Display Style:
Column Style
मोहनि नखःया थौं एकादसी, सिन्हः त्यूवनीपिनि लीमलाः
लहनान्यूज | कौलाथ्व एकादशी ११४१, शनिबाः
हिन्दु नेपामिपिनिगु तःधंगु मोहनि नखःया थौं एकादसी ।
नःलस्वां कयाः सिन्हः त्यूवनीपिनिगु निन्हूया दिं । थौं न सुथंनिसें हनेबहःपिनिगु ल्हाःतं सिन्हः त्यूवनीपिनि लीमलाः । चालंकुन्हु सिन्हः ती मलाःपिं अले तापाक्कच्वंपिनि थौं सिन्हः त्यूवनाच्वंगु दु ।
थ्व झ्वः आवलिं पुन्हि तक जुइ । देय्या छुंछुं ब्वय् विजया दसमी अर्थात चालंकुन्हु जक सिन्हः तीमाःगु चलन दु । असत्ययात सत्य व आसुरी शक्तियात दैवीशक्तिं त्याकूगु कथं मोहनि नखःयात कायेगु याः ।
नःलस्वां साःगु दिननिसें गुन्हूतक दुर्गाभवानीया पुजाआराधना यानाः स्वनातःगु स्वांसिन्हः चालंकुन्हु तीगु प्रचलन दु ।
स्वनिगःलिसें थीथी जिल्लाय् पायाः पिकाःल
लहनान्यूज | कौलाथ्व एकादशी ११४१, शनिबाः
स्वनिगःलिसें थीथी जिल्लाय् म्हिगः पायाः पिकाःगु दु ।
दशमीया दिनय् नेवाः समाजय् पिकाइगु पायालय् थीथी शक्तिपीठय् तन्त्र साधना यानाः खड्ग ज्वनाः त्वाः अले गुथिया मनूत पिहांवयेगु याइ । थ्व हे दथुइ, भिंद्यःत्वाःया साय्मि समुदायं पायाः पिकाःगु दु ।
उमिसं लिच्छवीकालिन पचली आजुया पायाः पिकाःगु खः । लिसें येँया तेबहाल व वटुं लुँमधि अजिमा, क्वहितिं निलवाराही, यत्खा्र कंग अजिमा व बाचाय् तलेजु भवानीलिसेंया पीठं पायाः पिकाःगु खः ।
खड्ग ज्वनाः देय् चाःहुइकेधुंकाः आसुरी प्रवृत्तिया प्रतीक भुइफसियात खड्गं पालाः जात्रा क्वचायेकी । किपुलिइ नं मिसा पायाः पिकाःगु दु । थन मिसां खड्गया पलेसा सिन्हःमू ज्वनाः देय् चाःहुलाः पायाः पिकायेगु परम्परा दु ।
किराँतकाल लिपाया ठकुरीकालय् स्वनिगःया दक्वं जनतां देय्या सुरक्षाया लागिं तैनाथ जुइगु याःगुलिं शक्ति प्रदर्शनया लागिं छेँय् छेँय् नं ल्वाभःलिसें देय् चाःहुलेगु परम्पराया रुपं थुकियात कायेगु यानातःगु दु ।
थौं मोहनि नखःया चालं अर्थात विजया दशमी
लहनान्यूज | कौलाथ्व दशमी, ११४१, शुक्रबाः
थौं आश्विन शुक्ल दशमी अथेधइगु हिन्दु नेपामिपिनिगु तःधंगु नखः विजयादशमी ।
देय्न्यंकं हर्षोल्लासपूर्वक हनाच्वंगु दु । मोहनि छेँय् प्रतिपदाया दिंकुन्हुनिसें पूजा यानातःथाय् थौं विधिपूंवक्क विसर्जन यानाच्वंगु दु । थौं हे नवदुर्गा भवानीया प्रतीक कथं पूर्णघडाया जलं अभिषेक यानाः छेँय्छेँय् हनेबहःपिनिगु ल्हाःतं नःलस्वां कयाः सिन्हः तीगु चलन दु । नेपाल पञ्चांग निर्णायक समितिं थौं दकले भिंगु साइत कथं १०ः२ मिनेटय् धयातःसां अत्यावश्यक जूगुलिं न्हिच्छिं हे साइत मस्वःसां ज्यूगु धागु दु । दुर्गा भवानीया प्रसाद कायेत साइत मस्वःसां ज्यूगु धागु दु ।
