प्रधानमन्त्री केपी शर्मा ओलीं सर्वदलीय बैठकया इनाप यानादीगु दु। जेनजीया आन्दोलन तःच्वयेवं प्रधानमन्त्रीं थौ बहनि ६ बजेया निति सर्वदलीय बैठक आह्वान याःगु खः।

प्रधानमन्त्रीं अपिल यानादीसे छु न हिंसा राष्ट्रया हितय् मजुइगु व शान्तिपूर्ण लिसे संवादया माध्यमपाखे समाधान मालेगु उपयुक्त विकल्प जुइ धका धयादीगु खः। देय् थीथी थासय् जुयाच्वंगु प्रदर्शन व लिपागु घटनाय् थः तसक दुखी जुयादीगु धका धयादीगु खः।

नेपाली कांग्रेसया महामन्त्री विश्वप्रकाश शर्मा न प्रधानमन्त्री केपी शर्मा ओलीयात राजीनामा बिइत इनाप याःगु दु। शर्मा न धाःगु दु,‘प्रधानमन्त्रीजु याकन राजीनामा बियादीसँ। अबोध युवा तयेगु अमुल्य जीवनया निर्मम सिधेकेगु असहनिय जूगु दु।

जेनजी नाप नवीन राष्ट्र सहमति निर्माण यायेनु। शर्मां दक्को उच्च नेतृत्वया सम्पत्ति छानबिन यायेत उच्चस्तरीय आयोग व भ्रष्टाचारया प्रत्येक मुद्दाय् कठोर कानुनी कार्वाही सुनिश्चि यायेमाः धका धाःगु दु।

नेपाली कांग्रेसया सभापति शेरबहादुर देउवाया छेँय् प्रदर्शनकारी तय्स मिँ तयाबिउगु दु। मुख्य गेट तछ्याना छेँ दुहावना प्रदर्शनकारी तय्स छेँ दुने वना हे मिँ तयाबिउगु खः।

प्रदर्शनकारी तय्स थौ हे देउवाया जहान आरजु राणा देउवाया छेँ धनगढीस्थित निवासय् न मिँ तयाबिउगु दु। अथेहे प्रदर्शनकारी तय्स कांग्रेस नेता नाप पूर्वगृहमन्त्री रमेश लेखकया छेँ नैकापय् न मिँ तयाबिउगु दु।

जुयाः नेपाल रेडक्रस सोसाइटी झापा शाखां ७१ पिन्ट हि येँय् छ्वःगु दु। नेपाल रेडक्रस सोसाइटी झापा शाखा सभापति लोकराज ढकालया कथं बुद्ध एयरया थौं सुथसिया ७ः१५या उडानपाखें हि छ्वःगु खः।

येँय् सोमवाः थीथी माग तयाः ‘जेनजी’ पुस्तां याःगु आन्दोलनया झ्वलय् घाःपाः जूपिनिगु वासः यायेगु झ्वलय् हिया अभाव जुइके मबीत झापां हि येँय् छ्वयागु धकाः सभापति ढकालं धयादिल। जेनजी पुस्तां सोमवाः झापाय् नापं आन्दोलन याःगु खः।

उगु झ्वलय् दमकय् छुं युवात घाःपाः जूगु खः। जिल्ला प्रशासन ज्याकुथिं म्हिगः बहनीनिसें थौं सुथसिया ५ ताः ईतकया निंतिं दमक व बिर्तामोडय् निषेधाज्ञा जारी याःगु खः।

निषेधाज्ञा थौं सुथय्निसें चिइकूगु प्रमुख जिल्ला अधिकारी गोपालकुमार अधिकारीं धयादिल।

राष्ट्रिय ट्रमा सेन्टरय् वासः याकेत यंकूपिं मध्ये च्याम्ह सीगु दुसा आःतक न्याम्हेसिया म्हसिका सिइदूगु दु।

सेन्टरया कथं थ्यंमथ्यं १९दँ दुम्ह ग्लोबल कलेजया विद्यार्थी श्रीयाम चौलागाईँ, बाँकेया सुलभराज श्रेष्ठ, येँ किपूया बुद्धि तामाङ, येँ वनस्थलीया स्टप अधिकारी व गौरव जोशीया म्हसिका सिइदूगु खः। मेपिनिगु म्हसिकासिइके मपूmनीगु सेन्टरया प्रमुख मेडिकल सुपरिटेण्डेन्ट डा बद्री रिजालं धयादिगु दु। वय्कःया कथं ट्रमा सेन्टरय् वासः याकेत ५६ म्ह घाःपाः जूपिं थ्यंगु खः।

स्वास्थ्य लिसें जनसङ्ख्या मन्त्रालयया कथं सोमबाःया जेनजी पुस्ताया प्रदर्शनय् प्रहरीया गोली लानाः १९ म्ह सीगु दुसा ४२१ म्ह घाःपाः जूगु दु। येँया सिभिल अस्पतालय् स्वम्ह, ट्रमा सेन्टरय् च्याम्ह, एभरेष्ट अस्पतालय् स्वम्ह, केएमसीइ निम्ह, त्रिवि शिक्षण अस्पतालय् छम्ह, बिपी कोइराला स्वास्थ्य विज्ञान प्रतिष्ठान धरानय् वासः याकेगु झ्वलय् निम्ह सीगु दु। सरकारं जेनजीया प्रदर्शनया झ्वलय् घाःपाः जूपिनिगु निःशुल्क वासःया प्रबन्ध यायेगु निर्णय याये धुंकूगु दु।

सोमवाःया मन्त्रिपरिषद् बैठकं वासः यायेगु व्यवस्था मिले यायेत स्वास्थ्य लिसें जनसङ्ख्या मन्त्रालययात निर्देशन ब्यूगु दु।