नेकपा माओवादी केन्द्रया च्याक्वःगु महाधिवेशनया बन्द सत्रय् अध्यक्ष पुष्पकमल दाहाल प्रचण्डं पार्टीया केन्द्रीय समिति सदस्यपिनिगु नां प्रस्ताव याउगु दु।

प्रज्ञा भवनय् न्ह्यानाच्वंगु बन्द सत्रय् थौं आइतवाः सम्बोधन यासे अध्यक्ष प्रचण्डं केन्द्रीय सदस्यपिनिगु प्रस्तावित नां न्ह्यब्वइ धका माओवादी केन्द्रं धाउगु दु।

उगु नामय् सहमति मजूसा चुनावी प्रक्रियाय् वनेगु धका माओवादी केन्द्रं धाउगु दु। बन्द सत्रय् सम्बोधन यासे अध्यक्ष प्रचण्डं पार्टीयात समानुपातिक, समावेशी दयकेगु चुनौती दु धका धाउगु दु।

थौं शेयर बजाःया परिसूचक नेप्से ६० अङ्क स्वया अप्वो थहावंगु दु। नेप्से थौं आइतवाः ६० दशमलव ४१ अङ्क थहावना २ हजार ५ सय ८४ विन्दुइ थ्यःगु दु।

थौं कारोबार जूगु समूहमध्ये छगु समूहया जक शेयर घटे जुगु दु। म्युचल फन्डया शेयर शून्य दशमलव शून्य ६ अङ्कं घटे जुगु दु सा निर्जीवन बीमा समूहया शेयर दकलय् अप्वो ४ सय ११ अङ्कं थहावंगु दु।

अथेहे उत्पादन समूहया शेयर ३ सय ४८ अङ्क, जीवन बीमा समूहया शेयर ३ सय ४४, विकास बैंक समूहया शेयर १ सय ४४ अङ्क व माइक्रोफाइनान्स समूहया शेयर १ सय ४० अङ्कं थहावंगु दु।

२४० कम्पनीया ७१ लाख ६० हजार कित्ता शेयर ४ अर्ब १२ करोड रुपैयाँ न कारोबार जूगु दु। दकलय् अप्वो हिमालयन डिस्टिलरीया ४४ करोड रुपैयाँ बराबरया शेयर कारोबार जुगु दु।

वंगु २४ घण्टाया दुने देयन्यक थप २१६ म्हेसित कोरोना संक्रमण पुष्टि जूगु दु।

५ हजार ९६२ म्हेसिगु पीसीआर परीक्षण याउगुलि २१३ म्ह व १ हजार ६६९ म्हेसिगु एन्टीजेन परीक्षण याउगुलि स्वम्ह याना २१६ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् निम्ह सीउगु दु सा २०९ म्ह संक्रमणमुक्त जूगु दु।

लुँया भाः थौं हाकन थहावंगु दु।

लुँ तोला थौं न्ह्यसः थहावना तोलाया ९३ हजार ४ सय रुपैयाँ तोके याउगु दु धका नेपाल सुनचाँदी व्यवसायी महासङ्घं धाउगु दु।

अथेहे, थौं वहःया भा न थहावंगु दु। थौं वहः तोलां झीतका थहावना १२ सय ७० रुपैयाँ न कारोबार जुगु दु।

प्रतिनिधिसभाया मुँज्या थौं न्हिने १ ता इलय् च्वने धाःगु मुँज्या स्थगित जूगु दु ।

नेकपा माओवादी केन्द्रं थःपिं महाधिवेशनय् लिमलाइगु जूगु नि मुँज्या लिछ्यायेत इनाप याःगु हुनिं मुँज्या लिछ्यानागु संसद सचिवालय् न्ह्यथंगु दु । मुँज्या आः पुस २२ गते सःतुगु दु ।

थ्वयान्ह्यः मू प्रतिपक्ष दल नेकपा एमालें ताः ई निसें संसद मुँज्या अबरुद्ध यानावःगु दु । प्रतिपक्ष दलया सांसदतये पंगःया दथुइ सभामुखं संसदया ज्यापहः न्ह्याकावयाच्वंगु खः ।

कार्यव्यवस्था परामर्श समितिया मुँज्याय् संसद मुँज्या सुचारु यायेगु विषयलय् नं सहलह जुइगु सत्तारुढ दलया सांसदं जानकारी बिउगु खः । संसद सुचारु यायेगु विषयलय्  सरकार व सभामुखं कुतः याःसा नं सुथांलाये फूगु मदुनि ।

पार्टीं कारवाही याःम्ह माधव नेपाल लिर्सेया १४म्ह सांसदया पद खारेज जूगु सूचं टाँस मयाःगु धका एमालेया सांसदतयेसं मदिक्क संसदय् पंगः थनावःगु दु ।