वंगु २४ घण्टाया दुने देयन्यक थप १,४४६ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं ८ हजार ९६५ म्हेसित पीसीआर परीक्षण याउगुलि १३५७ म्ह व २ हजार ४६४ म्हेसित एन्टिजेन परीक्षण याउगुलि ८९ म्ह याना १,४४६ म्हेसित संक्रमण पुष्टि जूगु दु।

वंगु २४ घण्टाय् निम्ह सीउगु दु सा २५५ म्ह संक्रमणमुक्त जूगु दु।

लुँ तोलां थौं स्वसः कुहावंगु दु।

लुँ तोलां थौं स्वसः कुहावया ९१ हजार ३ सय रुपैयाँ कायम जूगु दु धका नेपाल सुनचाँदी व्यवयासी महासङ्घं धाउगु दु।

अथेहे वहः तोला न न्यातका कुहावगु दु। वहः तोला थौं न्यातका कुहावया १२ सय २० रुपैयाँ कायम जुगु दु धका महासङ्घं धाउगु दु।

ज्यापु महागुथि नेपाः येँ महानगर समितिया अध्यक्षय् पंचनारायण महर्जन निर्वाचित जुगु दु।

न्हुगु नेतृत्वया लागि अध्यक्ष, उपाध्यक्ष २, सचिव, सहसचिव, कोषाध्यक्ष व सहकोषाध्यक्ष नाप १४ म्ह सदस्यपिनिगु लागि निर्वाचन जुगुलि निम्ह उपाध्यक्ष, सहसचिव, सहकोषाध्यक्ष नाप सदस्यपि निर्विरोध निर्वाचित जुगु खः।

अध्यक्ष, सचिव व कोषाध्यक्ष पदया लागि धासा निर्वाचन जुगु खः।अध्यक्ष पदया लागि न्यतया न्हुछेकाजी महर्जन, गोफः त्वाःया पंचनारायण महर्जन व वतु त्वाःया सुरेन्द्र महर्जनपि दथुइ निर्वाचन जुगुलि अध्यक्ष पदय् पंचनारायण महर्जन ३६० मत हया निर्वाचित जुगु दु। अथेहे निकटतम प्रतिद्वन्द्वी न्हुछेकाजी महर्जनं १७१ मत व सुरेन्द्र महर्जनं ८ मत जक काउगु खः।

अथेहे सचिव पदय् किलाघः त्वाःया मचाराजा महर्जन ३२४ हया निर्वाचित जुगु दु सा शर्मिला सुवाल डंगोलं २०६ मत काउगु खः। कोषाध्यक्ष पदय् भिद्यः त्वाःया जुजुकाजी महर्जनं ३६१ मत हया निर्वाचित जुगु खःसा राजु रत्न महर्जनं १२४ मत काउगु खः।

महागुथिय उपाध्यक्ष कृष्ण नारायण महर्जन व उपाध्यक्ष (मिसा), नानी हेरा महर्जन, सहसचिव रजिना डंगोल, सहकोषाध्यक्ष नानी हेरा डंगोल र्निबिरोध निर्वाचित जुगु दु।

अथेहे खुल्ला सदस्यय् श्याम कृष्ण प्रजापति, राजन महर्जन, श्रीकृष्ण महर्जन, कृष्ण महर्जन, मचाराजा महर्जन, श्याम महर्जन, कुलनारायण डंगोल, सूर्यमान महर्जन, दिनेश महर्जन निर्वाचित जुगु दु सा मिसा सदस्यय् विद्यालक्ष्मी डंगोल, बिमला महर्जन (डंगोल), कमला महर्जन, सजनी महर्जन व सुनिता महर्जन डंगोल निर्वाचित जुगु दु।

वाग्मती प्रदेशय् ट्याक्सी भाडा बढे याउगु दु। श्रम रोजगार तथा यातायात मन्त्रालयं सूचना प्रकाशित यासे आः वइगु माघ १ गतेनिसे लागू जुगु कथं भाडा समायोजन यायेगु कथं धाउगु दु।

आः ट्याक्सीइे न्यूनतम भाडा ६० रुपैयाँ कायम याउगु दु। ट्याक्सी सेवाय् न्हापागु छगु किलोमिटर तकया यात्राय् शुल्क ६० रुपैयाँ पुलेमाः। वयालिपा हरेक २ सय मिटरया यात्रालिपा गुतका व ८० पैसाया दरं भाडा थप जुइ।

सूचनाया कथं ट्याक्सीपिन्स पूर्ण रूपं मिटर प्रयोग यायेमाः। ट्याक्सी प्रयोग यायेवं सेवाग्राहीपिन्स ट्याक्सी नम्बर, चालकया नम्बर नाप विवरण अङ्ग्रेजी व नेपालीय् दुगु भिजिटिङ कार्ड बिइमाः।

कोरोना भाइरस (कोभिड–१९) या संक्रमण अप्पो जुइवं अस्पतालय् चाप न बढे जुगु दु।

कोभिड–१९ युनिफाइड केन्द्रीय अस्पतालया प्रमुख प्रशासकीय अधिकृत डा. भुपेन्द्रकुमार बस्नेतया कथं वीर नाप स्वनिगःया १३ गु व प्रदेशया न्ह्यगू अस्पतालय् बिरामीपि अप्पो जुगु दु।

स्वास्थ्य तथा जनसंख्या मन्त्रालयया नियमित ब्रिफिङया झ्वलय वयकः न धाउगु दु, ‘दक्को अस्पतालय् छवाःया दुने बिरामीपि दोब्बर ल्याखय् भर्ना जूपि वंगु दु।’

कोभिडया संक्रमण अप्पोगु धासे जनस्वास्थ्य मापदण्ड पालना याना व सतर्कता अपने यायेत वयकलं इनाप याउगु दु।