वंगु २४ घण्टाया दुने स्वनिगलय् थप ६६७ म्हेसित कोरोना सक्रमण जुगु पुष्टि जुगु दु।

थौं येँ जक ४६७ म्हेसित कोरोना सक्रमित पुष्टि जूगु दु सा ख्वपय् ७१ म्ह व यलय् १२९ म्हेसित संक्रमित जुगु दु।

अथेहे थ्व नाप स्वनिगलय् सक्रिय संक्रमितपि ८ हजार १८८ म्ह थ्यंगु दु।

वंगु २४ घण्टाया दुने देयन्यक १ हजार ७५६ म्हेसित कोरोना संक्रमण पुष्टि जूगु दु।

९ हजार ७७३ म्हेसिगु नमुना पीसीआर परीक्षण याउगुलि १ हजार ३५७ म्हेसित व ४ हजार ५६१ म्हेसिगु एन्टिजेन परीक्षण याउगुलि ३९९ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाउगु दु।

कोरोना संक्रमणं थप २३ म्ह सीउगु दु सा २ हजार २७४ म्ह कोरोनामुक्त जूगु दु। थ्व नाप आःतक नेपालय् कोरोना संक्रमित जूपि ८ लाख ५१ हजार ९६४ म्ह थ्यंगु दु।

उकि मध्ये ७ लाख २३ हजार ४५६ म्ह कोरोनामुक्त जुइ धुकुगु दु सा १० हजार ८०९ म्ह मदय धूकुगु दु।

येँ महानगरपालिका वडा नं १९ या वडाध्यक्ष शशिलाल श्रेष्ठ मदुगुलि थौं छन्हु शोक बिदा बिउगु दु।

६४ दँ दुम्ह श्रेष्ठ उपचारया झ्वलय म्हिगः बिहीबाः नर्भिक अस्पतालय् मदुगु खः। वयकः अकल्पनीय मदुगुलि महानगरपालिया मेयर विद्यासुन्दर शाक्यं बिचाः हायकूगु दु।

अथेहे उपमेयर हरिप्रभा खड्गी न वयकः मदया महानगरयात तधःगु क्षति जुगु दु धका धयादीगु दु। वयकःया शव थौं सुथय् ८ बजे अस्पतालं हया अन्तिम श्रद्धाञ्जिलया लागि वडाय् तइगु दु।

सुथय् ९ बजेनिसे न्हिनय् ३ बजे तक वडाय् तया अन्तिम संस्कारया लागि पशुपति आर्यघाट यंकिइगु धका वडा सदस्य चन्द्रमान डङ्गोलं जानकारी बिउगु दु।

पर्वतया थीथी थासय् चलः वना न्याम्ह सीउगु दु सा स्वम्ह बेपत्ता जुउगु दु। मदिक्क वाः वंया च्वंगुलि कुस्मा नगरपालिका स्वम्ह दुर्लुङय् न्याम्ह ल्हांगुलि निम्ह सीना च्वंगु अवस्थाय् लुगु दु।

चलः वया छखा छेँया हे न्याम्ह मध्ये १५ दँ दुम्ह विमला पौडेल व ११ दँ दुम्ह विनिता पौडेलया शव पिकागु खः। उगु छेँया स्वम्ह आः न वेपत्ता जुयाच्वंगुलि मालेगु ज्या जुयाच्वंगु दु धका जिल्ला प्रहरी कार्यालयया प्रहरी नायव उपरीक्षक शिवराज बुढाथोकीं जानकारी बिउगु दु।

अथेहे कुश्मा नगरपालिका ११ पकुवा चलखं ल्हाना निम्ह सीगु दु। ३५ दँ दुम्ह दुर्गा पौडेल व वया काय् ६ दँ दुम्ह गणेश पौडेल सीउगु दु धका प्रहरी नायव उपरीक्षक बुढाथोकीं जानकारी बिउगु दु।

अथेतु मोदी गाउँपालिका ५ अम्बोटय् चलः वया ५० दँ दुम्ह ठुलीमाया थापा न मदुगु दु।