नेकपा एकीकृत समाजवादी दल दर्ताया लागि निवेदन बिउम्ह नेकपा एमालेया नेतापि सनाखतया लागि निर्वाचन आयोगय् वंगु दु।माधवकुमार नेपाल लगायतया नेतापि आयोगय् थ्यंगु खः।

आयोगं सनाखतया लागि थौं सुथय् साढे ११ बजेनिसे २ बजे तकया ई बिगु खः। राजनीतिक दलसम्बन्धी अध्यादेश कथ दल विभाजनया लागि संसदीय दल वा केन्द्रीय कमिटीपिनिगु २० प्रतिशत माः।

नेकपा एकीकृत समाजवादी दर्ताया लागि निर्वाचन बिउपि नेतापि केन्द्रीय कमिटीया २० प्रतिशत थ्यकेत स्वंगु खः। दल दर्ताया लागि निवेदन बिगुलि एमालेय् २०३ म्ह सदस्यीय कमिटीया ५७ म्हेसिगु ल्हाचिं तःगु खः।

नेकपा एमाले नेता प्रदीप नेपाल माधवकुमार नेपालया नेतृत्वय् नेकपा एकीकृत समाजवादीपाखे वंगु दु।

दल दर्ताया लागि थःगु ल्हाचिं सनाखत यायेत नेपाल निर्वाचन आयोगय् थ्यकूगु खः। २ भदाय् नेपाल समूह न दल दर्ताया लागि निवेदन बिउगु इलय् नेता नेपालया नां न दुगु खः।

तर ओली पक्षया नेतापिन्स प्रदीप नेपालं एमाले मत्वतूगु धका धागु खः। नेता नेपालं न थःगु फेसबुकय थः माधव नेपालया मनू खः, तर खुदँ निसे कमिटी विहीन अवस्थाय् च्वनाच्वनगु दु धका धागु खः।

नेकपा एमाले न कारबाहीयापि १४ म्ह सांसदपिन्त पदमुक्त याये मागु माग यासे एमालेया सांसदपि थौं न सभामुखया कार्यकक्षय् वंगु दु। १४म्ह छाय् कारबाही मयानागु धका न्यनेगु लागि एमाले नेता रामबीर मानन्धरं धागु दु।

सभामुख अग्नि सापकोटाया कार्यकक्षय् मदु। मंगलबाः वायागु माइनर सर्जरी यागुलि थौं वयकःया निवासय् आराम याना च्वंगु दु धका सचिवालयं धागु दु।

सभामुखया कार्यकक्षय् मानन्धर नाप खगराज अधिकारी,शान्ता चौधरी, सूर्य पाठक, विद्या भट्टराई लगायतपि वंगु खः। माधव नेपाल नाप १४ म्ह सांसदपि कारबाही याये धुकूगु पौ एमाले संसद सचिवालयं बुझे यागु खः। तर आः तक सभामुखं कारबाहीया सूचं जारी मयागु धासे एमाले नेतापिन्स दबाब बिइत वंगु खः।

थ्व स्वया न्ह्यः न एमालेया सांसदपि सभामुखया कार्यकक्षय् वना दबाब बिउ वंगु खः।

नेपाली कांग्रेसया बरिष्ठ नेता रामचन्द्र पौडेल पक्षया जिल्ला सभापतिपि अनशनय् च्वंगु दु। क्रियाशील सदस्यया नां सार्वजनिक यायेमाःगु स्वंगु बुँदे माग तया जिल्ला सभापतिपिन्स २४ घण्टे रिले अनशन सुरु यागु दु।

पार्टी केन्द्रीय कार्यालय सानेपाय् मंगलबाः धर्नाय् च्वंपि जिल्ला सभापतिपिन्स पाटीयात थप दबाब बिइत रिले अनशन सुरु यानागु धका नुवाकोट जिल्लाया सभापति जगदिश्वर नरसिंह केसी न जानकारी बिगु दु। कांग्रेसं १४ क्वःगु महाधिवेशन मंसिर ९ निसे १३ तक यायेगु कार्यतालिका सार्वजनिक यागु खः।

