गृहमन्त्री रमेश लेखकं राजीनामा म्हिगः ब्यूगु दु।

म्हिगः सोमवाः गृहमन्त्री लेखकं जेनजी याःगु प्रदर्शनया झ्वलय् प्रहरीया गोलीं १९ म्ह सीगुलि नैतिक जिम्मेवारी कासें राजीनामा ब्यूगु खः।

सोमवाः बहनि कांग्रेसया बैठक लिपा बालुवाटार मन्त्रिपरिषदय् लेखकं राजीनामा लःल्हागु खः।

जेनजीया सम्भावित प्रदर्शनयात लक्षित यासे रुपन्देही जिल्ला यकं अनिश्चितकालीन निषेधाज्ञा जारी याःगु दु।

जिल्ला प्रशासन कार्यालय रुपन्देही न मंगलवाः सुथय् छगु सूचं पिकया निषेधाज्ञा जारी याःगु दु। प्रमुख जिल्ला अधिकारी डा. टोकराज पाण्डे न जारी याःगु आदेशय् रुपन्देही जिल्लाया प्रदर्शन, जुलुस, हुल दंगा व झडप जुइफइगु जुगुलि थौ सुथय् ९.३० बजे निसे मेगु आदेश मवतले रुपन्देही जिल्लायकं निषेधाज्ञा लागू जुइ धका जानकारी ब्यूगु दु।

जिल्ला प्रशासन कार्यालय यलय् थौ सुथय् ७ बजेनिसे चान्ह्य १२ बजेतक कफ्र्यु जुइगु ई थपे याःगु दु।

प्रमुख जिल्ला अधिकारी सुमन घिमिरे न यल महानगरपालिका वडा नम्बर २, ४, ९, १८ व २५ दुने प्यंगु किल्ला तोके याना कफ्र्यु आदेश जारी दु धका जानकारी ब्यूगु दु।

वडा नम्बर ४, १८ व २५ भैंसेपाटी दुने ला।

जिल्ला प्रशासन कार्यालय येँ न चक्रपथ दुने  कर्फ्यु तःगु दु। थौ सुथय् ८ः३० बजेनिसे लागू जुइगु कथं मेगु आदेश मवतलें चक्रपथ दुने कफ्र्यु आदेश जारी याःगु दु धका येँ प्रमुख जिल्ला अधिकारी छविलाल रिजालं धाःगु दु।

म्हिगः जेनजी युवा तयेगु प्रदर्शनलिपा कफ्र्युया ई थौ सुथय् ५ बजे क्वचागु खः।

थौ सुथय् ८ः३० बजे निसे अनिश्चितकालया निति कफ्र्यु तःगु दु।प्रजिअ रिजालया कथं येँ महानगरपालिकाया बालकुमारी ताँनिसे कोटेश्वर चोक, सिनामंल, गौशाला, चाबहिल, नारायणगोपाल चोक, गोंगबु, बालाजु, स्वयम्भु, कलंकी, बल्खु जुया बागमती ताँतक चक्रपथ दुने दक्को थासय् कफ्र्यु तःगु दु।

येँ महानगरपालिकां स्वन्हुगु तक स्कूल बन्द यायेगु निर्णय याःगु दु।

जेन–जीया आन्दोलनया कारण असहज स्थितिइ महानगरं थौ मंगलवाःनिसे स्वन्हुतक स्कूल बन्द यायेगु निर्णय याःगु दु।