मन्त्रिपरिषदयात पूर्णता बिइगु विषयय् गठबन्धन दुने आबद्ध दल दथुइ जुगु छलफल विना निष्कर्ष क्वचागु दु।

थौं सुथय् च्वंगु बैठकय् मन्त्रिपरिषद् विस्तार व दलपिन्स कायेगु मन्त्रालयबारे टुग्ये यायेत छलफल जुगुलि निर्णय मजूगु धका प्रधानमन्त्री शेरबहादुर देउवाया सचिवालयं धागु दु।

मन्त्रिपरिषदयात पूर्णता बिइगु विषय गठबन्धनय् दुथ्यागु दल दथुइ मेगु हाकन छलफल जुइगु सम्भावना दु।थौं बहनि तक क्वछित धासा कन्ह्य दुने मन्त्रिपरिषद् यात पूर्णता बिइगु देउवाया तयारी दु।

माधव नेपाल समूहं न्हुगु दल दर्ता जुइवं मन्त्रिपरिषदयात पूर्णता बिइगु तयारी जूसा सहमति याये मफया लिवागु खः।

थौं लुँया भाः तोलां प्यसः कुहावंगु दु।

थौं तोलां प्यसः कुहावया ९१ हजार २ सय रुपैयाँ तोके जुगु दु धका नेपाल सुनचाँदी व्यवसायी महासङ्घं धागु दु।

अथेहे वहः न थौं न्यातका कुहावंगु दु । वहः तोलां थौं न्यातका कुहावया १२ सय ५ रुपैयाँ  कारोबार जुगु दु धका महासङ्घं धागु दु।

सत्तारूढ गठबन्धनय् दुथ्यागु दलया नेतापि दथुइ बैठक थौं न जारी जुयाच्वंगु दु।

बालुवाटारय् प्रधानमन्त्रीया सरकारी निवासय् उगु बैठक सुरु जुगु खः। बैठकय् मन्त्रिपरिषदयात पूर्णता, मन्त्रालय भागबन्डा लगायत विषय छलफल जुगु खः।

थौं मन्त्रालये भागबन्डा टुंग्ये यायेगु सत्तारूढ दलपिनिगु तयारी दु। थ्व स्वया न्ह्यः म्हिगः सोमबाः  सुथय् च्वंगु बालुवाटारय् सत्तारूढ दलया शीर्ष नेतापिनिगु बैठक मन्त्रिपरिषदयात याकन हे पूर्णता बिइगु सहमति जुइ धका धागु दु।

नेपाली कांग्रेसया सभापति शेरबहादुर देउवा प्रधानमन्त्री जुगु थौं ४० दिं जूसा मन्त्रिपरिषदयात पूर्णता बिइ फुगु मदुनि।

फोहोर व्यवस्थापनया विषय थौं प्रधानमन्त्री शेरबहादुर देउवा व येँ महानगरया मेयर बिद्यासुदर शाक्य व उपमेयर हरिप्रभा खड्गीपिनिगु दथुइ भेतघाट जुगु दु।

प्रधानमन्त्री निवास वालुवाटारय् भेतघाटया दथुइ मेयर शाक्यं, सडक स्यंगुलि फोहोर उठे यायेत थाकूगु दु धका धयादीगु खः। प्रधानमन्त्री देउवां अन हे सडक विभागया महानिर्देशकयात टेलिफोन सम्पर्क यासे तत्काल सतकयात सुचारु यायेत निर्देशन बिउगु दु। अथेहे शान्ति सुरक्षायात मजवुत दयकेत गृहमन्त्री बालकृष्ण खाँडयात टेलिफोन याना माःगु प्रबन्ध यायेत निर्देशन बिगु दु।

उगु भेटवार्ता लिपा छलफलया विषय प्रतिक्रिया बियादीसे मेयर शाक्यं, फोहोर व्यवस्थापनया तत्काल व दिगो समाधानया विषय खँ जुगु धका जानकारी बिउगु खः। ‘प्रधानमन्त्री देउवानाप जिमिसं बञ्चरे डाँडाय् ल्याण्डफिल साइड याकन हे निर्माण सम्पन्न याना हस्तान्तरण यायेगु वातावरण निर्माण यायेत इनाप यानागु दु,’ शाक्यं धयादीगु दु, ‘जिं भदौ ८ गते हे प्रधानमन्त्रीयात पौंपाखे फोहोर व्यवस्थापनया लागि कुतः यायेत इनाप यानागु खः। उकिइ वयकः नाप भेटघाटया लागि ई फ्वनागु खः। थौं भेटघाटया मिले जुगु खः। खँ सकारात्मक जुगु दु।

महानगर सिसडोलतक वनेगु लँ दयकेत निर्माणया लागि मागु खर्च यायेत तयार दु।’मेयर शाक्यं प्रधानमन्त्री देउवायात पौं छ्वया स्वनिगलय् फोहोरमैलाया दीर्घकालीन समस्या समाधानया लागि निर्माणाधीन बञ्चरे डाँडा स्यानिटरी ल्याण्डफिल साइडया आःतक न निर्माण ज्या सम्पन्न मजुगु व उगु साइट तक वनेगु लँ दयकेगु सम्पन्न याये मफुगुलि स्वनिगलय् फोहोरमैला व्यवस्थापनय् अवरोध जुगु धका उल्लेख यागु दु।

‘थुगु अवस्थाय् बञ्चरे डाँडा ल्याण्डफिल साइड व उगु साइड तक वनेगु लँ याकन दयकां फोहोरमैला व्यवस्थापन सहजताया लागि प्राथमिकता बिया माःगु कारबाही यायेत इनाप यानागु दु।’