लुम्बिनी बौद्ध विश्वविद्यालयया स्वक्वःगु दीक्षान्त समारोहय् जूगु दु।उगु दीक्षान्त समारोहय् निसः व ८९म्ह ब्वनामित दीक्षित जूगु खः।

विद्यावारिधिनापं थी थी सङ्कायया ब्वनामिपिन्त छगू ज्याझ्वः दथुइ प्रधानमन्त्री नापं विश्वविद्यालयया कुलपति केपी शर्मा ओलीपाखें दीक्षित याःगु खः।

उगु ज्याझ्वलय् प्रधानमन्त्री ओलीं धम्मावती गुरुमायात मानार्थ विद्यावारिधि लःल्हाःनादिगु खः। ९१ दँया गुरुमा नं बौद्ध धर्म, दर्शन व शिक्षाया विकासय् बियादिइगु ज्वःमदूगु योगदानया सम्मानयासें १७ क्वःगु विश्वविद्यालयसभां गुरुमायात व सम्मान देछायेगु क्वछ्यूगु खः।

येँ महानगरया बज्राचार्य गुरुजुपिनि अतिकं हनेबःम्ह ‘मूलचक्रेश्वर’ (देथाय्पा) मन्त्रसिद्धि महाविहारया ९५ दँया मोहन रत्न बज्राचार्य म्हिगः बिहिबाः बहनी आकाझाकां मन्त।

वय्कःया अन्तिम संस्कार थौं सुथय् ‘कर्ण दीप’य् बज्रयानी बौद्ध परम्पराकथं क्वचाये धुंकूगु दु।

अन्तिम संस्कार याये न्ह्यः येँया भिंmच्यागू महाविहारया बज्राचार्य गुरु गुरुमांपिं, दश महाविहार, झिखुगू बही सर्वसंघया शाक्य भिक्षुत व नेपाल परम्परागत बौद्ध धर्म संघया पदाधिकारीतय्गु पुचलं मदुम्ह मूलचक्रेश्वरया सुगति सुखावती भुवनय् बास लायेमाः धकाः कामना यासें दुर्गतिपरिशोधन धारणी पाठ याःगु खः।(रासस)

स्थानीय तह उपनिर्वाचनया मौन अवधि थनिंनिसें न्ह्याःगु दु। निर्वाचन आयोगं निर्वाचन प्रचारप्रसार याये मदूगु ई न्ह्याःगु खँ न्ह्यथँसें उपनिर्वाचनयात, स्वच्छ, स्वतन्त्र, निष्पक्ष, विश्वसनीय व भयरहित लकसय् क्वचायेकेत सकसितं इनाप याःगु दु।

स्थानीय तहया भोट कुर्केगु न्हिसिबें ४८ घौ न्ह्यवंनिसें भोट निनेगु ज्या मसिधःतक लागु जुइगु निर्वाचन प्रचारप्रसार निषेधया ई थ्वहे मंसिर १३ गते चान्हय् १२ ताः ई निसें न्ह्याःगु आयोगं धाःगु दु।निर्वाचन कसुर व सजाय ऐन, २०७२ या दफा २४ उपदफा ५ व निर्वाचन आचारसंहिता २०७९ या दफा १७ कथं थुगु इलय् राजनीतिक दलया पदाधिकारी, उम्मेदवार, दलया कचाः खलः व सम्बन्धित मनूतय्सं निर्वाचन आचारसंहिता हाचांगाया छुं ज्या मयायेत इनाप याःगु दु।

मौन अवधिइ सुं नं उम्मेदवार वा राजनीतिक दलया पक्ष व विपक्षय् भोट कुर्केगु बाय् मकुर्केगु ताः तया सभा न्ह्याकेगु, जुलुस पिकायेगु बाय् अज्यागु हे मेगु छुं ज्या मयायेत नं आयोगं इनाप याःगु दु। अथेहे, अनलाइन, छापा वा मेगु छुं ज्वलंतपाखें भोट फ्वनेगु व सामाजिक सञ्जालया माध्यमं नुगः खँ तयेगु, भोट फ्वनेगु व मेपिंत ‘शेयर’ यायेगु ज्या मयायेत आयोगया प्रवक्ता नीता पोखरेल अर्यालं सचेत यानादीगु दु।

निर्वाचन प्रचारप्रसार यायेमदूगु इलय् न्ह्यथनातःगु छुं नं गतिविधि जूगु खनेदुसा केन्द्रीय आचारसंहिता अनुगमन समिति, आचारसंहिता अनुगमन पुचः, जिल्ला आचारसंहिता अनुगमन समिति, स्थानीय प्रशासन, सुरक्षाकःमि, अनुगमन अधिकृतपाखें न्हापं सुक्ष्म अनुगमन यानाः कारबाही यायेफइगु आयोगं धाःगु दु। निर्वाचन आचारसंहिता हाचांगागु खनेदुसा तुरुन्तहे कानुनकथं कारबाही याना मू निर्वाचन अधिकृतया ज्याकुथि, निर्वाचन आयोगय् जानकारी बिइत आयोगं इनाप याःगु दु (रासस)