थौं सुथय् ८ः१९ मिनेटय् देवी विसर्जन यायेगु भिंगु साइत दुगु न समितिं धागु दु । देवी विसर्जन यायेधुंकाः सुथय् १०ः२ मिनेटय् सिन्हः तीगु उत्तम साइत दुगु धागु दु । सासाभिंभिं नयेगु अले बाँलाक्क पुनेगुनिसें छेँजः नापलानाः माया मतिना क्यनेगु व सद्भाव अभिवृद्धि यायेगु नखःया रुपय् मोहनियात कयाःतःगु दु ।
थ्व नखःयात धार्मिक जक मखु, सामाजिक व सांस्कृतिक नखःया कथं स्वीकार यानातःगु दु । असत्ययात सत्यं त्याकूगु कथं हनीगु थ्व नखः मर्यादापुरुषोत्तम श्रीरामं आसुरी शक्तिया प्रतीक रावणयात बुकूगु उत्सव कथं हनि ।
शक्तिस्वरुपा देवी भगवतीं महिषासुर दैत्य स्यानाः विजयश्री चूलाकूगु लुमन्तिइ न मोहनि नखः हनि । मोहनि नखय् कृषि ज्याबः व अन्नबालीइ न पूजा याइ । बाँबाँलाक्क वसः पुनाः हनेबहःपिनिगु ल्हाःतं म्ह्वसतय् जाकीसिन्हः तीत अले छ्यनय् नःलस्वां छुनाः आर्शिवाद फःवनीगु थौं चहःपहः दु ।
स्वदेश वा विदेशय् दुपिं नेपामिपिन्सं थौंया दिंकुन्हु सकलें छेँजः छथाय् मुनाः मोहनि नखःया सिन्हः व नःलस्वां कयाः थवंथवय् भिंतुना कालबिल यायेगु परम्परा दु ।
मोहनि नखःया लसताय् राष्ट्रपतिनिसें प्रधानमन्त्री व थीथी दलया भिंतुना हसना
लहनान्यूज | कौलाथ्व दशमी, ११४१, शुक्रबाः
मोहनि नखःया लसताय् राष्ट्रपतिनिसें प्रधानमन्त्री व थीथी दलया नेतातय्सं भिंतुना हसना सार्वजनिक याःगु दु ।
वय्कपिन्सं सार्वजनिक याःगु हसनाय् सांस्कृतिक नखं नेपाली समाज व मानव जीवनय् भ्रातृत्व, भावनात्मक एकता व राष्ट्रिय गौरवया नितिं विशिष्ट योगदान ब्यूगु धकाः उल्लेख याःगु दु ।
राष्ट्रपति विद्या भण्डारीं स्वदेश व विदेशय्दुपिं नेपामिपिन्त भिंतुना देछानादीसें सुख, शान्ति, समृद्धि अले सकलेंसिके मोहनि नखं न्हूगु उत्साह, उमंग व सकारात्मक ऊर्जा ब्वलनीगु विश्वास यानादीगु दु ।
वय्कलं कोरोना महामारीया संक्रमणं ल्यनेत सरकारं लागू याःगु जनस्वास्थ्यया मापदण्डयात पालना यानाः सचेत जुयाः नखः हनेत इनाप यानादीगु दु । उपराष्ट्रपति नन्दबहादुर पुनं समृद्ध राष्ट्र निर्माणया नितिं सकलें नेपामिपिन्त एकताबद्ध यानाः थवंथवय्या सहमति, ग्वहालि व सहकार्यया लँपुइ न्ह्यज्यायेत मोहनि नखं प्रेरित याइगु अपेक्षा यानाादीगु दु ।
अथेहे प्रधानमन्त्री शेरबहादुर देउवां विविधतायुक्त विशेषतायादथुइ एकता झीगु मौलिक पहिचान जूगुलिं सकलें जाति, भाषा, धर्म, संस्कृति व सभ्यता संरक्षण अले विकास यायेगु मंका दायित्व जूगु उल्लेख यानादीगु दु ।
वय्कलं थन्यागु नखं झीगु मूल्य, मान्यता व संस्कारयात थप क्वात्तुकीगुलिइ थः विश्वस्त जुयाच्वनागु धासें भिंतुनादीगु दु । थ्वहेदथुइ नेकपा माओवादी केन्द्रया नायः पुष्पकमल दाहाल प्रचण्डं बहुजातीय, बहुभाषिक, बहुसांस्कृतिक व बहुधार्मिक विविधतां जाःगु सुन्दर देशय् थःगु हे पहिचानयुक्त सांस्कृतिक धरोहरया हुनिं नेपाः आदिकालंनिसें स्वतन्त्र, अविभाज्य व एकताबद्ध राष्ट्र जुइत ताःलाःगु धयादीगु दु ।
