म्हिगः मङ्गलवाः ६९ अङ्कं घटे जूगु शेयर बजाः थौं बुधवाः धासा सामान्य थहावंगु दु।

नेप्से थौं १ दशमलव १४ अङ्क थहावना २ हजार ९ सय ७६ दशमलव ९८ विन्दुइ थ्यंगु दु। थौं बैंकिङ समूहया शेयर ८ अङ्कं थहावंगु दु, अथहे होटल १ सय ३० व जीवन बीमा समूहया शेयर ७४ अङ्कं थहावंगु दु।

फाइनान्स समूहया शेयर ९० अङ्क घटे जुगु दु। अथेहे विकास बैंक ४०, जलविद्युत २०, माइक्रोफाइनान्स ६, उत्पादनया साढे २ व मेमेगे समूहया शेयर साढे १ अङ्कं कुहावंगु दु।

थौं दकलय् अप्वो रुरु जलविद्युत् कम्पनीया शेयर साढे ७ प्रतिशतं थहावंगु दु सा खानीखोला हाइड्रोया शेयर झन्डै ८ प्रतिशतं घटे जुगु दु।

थौं २ सय २६ कम्पनीया १ करोड ७१ लाख कित्ता शेयर ९ अर्ब ३५ करोड रुपैयाँया कारोबार जुगु खः। दकलय् अप्वो अरुण भ्याली हाइड्रोया ६० करोड रुपैयाँ शेयर किनबेच जुगु खः।

स्वनिगलय् जारी जुयाच्वंगु निषेधाज्ञा थप छ्वासूकेगु कथं भदौ मसान्त तकया लागि थपे याउगु दु।

निषेधाज्ञाया इलय् भौतिक उपस्थितिइ शैक्षिक संस्था सञ्चालन याये दइ मखु। शैक्षिक संस्था सञ्चालन यायेमाःसा नेपाल सरकारं जारी याउगु स्मार्ट लकडाउनया प्रावधान दुने च्वना जिल्ला कोभिड–१९ सङ्कट व्यवस्थापन समिति नाप समन्वय याना पालिकां निर्णय याये फइ धका काठमाण्डा येँया प्रमुख जिल्ला अधिकारी कालीप्रसाद पराजुलीं जारी याउगु आदेशय् उल्लेख दु।

निषेधाज्ञाया इलय् जात्रा, सभा, जुलुस, महोत्सव, भ्वँय् याये दइमखु। नखः चखः साङ्केतिक रूपं हनेगु व व्यवसाय सञ्चालन यायेत स्वास्थ्य मापदण्ड अपने याना यायेत प्रशासन कार्यालयं इनाप याउगु दु। निर्माण सामग्रीया ढुवानी बहनि ९ बजे लिपा   सुथय् ५ बजे तक चले याये दइ।

कर्णालीइ नेकपा एमालेया स्वम्ह सांसदपिन्स नेकपा एकीकृत समाजवादी ल्यःगु दु।

मुगुया चन्द्रबहादुर शाही, रुकुम पश्चिमकी देवी ओली व जुम्लाया पदमबहादुर रोकायापिन्स नेकपा एकीकृत समाजवादी ल्यःगु दु।

सांसद ओलीं बुधबाः थः नाप स्वम्ह प्रदेश निर्वाचन कार्यालय वना नेकपा एकीकृत समाजवादी दल ल्ययागु धका जानकारी बिउगु दु। कर्णाली प्रदेशसभाय् नेकपा एमालेपाखे २० म्ह सांसद निर्वाचित जूगु खः।

उकि मध्ये फ्लोर क्रस यापिं प्यम्ह पदमुक्त जुइ धुकुगु खः। आः एमाले १६ म्ह सांसद कायम दुगुलिं स्वम्ह एकीकृत समाजवादी ल्यःगु खःसा आः एमालेय् सांसदपि १३ म्ह जक ल्यःदनिइ।

तयारी नेकपा (एमाले) न प्रतिनिधिसभाया सभामुख व निर्वाचन आयोगविरुद्ध रिट दर्ता यायेगु तयारी यागु दु।

थौं बहनि तक अदालत वनेगु तयारी जुयाच्वंगु दु धका एमाले सचेतक विशाल भट्टराई न जानकारी बिउगु दु। एमालेया केन्द्रीय कमिटी बैठकं हे सभामुख व निर्वाचन आयोगविरुद्ध कानुनी उपचार मालेगु निर्णय यायउगु दु।

एमाले न माधवकुमार नेपाल नाप १४ म्ह सांसदपिन्त कारबाही याउगु संसद् सचिवालय बुझे याःगु खः। तर, सभामुख अग्निप्रसाद सापकोटां सांसदपिन्त पदमुक्त यायेगु निर्णय मयाउगु धासे एमाले अदालत वनेगु तयारी दु।

अथेहे, निर्वाचन आयोगं कारबाही जूपि १४ म्ह सांसदपि नेकपा (एकीकृत समाजवादी) दर्ता याउगु खः। उगु निर्णय विवादास्पद जूगु धासे एमाले अदालत वनेत्यंगु खः।

वाग्मती प्रदेशया सामाजिक विकासमन्त्री कृष्ण शर्मा खनालं थःगु पदपाखे राजीनामा बिउगु दु।

नवगठित नेकपा एकीकृत समाजवादीया केन्द्रीय सदस्य तक जुयादीम्ह खनालं थौं सुथय् पदपाखे राजीनामा बिउगु दु।

वयकलं राजीनामा बिउवं आः प्रदेश सरकारया मुख्यमन्त्री अष्टलक्ष्मी शाक्य नाप आन्तरिक मामिला तथा कानुन नाप भौतिक पूर्वाधार विकासमन्त्री केशवराज पाण्डे जक ल्यःदनिइ।

मन्त्री खनालं म्हिगः हे बाग्मती प्रदेश निर्वाचन आयोगया कार्यालय हेटौंडाय् उपस्थित जुया नेकपा एकीकृत समाजवादीइ सनाखत यानादीगु खः।