नेपाल विद्युत् प्राधिकरणं थौ येँ थीथी थासय् मत स्याइगु जुगु दु।

प्राधिकरणं छगु सूचं पिकया महाराजगञ्ज वितरण केन्द्र अन्तर्गत लाजिम्पाट फिडरय् पाखें लाजिम्पाट, पानीपोखरी व बालुवाटार क्षेत्रय् मत स्याइगु जुगु दु।

थौ सुथय् १० निसे ३ बजे तक मत स्याइगु धका सूचं पिकाःगु दु। उगु थासय् भूमिगत प्रसारण लाइनया केवल परीक्षण नाप चार्ज यायेगु प्रयोजनं मत स्यायेय् त्यनागु धका प्राधिकरणं धाःगु दु।

थौ सुथय् सिन्धुपाल्चोक केन्द्रविन्दु जुया शक्तिशाली भुखाय् ब्बःगु दु।

सिन्धुपाल्चोकया भैरवकुण्डय् केन्द्रविन्दु जुया उगु भुखाय् ब्बःगु धका राष्ट्रिय भूकम्प मापन केन्द्रं धाःगु दु।

थौ सुथय् २ बजे जुया ५१ मिनेटय् ६.१ म्याग्निच्युड मापन जुगु दु।

भुखाय् ब्बया गुलि क्षति जुगु उगु विवरण वय्गु ल्यः दनिइ।

सेयर बजाः कारोवार जुगु लिपागु दिं २८ सय ल्याखं अप्पोगु दु। वंगु दिं स्वया थौ परिसूचक नेप्से ४९.१५ ल्याखं थहावना थौ नेप्से २८१५ कायम जूगु दु।अथेहे कारोबार रकम न थहावःगु दु।

वंगु दिं ९ अर्ब ९० करोडया कारोबार जुगुलि थौ ११ अर्ब ३९ करोड थ्यःगु दु। १८६ गु कम्पनीया भाः थहावःगुलि ५२ गु कुहावःगु दु सा खुगु स्थिर जूगु दु।थौ बैंकिङ सेक्टर दकलय् अप्पो ३.३२ प्रतिशतं थहावःगु दु। राष्ट्र बैंकया मौद्रिक नीति समीक्षां बालागु वर्गय् बैंक छुट्यायेमाःगु लोनलस प्रोभिजन दर १.१० पाखे १ प्रतिशतय् कुकागुलि थुगु सेक्टरय् आकर्षण खनेदुगु दु।

थुकिइ बैंक तयेस वइगु वित्तीय विवरणय् नाफा अप्पोइगु अनुमान याःगु दु।थ्व हे कारण बिहीवाः थुगु सेक्टरं छलाङ याःगु दु। बजाः दक्को सेक्टर थहावःगु दु। बैंकिङ लिपा उत्पादन सेक्टर २.९१ प्रतिशतं थहावःगु दु। व्यापार १.२०, मेमेगु १.०१, निर्जीवन बीमा ०.७०, माइक्रोफाइनान्स ०.९१, जीवन बीमा ०.८१, लगानी १.२५, हाइड्रोपावर १.८०, होटल लिसे पर्यटन १.१२, फाइनान्स ०.२८ व विकास बैंक समूह १.५३ प्रतिशतं थहावःगु दु।

प्यगू कम्पनीया भाः १० प्रतिशतं थहावंगु दु। गार्डियन माइक्रोलाइफ इन्स्योरेन्स, अपरहेवाखोला, सिन्धु विकास बैंक व दोर्दीखोला हाइड्रोपावरया भाः १० प्रतिशत, लिबर्टी इनर्जीया भाः ९.९६, गुराँस लघुवित्तया ९.२४, बोटलर्स नेपाल बालाजुया ८.९९ प्रतिशत थहावंगु दु।

भूगोल इनर्जीया ७.१७ व उपकार लघुवित्तयाया ६.२५ प्रतिशत भाः कुहावःगु दु। हिमालयन रिइन्स्योरेन्स दकलय् अप्पो ९६ करोड ४७ लाख तक बराबरया कारोबार जूगु दु।

राष्ट्रपति रामचन्द्र पौडेलं शेर्पालिसेया हिमाली, आदिवासी समुदायया न्हूदँ श्यिङ मो डुल लो २१५२ ग्याल्पो ल्होसारया शुभारम्भ यानादीगु दु।

राष्ट्रपति भवन शीतल निवासय् थौं सुथय् ग्वसाः ग्वःगु छगु ज्याझ्वलय् फेमार (शेर्पा नसाः ज्वलं) तानाः राष्ट्रपति पौडेलं ग्याल्पो ल्होसारया शुभारम्भ यानादीगु खः। उगु झ्वलय् राष्ट्रपति पौडेलं बहुजातीय, बहुभाषिक, बहुसांस्कृतिक विविधतां जाःगु नेपाःया समाजय् ग्याल्पो ल्होसार थेँ जाःगु नखःचखलं सकल नेपामि दथुइ थवंथःया सद्भाव, सहिष्णुता व बन्धुत्वया भावना अभिवृद्धि यासें राष्ट्रिय एकतायात थप सुदृढ यायेत योगदान बिइगु विश्वास कयागु धयादिल।