वय्कलं सांस्कृतिक नखं नेपाली समाज व मानव जीवनय् भ्रातृत्व, भावनात्मक एकता व राष्ट्रिय गौरवया नितिं विशिष्ट योगदान बियाःवःगु तकं उल्लेख यानादीगु दु ।
मोहनि नखःया गुन्हुया दिं स्याक्वत्वाक्व
लहनान्यूज | कौलाथ्व नवमी ११४१, असोज २८ विहीबाः
थौं स्याक्वत्याक्व । मोहनि नखःया गुन्हुकुन्हु नेवाःतय् थीथी शक्तिपीठय् बाहाँ स्यानाः पूजा यायेमाःगु परम्परा दु ।
थौंकुन्हु तःधंगु नखः भाःपियाः नगर दुनेया अष्टमातृकायात तकं पूजा याइ । सुथं निसें फुक्क छेँय् न न्यांसमय् पूजा तया दक्वं द्यःपिन्त पूजा याः वनेगु चलन दु । नेवाः मिसातय् ह्यांगु वसतय् जाकी, स्वां, बजि, सिसाफल, मुस्यानिसें थीथी ज्वलं तयाः लिक्कया द्यःयाथ् पूजा वनीगु खः । थौं विशेषयाना स्याक्वत्याक्वया रुपय् मूख्यगु शक्तिपीठय् बाहां स्यानाः पूजा याइ ।
दुगु, ग्वंगः, हँय्नापंया वाहाँ स्यानाः पूजा यायेबलय् दछि तक थःगु मानव कूलय् विध्नवाधा मवइगु अले दुःख, कष्ट न्हनाःवनीगु मान्यता दु । शक्तिपीठनाप गुलिसिया ढुकुटिइ न वाहाँचा स्यानाः पूजा यायेमाःगु चलन दु ।
बाहाँ मस्याइपिन्सं नैंक्या जक छ्याना न पूजा यानावःगु दु । पूजाया झ्वलय् मोहनि नखःकुन्हु विशेष कथं तू चिकंनय् इताः च्याकाः सलि भपुइकाः मोहनि फ्वयेगु चलन दु । इतालं सलिइ कीगु हाकुगु मोहनि थौंकुन्हु विशेष महत्व बियाः तिइ । सिन्हः तीबलय् न गुलिसिया भ्वइसिन्हः तिइसा गुलिसिया जाकी सिन्हः ती । इपिं निताजि सिन्हः त्यूसां च्वये लाक्क हाकुगु मोहनि न तिकी । मोहनी नखःया ईलय् थ्व सिन्हः तीगु विशेष महत्व दु ।
असत्ययात सत्यं त्याकूगु दिंया लुमन्तिइ हाकु सिन्हः त्यूगु धाःपिं न दु । थौं हे थीथी कलपूर्जा, ढुकुटीइ स्वनातःगु हतियारनिसें सवारी साधन तकं पूजा याइ । सुथय् बाहाँ स्यानातःगुया बहनी सी भ्वय् नइ । झ्वःलाक्क फेतुना थकाली निसें छसिकथं कूलयापिं सकलें दुजः च्वनाः भ्वय् नइगु जूगुलिं थौंकुन्हु दछि तक बिस्कं च्वंपिं न नापं वया भ्वय् नःवइ ।
थ्वसिवे न्ह्यः म्हिगः कूछि भ्वय् नःगु दु । छखा हे छेँया छेँजःपिं मेमेगु ईलय् विस्कं च्वनाः नःसां कूछि भ्वय्कुन्हु छथाय् हे झ्वः लाक्क फेतुनाः भ्वय् नइगु जुयाः कूछि भ्वय् धाःगु छथ्व मनूतय्गु धापू दु । खय्त न कूलछिं च्वनाः नइगु भ्वय् हे ज्यलाःवनाः कूछि भ्वय् धाःगु खः ।
गुलिख्य अवस्थाय् केरा लप्टेय् बजियात कूछि अर्थात निमानाः दानाः भ्वय्ब्व छुइगु खः । अथेजुयाः न कूछि भ्वय् धाःगु धकाः धाइपिं न दु । थीथी ल्वसा घासा ज्वरे यानाः सभ्य तरिकां भ्वय् ब्वः छुनाः नइगु चलनं थवंथवय्या आत्मियता अप्वयेकी । थुलि जक मखु, मंका कथं ग्वसाःग्वइगु भ्वजं भातृत्व विकास यानाः सदासयता व सद्भाव ब्वलंकी ।
अथेजुयाः न मोहनि नखःया भ्वय्या विशेष महत्व बिया स्वयातःगु दु ।
