न्हुगु बानेश्वरय् जुगु प्रदर्शनया झ्वलय् कान्तिपुर टिभीया पत्रकार घाःपाः जूगु दु। जेनजीया प्रदर्शन याःगुलि श्याम श्रेष्ठयात रवरया गोली लागु खः।

सिभिल अस्पतालय् वास याकाच्वंगु दु।

औपचारिक भ्रमणय् झायाच्वनादीम्ह प्रधानमन्त्री केपी शर्मा ओली व चिनियाँ उपराष्ट्रपति हान चङ्गदथुइ निगूपक्षीय खँल्हाबल्हा जूगु दु।

बेइजिङया सरकारी पाहाँछेँ देउथाई स्टेट गेष्टहाउसय् थौं नाप लायेगु झ्वलय् वय्कःपिं दथुइ निगूपक्षीय थवंथः हितया थी थी विषय खँल्हाबल्हा जूगु परराष्ट्र मन्त्रालयं धाःगु दु। नापलायेगु झ्वलय् चिनियाँ पक्षं निगूपक्षीय कूटनीतिक सम्बन्ध तब्याकेगु लिसें निगुलिं देय्यात लाभ जुइगु आयोजना न्ह्याकेगु विषयय् सहलह याःगु खः। अथे हे नेपाःया पक्षं औपचारिक भ्रमणया निंतिं ब्वना ब्यूगुलिं व उच्चस्तरीय खँल्हाबल्हाया निंतिं चीन सरकारयात आभार प्वंकूगु खः।

प्रधानमन्त्री ओलीं शाङ्घाई सहयोग सङ्गठन (एससिओ) बैठक उपलब्धिमूलक जूगु धारणा प्वंकादिल।नाप लायेगु झ्वलय् नेपाःया पक्षं छगू चीन नीतिप्रति स्पष्ट दूगु दोहोरे यानाः चीनयाविरुद्ध थःगु भूमि छ्यलेमबीगु प्रतिबद्धता प्वंकूगु खः। थौं हे उपराष्ट्रपति हानं नेपाःया प्रतिनिधिमण्डलया लसकुसय् बहनी भ्वय् ग्वसाः ग्वयादीगु खः।

थियानजिन सहरय् ग्वसाःग्वःगु शाङ्घाई सहयोग सङ्गठन (एससिओ) प्लसया शिखर सम्मेलन क्वचायेधुंकाः प्रधानमन्त्री ओली थौं हे बेइजिङ झायादीगु खः।

सञ्चार नापं सूचना प्रविधिमन्त्री पृथ्वी सुब्बा गुरुङं नेपाःलिसे श्रम सम्झौता जुयाच्वंगु देशय् अनिवार्य रूपं हुलाक सेवा सम्झौता यायेमाःगु धयादीगु दु।

हुलाक सेवा विभागं थौं थन ग्वसाः ग्वःगु वार्षिक प्रगति समीक्षाय् वय्कलं हुलाकया व्यावसायिक सम्भावना ‘पार्सल डेलिभरी’ जूगु धयादिसें विदेशय् च्वनाच्वंपिं नेपाःमितक थ्व सेवा तब्याकेत श्रम सम्झौता जुयाच्वंगु देशय् हुलाक थ्यनेमाःगुलिइ बः बियादिल। पार्सल सेवायात भलसा यायेल्वःगु दयेकेमाःगु जरुरी जूगु वय्कलं धयादिल।

मन्त्री गुरुङं फुक्क पालिकातय्त ‘डिजिटलाइजेसन’ यायेत व ‘स्मार्ट’ हुलाक ज्याकुथि सञ्चालन यायेत निर्देशन बियादिसें वय्कलं धयादिल, “आः हुलाक स्मार्ट जुइमाः, सूचना प्रविधियात फयांफक्व छ्यलाः ईकथं रुपान्तरण जुइमाः।” सरकारया प्रवक्ता संचारमन्त्री गुरुङं हुलाक सेवायात प्रभावकारी यायेत विभागयात आवश्यक जूगु पूर्वाधार निर्माण नापं आवश्यकता कथं मेमेगु ग्वाहालि यायेत थः न्ह्याबलें सकारात्मक दूगु धयादिल।

सञ्चार नापं सूचना प्रविधि मन्त्रालयया सचिव राधिका अर्यालं हुलाकया न्हापाया गौरवं जाःगु गाथायात नालाः हुलाकयात युगानुकूल दयेकेत ऐन, कानुन परिमार्जन न्ह्याकेधुंकूगु धयादि। हुलाकया प्रशासनिक नापं व्यवस्थापकीय समस्या मदयेकेत थः न्ह्याबलें तत्पर दूगु वय्कलं कनादिल।विभागया महानिर्देशक मनमाया भट्टराई पँगेनीं हुलाक सेवायात स्मार्ट दयेकेत थः जुयाच्वनागु धयादिल।

उगु झ्वलय् विभागया निर्देशक धव्रराज आचार्यं विभागया ज्याखँबारे जानकारी बियादिल।

यल महानगरपालिका प्रमुख चिरीबाबु महर्जनयात ‘एक्सिलेन्स अर्वान गभर्नेन्स अवार्ड’ पाखें हंगु दु।

सिजन मिडियाया १७ क्वःगु वार्षिकोत्सवया लसताय् थन ग्वसाः ग्वःगु एसियाली देसय् थीथी लजगाःखय् च्वन्ह्याःगु ज्या यानाच्वंपिं राष्ट्रिय लिसें अन्तरराष्ट्रिय व्यक्तित्वया सम्मान ज्याझ्वलय् आधुनिक विकास व सांस्कृतिक संरक्षण दथुइ सन्तुलन यानाः नेतृत्व यानादीगुलिं महर्जनयात उगु अवार्ड लःल्हाःगु खः।

यलयात च्वने बहःगु सम्पदामैत्री सहरया कथं विकास यायेत योगदान बियादीगुलिं एक्सिलेन्स अर्वान गभर्नेन्स अवार्डपाखें हनागु धकाः सिजन मिडियाया नायः प्रदीपराज वन्तं धयादिल। वय्कःया कथं महानगरप्रमुख महर्जनयात पूर्वप्रधानमन्त्री लिसें नेपाल कम्युनिष्ट पार्टी (माओवादी केन्द्र)या नायः पुष्पकमल दाहाल ‘प्रचण्डं’ अवार्ड लःल्हानादीगु खः।

यल महानगरया प्रमुख पदय् निगू कार्यकाल निर्वाचित जुयादीम्ह महर्जनं नेपाःया ७५३ गूलिं स्थानीय तहया प्रमुखमध्ये समर्पित, प्रतिबद्ध, इमानदार नेतृत्वया कथं स्थापित जुयाः आधुनिकीकरण नाप नापं सांस्कृतिक परम्परायात व सम्पदायात सुरक्षित तया तयेत बः बियाः वया च्वनादीगु दु।