परराष्ट्रमन्त्री डा आरजु राणा देउवां थौं चीनया सिचुवान प्रान्तया छन्दुइ च्वंगु नेपाःया महावाणिज्यदूतावासय् निरीक्षण यानादीगु दु।

उगु झ्वलय् वय्कःयात महावाणिज्यदूत सुरेश राउतलिसेंया कर्मचारीपाखे लसकुस यानादीगु खः। मन्त्री डा राणायात महावाणिज्यदूत राउतं महावाणिज्यदूतावासया ज्याखँया बारे ध्वाथुइकादीगु परराष्ट्रमन्त्रीया सचिवालयं धाःगु दु मन्त्री डा राणां वइगु दँय् नेपाः व चीन दथुइ औपचारिक कूटनीतिक स्वापू नीस्वंगु ७० क्वःगु वार्षिकोत्सवया झ्वलय् नेपाः व चीन सरकारपाखें मंकाः कथं घोषणा जूगु नेपाः भ्रमण दँ २०२५ यात लुमंकाबिसें थुगु पृष्ठभूमिइ महावाणिज्यदूतावास यात नेपाःया पर्यटन प्रवद्र्धनया ज्याझ्वः न्ह्याकेत धयादीगु खः।

थुगु ज्याझ्वपाखें निगुलिं देय्या पर्यटन प्रवद्र्धन जुइगु लिसें जनस्तरया स्वापूयात अझ बल्लाकीगु भलसा वय्कलं प्वंकादिल। मन्त्री डा राणां नेपाःया च्या, कफी, वासः नापं नस्वाःगु जडीबुटी थें जाःगु नेपाःया विशिष्ट उत्पादनयात चिनियाँ बजारय् प्रवद्र्धनया ज्या न्ह्याकेत उजं नं बियादिल।

उगु झ्वलय् मन्त्री डा राणां नेपाः चीन सम्बन्धयात आर्थिक, सांस्कृतिक नापं जनस्तरय् थप भिंकायंकेमाःगुलिइ बः बियादीगु खः। महावाणिज्यदूतावासय् ग्वसाः ग्वःगु उगु अन्तरक्रियाय् चीनया निंतिं नेपाःया राजदूत डा कृष्णप्रसाद ओली नं ब्वति कयादीगु परराष्ट्र मन्त्रालयं धाःगु दु। (रासस)

स्वास्थ्य नापं जनसङ्ख्यामन्त्री प्रदीप पौडेलं सुस्मा कोइराला मेमोरियल अस्पतालयात जलन अस्पतालया कथं विकास यायेत्यंगु न्ह्यथनादीगु दु।

येँया शङ्खरापुर नगरपालिकाया साँखुइ च्वंगु अस्पतालया संस्थापक देशीय निर्देशक हाइन स्टालयात बिदाइ नापं न्हूम्ह देशीय निर्देशक अल्बर्ट बेन्जिनयात लसकुस यायेत बिहीबाः ग्वसाः ग्वःगु ज्याझ्वलय् मन्त्री पौडेलं सरकारं लिपांगु इलय् जलन उपचारयात प्राथमिकता बियाः ज्या न्ह्यानाच्वंगु खँ कनादीगु खः।

वय्कलं धयादिल, “सुस्मा कोइराला मेमोरियल अस्पताल जलन उपचारया निंतिं छगू विशिष्टिकृत अस्पताल खः, सरकारं निकतिनि थें हे देय्न्यंकया च्यागू अस्पतालय् जलन उपचार यायेफइगु अस्पताल कथं घोषणा याःगु खः, थुकिइ सुस्मा कोइराला अस्पतालयात तकं स्वानाः न्ह्याःवने फइ।” स्वास्थ्यमन्त्री पौडेलं जर्मनतय्गु ग्वाहालिं सुस्मा कोइराला मेमोरियल ट्रष्टपाखें न्ह्याकाःवयाच्वंगु उगु अस्पतालं मेमेगु अस्पतालय् ज्या यानाच्वंपिं चिकित्सक व परिचारिकातय्त जलन उपचारसम्बन्धी तालिम बिइफइगु धयादीगु खः।

जलन उपचारया नेतृत्व सुस्मा कोइराला अस्पतालं याये फइगु वय्कःया धापू खः। ज्याझ्वलय् पूर्व उपप्रधानमन्त्री सुजाता कोइरालां न्हापांगु इलय् दुर्गम थासय् अस्पताल चायेकेत तसकं समस्या फयेमाःगु खँ कनादिल । न्हापा देय्न्यंक हे जलनया उपचार मदयाः उगु अस्पताल नीस्वंगु वय्कःया धापू खः।

जर्मनीया ग्वाहालिं न्ह्यानाच्वंगु उगु अस्पतालं आःतक १५ द्वः ३ सः व ७५ म्हसिगु सित्तिकं वासः तकं यायेधुंकूगु दु। च्याम्ह डाक्टर नापं कर्मचारीतपाखें न्ह्याःगु उगु अस्पतालय् थौंकन्हय् १०० म्ह कर्मचारीत ज्या यानाच्वंगु अस्पतालया प्रशासन प्रमुख प्रफुल्ल शर्मां धयादिल।