु दु।

थौं कालीगढपिंसं विश्वकर्माया पुजा यानाः वास्तु दिवस लिसें विश्वकर्मा पुजा पर्व न्यायेका च्वंगु दु। दँय् दसं थें आश्विन सङ्क्रान्तिया दिं विश्वकर्माया विधि पूवंकं पुजा याना वयाच्वंगु दु।

थीथी कलकाराखानाय् विश्वर्माया झ्वाताः दयेकाः व किपातय् विधिपूवंकं पुजा यानाः थ्व दिवस न्यायेकेगु याइ । कलकाराखानाय् विशेष कथं झःझः धायेकाः ज्यामिपिंत नापं ब्वति कायेकाः थ्व दिवस न्यायेकी। फि व मेमेगु ज्वलं नं दयेकातःगु विश्वकर्माया झ्वाताः थौं पुजा यानाः कन्हय् कुन्हु खुसिइ यंकाः चुइकेगु याइ।थौंया दिं कालिगढपिंसं थःथःगु ज्यावः, सवारी साधन पुजा यात धाःसा ताःई तक छ्यले फइगु, ज्या यानाच्वनी इलय् मस्यनीगु व याःगु ज्याः सुथां लाइ धइगु धार्मिक विश्वास दु।

लिपांगु ई नेपालय् नं वास्तु विद्याया पुनर्जागरण जूगु दु। विश्वकर्मायात वास्तुविज्ञ द्यःया कथं नाला कयातःगु दु । सहरय् न्हनांवने धुकूगु वास्तुविद्याया लिधंसाय् भवन निर्माण यायेगु ज्या हाकनं न्ह्याःगु दु। अथे जुयाः थौं कन्ह्य् छेँ, भवन दयेकीबलय् वास्तु स्वयाः दयेकेगु यानाहःगु दु।

थथे यानाः भवन निर्माण यात धाःसा भिनी धइगु विश्वास दु। थौं इञ्जिन जडान जुयाच्वंगु थीथी यन्त्र तयेगु पुजा याइ सा विश्वकर्मा द्यःया पुजा यानाः झःझः धायेक म्ये हालाः प्याखँ हुलाः थ्व दिं न्ह्यइपुक न्यायेकी।

‘जेनजी’ प्रदर्शनया हुनिं पिहांवःगु विषम परिस्थितिया हुनिं बन्द जूगु शेयर कारोबार थ्वहे असोज २ गते बिहीबाःनिसें हाकनं न्ह्याइगु जूगु दु। नेपाल धितोपत्र बोर्डं कारोबार दिकेत ब्यूगु निर्देशन कथं बजाः बन्द जुयाच्वंगु खः।

अवस्था सहज जुसां शेयर कारोबार बन्द याःगु धासें बोर्ड व नेप्सेयात कुंखिनाहःगु खः। बोर्डं मंगलबाः हाकनं निर्देशन बिसें धितोपत्रया निगूगु बजाः कारोबार न्हापाथें हे सञ्चालन यायेत निर्देशन ब्यूगु खः।

बोर्डया निर्देशन लिपा बजाः नियमित सञ्चालन जुइत्यंगु नेप्सेया प्रवक्ता मुराहरि पराजुलीं धयादिल।

प्रधानमन्त्री सुशीला कार्कीयात राष्ट्रिय सभाया अध्यक्ष नारायणप्रसाद दाहालं नापलागु दु। मंगलवाः प्रधानमन्त्रीया सरकारी निवास बालुवाटारय् राष्ट्रिय सभाया अध्यक्ष दाहालं प्रधानमन्त्री कार्कीयात नापलागु खः।

नापलायेगु झ्वलय् अध्यक्ष दाहालं नवनियुक्त प्रधानमन्त्री सुशीला कार्कीयात भिंतुना नापं कार्यकाल ताः लायेमाः धका न धयादीगु खः।

अथेहे अध्यक्ष दाहालं राष्ट्रिय सभाया ज्या, अवस्था व बानेश्वरस्थित संघीय संसद भवन नाप सिंहदरबारस्थित संघीय संसद सचिवालय जूगु नोक्सनाया बारे जानकारी बियादीगु खः।