भुटानं बिगु कोभिड १९ विरुद्धया एस्ट्राजेनेकाया ३ लख डोज खोप येँ थ्यंगु दु।

खोप ज्वना थिम्पुया पारो विमानस्थलपाखे ड्रुक एयरया कार्गो विमान थौं शुक्रबाः सुथय् ९ः४० बजे त्रिभुवन अन्तराष्ट्रिय विमानस्थल अवतरण यागु दु। स्वास्थ्य सेवा विभागं शनिबाः भुटापाखे खोप वइ धका धागु खःसा छन्हु न्ह्यः हे भुटानं खोप छ्वया हःगु खः।

भुटानपाखे एस्ट्राजेनेका खोप वःगुलि थुगु खोप कोभिशिल्डया न्हापागु मात्रा कायेधुकुपिन्स निगु मात्रा काये मखपि नागरिकयात प्राथमिकता बिइगु धका विभागं धागु दु।

खोप मदुगलि आःतक साढे ९ लाख स्वया अप्वो जेष्ठ नागरिकपिन्स १३ लाख ३८ हजार निगुगु मात्रा काये खगुमदुनि। वइगु निवाः दुने जापानपाखे १६ लाख डोज एस्ट्राजेनेका खोप वलकि निगुगु डोज कायेल्यं दनिपि जेष्ठ नागरिकयात बिइगु विभागं धागु दु।

सत्तारुढ दलया कार्यदलं सरकारया न्यूनतम साझा कार्यक्रम शीर्ष नेतापिन्त बुझे यागु दु।

आः नेतापिन्स अध्ययन याना फाइनल याना व याकन हे सार्वजनिक याइगु धका नेतापिन्स धाःगु दु। नेपाली कांग्रेसया महामन्त्री पूर्णबहादुर खड्काया नेतृत्व कार्यदलं तयार यागु मस्यौदाय् स्वास्थ्य सामाग्री खरिद जुगु अनियमिताया छानविन यायेगु व दोषीयात कानूनी कारबाही यायेगु उल्लेख दु।

अथेहे शान्ति प्रक्रियाया ल्यः दनिइगु बाँकी ज्यायात न याकन सम्पन्न यायेगु सत्य निरुपण व मेलमिलाप नाप वेपत्ता जूपि मनूपिनिगु छानविन आयोगं ऐन संशोधन यायेगु न्यूनतम साझा कार्यक्रमय् दुथ्याकूगु दु।

राजनीतिक सहमतिया आधारय् संविधान संशोधन यायेगु, लाल आयोगया प्रतिवेदन सार्वजनिक यायेगु, मधेस आन्दोलनया इलय् तःगु मुद्दा पुनरावलोकन यायेगु अन्यायपूर्वक बन्दी दयकूपिन्त रिहा यायेगु कार्यदलया छम्ह सदस्यपिन्स धागु दु।

स्वास्थ्य तथा जनसंख्या मन्त्रालयया कथं थौं दकलय् अप्वो येँ जक ७६६ म्हेसित कोरोना सक्रमण जुगु दु।

अथेहे, झापाय् ३७४, चितवनय् २६१, मोरङय् १६८, यलय् १६३, ख्वपय् १४६ व काभ्रेपलाञ्चोकय् ११० म्हेसित कोरोना संक्रमण पुष्टि जुगु दु।

अथेहे कास्कीइ ९३, बागलुङ ९७, सुनसरीइ ८४, मकवानपुर व नवलपरासी पूर्वय् ७६÷७६ म्ह, रुपन्देहीइ ५८, दोलखाय् ५१, नुवाकोटय् ४८, सुर्खेतय् ४० म्ह कोरोना संक्रमितपि थपे जुगु दु।

स्याङजाय् ३६, कैलालीइ २७, बाँकय् २५, लमजुङय् १८, म्याग्दी व पाल्पाय् १७÷१७ म्ह, धनकुटाय् १५ म्हेसित कोरोना संक्रमण पुष्टि जुगु दु धका मन्त्रालयं धागु दु।

वंगु २४ घण्टाया दुने देयन्यक थप ३,९३८ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ११,८७० म्हेसित पीसीआर परीक्षण यागुलि ३००७ म्ह व ६,५३८ म्ह एन्टिजेन परीक्षणय् ९३१ म्ह याना ३९३८ म्हेसित संक्रमण पुष्टि जुगु दु।

मन्त्रालयया कथं वंगु २४ घण्टाया दुने कोरोना संक्रमणमुक्त जूपि २०१२ म्ह दु सा ३७ म्ह सीगु दु। थ्व नाप आःतक नेपालय् कोरोना संक्रमित जूपि ७ लाख ८ हजार ७९ म्ह थ्यंगु दु।

उकि मध्ये ९ हजार ९९४ म्ह सी धुकुगु दु सा ६ लाख ६३ हजार ६६३ म्ह संक्रमणमुक्त जुइ धुकुगु दु।

सरकारं थ्व हे वइगु साउन २५ निसे ३२ गते तक ‘खोप सप्ताह’ माने याइगु जुगु दु।

संसदया शिक्षा तथा स्वास्थ्य समितिं बिहीबाः च्वंगु बैठकय् न्ववासे स्वास्थ्य तथा जनसंख्या राज्यमन्त्री उमेश श्रेष्ठं साउन २५ गतेनिसे खोप सप्ताह माने यायेगु जानकारी बिगु दु।

उगु इलय् जापानपाखे वंगु ८ लाख व भुटानपाखे वंगु ३ लाख डोज कोरोना विरुद्धया खोप बिइगु धका धागु दु। निगु देशपाखे शनिबाः व आइतबाः तक खोप वय धुकिइ धका राज्यमन्त्री श्रेष्ठ जानकारी बिगु दु।

वइगु असोज तक १ करोड ५ लाख डोज खोप वइ धका धागु दु। राज्यमन्त्री श्रेष्ठं मस्तयत फाइजरया ६० लाख डोज खोप हयेगु प्रक्रिया न न्ह्याः वने धुकुगु दु धका जानकारी बिगु दु।