वय्कलं नेपाः बहुजातीय, बहुभाषिक, बहुसांस्कृतिक व बहुधार्मिक देय् जूगु नापं थन बसोबास याइपिं फुक्कं जातजातितय्या थःगु ब्यागलं परम्परा, रीतिरिवाज व संस्कृति दूगु धयादिल।

राष्ट्रपति पौडेलं ब्यागलं सांस्कृतिक विविधतां जाःगु नेपालय् शेर्पा समुदायया थःगु हे बिस्कं म्हसीका दूगु खँ न्ह्यथनादिसें शेर्पा व हिमाली आदिवासीतय्सं नेपाःया हिमाली लागाया भाषा, धर्म, कला, संस्कृति व परम्परायात निरन्तरता, संरक्षण, सम्वर्धन व विकासय् थःगु म्हसीका कायम यासें पर्यटन व थःगु व्यवसायपाखें मुलुकयात आर्थिक कथं क्वतुकाः यंकेत च्वछाय् बहःगु भूमिका म्हिताः वयाच्वंगु धयादिल।उगु झ्वलय् खेम्पो लामा आचार्यं ल्होसारया बारे कनादिल। ज्याझ्वलय् ल्होसारनाप स्वपूदूगु मे व स्याब्रु प्याखँ ह्यब्वःगु खः।(रासस)

रात्रि नखःया झ्वलय् बुधबाः केदारनाथया शिर डोलेश्वर महादेव देगलय् छन्हुं हे ६० द्वः दर्शनार्थीतय्सं पुजा नापं अवलोकन याःगु दु।

सूर्यविनायक नगरपालिका–८ सिपाडोलय् च्वंगु केदारनाथया शिर डोलेश्वर महादेव मन्दिर संरक्षण नापं विकास समितिया महासचिव हरिशरण बस्नेतया कथं बुधबाः सुथसिया ४ ता इलंनिसें देगःया प्यंगुलिं ध्वाखा चायेकाः देगलय् दुकयाः महाद्यःया शिलाय् हे पुजा याइगु व्यवस्था यानातःगु खः।

महाशिवरात्रिया न्हुकुन्हु भक्तजनतय्त १ हजार व १०० इ पुजा सामग्रीनापं पञ्चस्नाननं याकेगु व्यवस्था यानातःगु खः। डोलेश्वरय् ६० द्वः स्वयां अप्वः नेपाली व भारतीय पर्यटकतय्सं पुजा नापं दर्शन याःगु महासचिव बस्नेतं धयादिल। चच्छि देगः लागाय् धुनी चाकेगु, बाचाइलंनिसें विशेष पुजा यायेगु व बिहीबाः (थौं) सुथसिया ४ ताः इलय् साधुसन्तया निंतिं पुजाया व्यवस्था यानातःगु वय्कलं कनादिल।

शिवरात्रि नखःया निंतिं थुगुसी डोलेश्वर वइपिं स्वथी साधुसन्त व बाबातय्त ‘क’, ‘ख’ व ‘ग’ य् ब्वथलाः दक्षिणा नापं धोती व फांगा बियाः थौं सुथय् ११ बजे भोजन याकाः बिदा बिइगु ज्याझ्वः दु।

बुधबाः प्रसिद्ध आशापुरीइ नं २५ द्वः स्वयां अप्वः, साँगाया तःजाःगु कैलाशनाथ महादेवय् थ्यंमथ्यं १४ द्वःसिनं दर्शन नापं पुजा यात धाःसा सूर्यविनायक–१ सिरुटारय् च्वंगु गुप्तेश्वर महाद्यः, सोमलिङ्गेश्वर महाद्यः, चरखण्डीश्वर महाद्यः, वडा ल्याः ५ य् च्वंगु अनन्तलिङ्गेश्वर महाद्यः, सुवर्णेश्वर महाद्यः, वडा ल्याः १० चित्तपोल साँगाय् च्वंगु कैलाशनाथ महाद्यः, चित्तपोलया हे लटरम्बेश्वर महाद्यः, ख्वपया दत्तात्रय देगः, यातु महाद्यः देगः, नंखेलया नन्दिकेश्वर महाद्यः देगः, चाँगुनारायणय् च्वंगु मच्छेनारायण देगः लिक्क च्वंगु महादेश देगः, मध्यपुरथिमि राधेराधे सङ्गम कोलोनीया सङ्गमेश्वर महाद्यः नं सनिलय्तक हे म्वःम्वः जुयाच्वंगु खः।