मेगु वाःया आइतवाःनिसे सांकेतिक कथं सर्वोच्च अदालतं थःगु् सेवा सुरु याइगु जुगु दु।

सर्वोच्च अदालतया दक्को न्यायाधीश सम्मिलित पूर्ण बैठक (फूल कोर्ट) नं वइगु आइतवाः निसे बन्दीप्रत्यक्षीकरणया निवेदन स्वयेत न्ह्याकूगु दु।वंगु मंगलवाः जेनजी आन्दोलनकारी तय्स याःगु उग्र प्रदर्शन लिपा सर्वोच्चय् मिँ च्याका व तोडफोड याःगु खः।

वया लिपा सर्वोच्चया सेवा दक्को अवरुद्ध जूगु खः।

राष्ट्रपति रामचन्द्र पौडेलं देय्या वर्तमान विषम परिस्थितिइ मुलुकयात संवैधानिक दायराय् च्वनाः गथे यानाः निकास बिइ फइ व मुलुकय् लोकतन्त्रया संरक्षण नापं शान्ति सुव्यवस्था गथे यानाः कायम यायेफइ धकाः थःम्हं बिचाः–विमर्शलिसें फयांफक्व कुतः यानाच्वना धइगु जानकारी बियादीगु दु।

वय्कलं थौं विज्ञप्ति पिथँनादिसें आन्दोलनकारी नागरिकतय् माग संबोधन यायेत फयांफक्व याकनं समस्या ज्यंकेगु लँपु मालेगु ज्या जुयाच्वंगु विषयय् धुक्क जुइत व संयमतापूर्वक मुलुकय् शान्ति सुव्यवस्था कायम यायेगु ज्याय् ग्वाहालि यायेत फुक्क पक्षयात इनाप यानादीगु खः।

सीमित कर्मचारीपाखें माःगु बैङ्किङ नापं डिजिटल भुक्तानीसम्बन्धी सेवा सञ्चालन यायेत नेपाल राष्ट्र बेङ्कं बैङ्क लिसें वित्तीय संस्थायात इनाप याःगु दु।राष्ट्र बैङ्कं फुक्कं कथंया इजाजत कयातःपिं बैङ्क, विकास बैङ्क, वित्त कम्पनी लिसें भुक्तानीसम्बन्धी ज्या याइगु संस्थायात व्यवसायिक निरन्तरता बिइत धाःगु खः।

राष्ट्र बैङ्कं थौं थन सार्वजनिक याःगु सुचंखय् नेपाली सेनां भदौ २५ गते पितब्यूगु निषेधाज्ञासम्बन्धी व्यवस्थायात बिचाः यानाः थुजाःगु व्यवस्था मिले यायेत निर्देशन बियागु धयातःगु दु। सुचं बिउगुलि धयातःगु दु, “बैङ्क लिसें वित्तीय संस्थां थःगु संवेदनशील प्रणाली सीमित कर्मचारीपाखें सञ्चालन यानाः मदयेकं मगाःगु बैङ्किङ लिसें डिजिटल भुक्तानी सम्बन्धी सेवा सञ्चालन याये मालीगु दु।

मेमेगु प्रणाली धाःसा जोखिमया लिधंसाय् रिमोट एसिसपाखें सञ्चालन यायेगु व्यवस्था यायेमालीगु दु”, नेपाल राष्ट्र बैङ्कं धयातःगु दु।

अथे हे, सुचनाय् माःगु सेवा सञ्चालनय् वःगु शाखा, एटीएम व बियाच्वनागु सेवासम्बन्धी जानकारी थःगु वेबसाइट व सामाजिक सञ्जालपाखें सर्वसाधारण तय्त जानकारी बिइत नापं फुक्क संस्थायात इनाप याःगु दु।

नेपाली सेनां स्वनिगलय् शुक्रवाः (भदौ २७ गते) तक कर्फ्यू आदेश जारी याःगु दु। बुधवाः छगू विज्ञप्ति जारी यासे लिपागु सुरक्षा परिस्थितिइ विश्लेषणया आधारय् नागरिक तयेगु धनजन याःगु सुरक्षाया निति सेनां कर्फ्यू आदेश जारी याःगु दु।

सैनिक जनसम्पर्क कार्यालयया कथं भाद्र २६ गते अथे धइगु बिहीवाः सुथय् १० बजे निसे बहनि ५ बजे तक निषेधाज्ञा जारी याःगु दु।

अथेहे भदौ २६ गते बिहीवाः बहनि ७ बजे निसे भदौ २७ गते शुक्रवाः सुथय् ६ बज तक कफ्र्यू आदेश जारी याःगु दु धका सेनां धाःगु दु।

निषेधाज्ञा नाप कर्फ्यूया इलय अत्यावश्यक सेवाया सवारी साधन सञ्चालन याये धाःसा फइगु जुगु दु।

एम्बुलेन्स, शव बाहन, दमकल, स्वास्थ्यकर्मी, सुरक्षाकर्मी व सञ्चारकःमि नापं खाद्यान्न, इन्धन, दुरु, तरकारी, लः व वासः ल्हये फइ धका धाःगु दु।

जिल्ला कारागार मोरङय् च्वपि कैदीबन्दी बिस्यू वनेत स्वयेवं प्रहरीले गोली चले जूगु दु।कैदीबन्दी छुटे यायेत वःगु पुचःयात प्रहरीं हवाई फायर याःगु खः।

कैदीबन्दी छुट यायेगु माग नापं छगू पुचः कारागारय् च्वपि कैदीबन्दीत न बिस्यू वनेत कुतः याःगु खः। हुलयात तितरबितर यायेत प्रहरीं १५ राउन्ड हवाई फायर याःगु खः।

हवाई फायर लिपा कैदीबन्दी छुटे यायेत वःपि तितरबितर जूगु खः। कारागारय् नेपाली सेनाया टोली न थ्यकूगु खः। सेना थ्यनेवं अवस्था सामान्य जूगु खः।

मोरङ कारागारय् १ हजार १ सय स्वया अप्पो कैदीबन्दीत दु।