वडा अधिवेशन वइगु १० दिं जक ल्यः दनिइगु सा निर्वाचन समितिं क्रियाशील सदस्यताया अन्तिम सूची बिगु मदुनि। पार्टी सभापति शेरबहादुर देउवां सदस्यता सूची निर्वाचन समितियात बुझे याये धुका नामावली सार्वजनिक यायेगु तयारी दु। कांग्रेसं थुगु पटक वेबसाइटय् सदस्यता इन्ट्री, उजुरी दर्ता यायेगु यानाना नां सार्वजनिक न वेबसाइटय् हे यायेगु तयारी दु।

नेकपा माओवादी केन्द्रं नेतापिनिगु जिम्मेवारी बाँडफाट यागु दु।

संगठन विभाग प्रमुखया जिम्मेवारी जनार्दन शर्मा ‘प्रभाकर’यात बिगु दु सा पार्टी प्रवक्ता पूर्वसभामुख कृष्णबहादुर महरायात दयकूगु दु। माओवादी केन्द्रं केन्द्रीय विभाग, प्रदेश इञ्चार्ज व सहइञ्चार्ज, जिल्ला इञ्चार्ज नाप जनवर्गीय संगठनया इञ्चार्ज न क्वछिगु दु।

पार्टीया स्कुल विभाग इन्चार्जय् अध्यक्ष प्रचण्ड थः हे च्वना प्रमुखय् गिरिराजमणि पोखरेलयात ल्यंगु दु। प्रवक्ता महरायात प्रचार व प्रकाशन विभाग व राष्ट्रिय सुरक्षा विभाग प्रमुखया जिम्मेवारी न बिगु दु। प्रदेश १ या इञ्चार्जय् सुरेन्द्र कार्की राम कार्की, प्रदेश २ या इञ्चार्जय् गणेश शाह, बागमती प्रदेशया इञ्चार्जय् हितमान शाक्ययात ल्यंगु दु।

अथेहे गण्डकी प्रदेशया इञ्चार्जय् हितराज पाण्डे, लुम्बिनी प्रदेशया इञ्चार्जय् चक्रपाणी खनाल ‘बलदेव’, कर्णाली प्रदेश इञ्चार्ज शक्ति बस्नेत व सुदूरपश्चिम प्रदेशया इञ्चार्जय् खगराज भट्टयात ल्यंगु दु। वर्षमान पुनयात अर्थ व योजना विभाग प्रमुख व केन्द्रीय कार्यालय इञ्चार्ज न दयकूगु दु। केन्द्रीय कार्यालयया सचिवय् श्रीराम ढकालयात यथावत यागु दु।

मातृका यादव उपभोक्ता हित व आपूर्ति विभाग, हरिबोल गजुरेल कृषि व भूमिसुधार विभाग, देव गुरुङ संघीय संसदीय विभाग प्रमुख व लिलामणि पोखरेलं जलस्रोत सिंचाइ व ऊर्जा विभाग प्रमुखया जिम्मेवारी बिगु दु। युवा तथा खेलकुद विभाग प्रमुख गणेशमान पुन, राजकीय मामला व सुशासन विभाग प्रमुख रेखा शर्मा व खानेपानी व सरसफाइ विभाग प्रमुख विना मगरयात बिगु दु।

अथेहे लिलामणि पोखरेलयात विशेष समिति इञ्चार्ज, डिलाराम आचार्ययात सम्पर्क समन्वय समिति इञ्चार्ज व नारायणकाजी श्रेष्ठयात प्रवास समिति इञ्चार्जया जिम्मेवारी बिगु दु। वाइसिएल नेपालया इञ्चार्ज व युवा विशेष जिल्ला समिति इञ्चार्जया जिम्मेवारी रामप्रसाद सापकोटा (दीपशिखा)यात बिगु दु।