जिल्ला प्रशासन कार्यालय येँ न साउन २७ गते तक निषेधाज्ञा थप यागु दु।

प्रमुख जिल्ला अधिकारी कालीप्रसाद पराजुलीं थौं मंगलबाः छगु आदेश जारी यासे साउन २१ गते निसे २७ गते तक निषेधाज्ञा जारी यागु दु।

निषेधाज्ञाया इलय् सभा, सम्मेलन, पार्टी प्यालेस, सिनेमा हल, रेष्टुरेन्ट, डान्सबार, दोहोरी, नाचघर, क्लव, स्वीमिङ पुल, मनोरञ्जन स्थान, संग्रहालय, रंगशालाय् दर्शक सहितया कासा व मनूपिनिगु हुलमुल नाप मेमेगु ज्याझ्व सञ्चालन यायेत प्रतिवन्ध तःगु दु।

सरकारं नेपाल विद्युत प्राधिकरणया कार्यकारी निर्देशकय् हाकन कुलमान घिसिङयात हयेगु तयारी यागु दु।

ऊर्जा, जलस्रोत तथा सिञ्चाइ मन्त्री पम्फा भुसालं मंगलबाः जक प्राधिकरणया कार्यकारी निर्देशक हितेन्द्रदेव शाक्ययागु राजीनामा बिया ग्वाहालि यायेत इनाप यागु खः। मन्त्री भुसालं बालुवाटारय् प्रधानमन्त्री शेरबहादुर देउवाया हे उपस्थितिइ कार्यकारी निर्देशक शाक्ययात सःता राजीनामा फ्वंगु खः।

कार्यकारी निर्देशक शाक्यं धासा छु न लिसः बिगु मदुनि। तर प्रधानमन्त्री देउवा राजीनामा मफ्वतले बिइ मखु धका स्रोत पाखे धागु दु। प्रधानमन्त्रीया निजी सचिवालयं धासा शाक्य हटे जुलकि कुलमान घिसिङयात नियुक्त यायेगु प्रक्रिया न्ह्यने यकेत उर्जा मन्त्रीयात निर्देशन बिगु दु धका धागु दु।

कुलमान घिसिङयात प्राधिकरणय् लित हयेत नेकपा माओवादीया अध्यक्ष पुष्पकमल दाहाल ‘प्रचण्ड’ न प्रधानमन्त्री देउबा नाप छलफल याये धुकुगु दु।

सरकारं नेपाल विद्युत प्राधिकरणया कार्यकारी निर्देशक हितेन्द्रदेव शाक्ययागु राजीनामा फ्वंगु दु।

मंगलबाः प्रधानमन्त्री शेरबहादुर देउबाया उपस्थितिइ जलस्रोत, ऊर्जा तथा सिँचाइमन्त्री पम्फा भुसालं आःतकया कार्यसम्पादन सन्तोषजनक मजू धासे पदपाखे हटे जुया ग्वाहाल

यायेत शाक्यनाप इनाप यागु दु धका स्रोतपाखे धागु दु। २०७७ माघ  २७ गते शाक्य नेपाल विद्युत् प्राधिकरणया कार्यकारी निर्देशकय् नियुक्त जुगु खः। व स्वया न्ह्यः २०७७ कात्तिक २१ पाखे कायममुकायम कार्यकारी निर्देशकया जिम्मेवारी कयातःगु खः। उपकार्यकारी निर्देशक शाक्ययात ‘एनईए इन्जिनियरिङ कम्पनी’ पाखे काजय् लितछ्वया नियुक्ति बिगु खः। तत्कालीन ऊर्जामन्त्री वर्षमान पुनं कुलमान घिसिङया कार्यकाल क्वचागुलिं प्राधिकरण हाजिर यानाच्वम्ह उपकार्यकारी मध्येपाखे लेखनाथ कोइरालायात वरिष्ठताया आधारय् निमित्तया जिम्मेवारी बिगु खः।

शाक्ययात सरकारं प्यदँया लागि कार्यकारी निर्देशक पदय् नियुक्त यागु खः।

जिल्ला प्रशासन कार्यालय येँ न लिपागु इलय् हुलमुल जुइगु अप्वोया वंगु धासे अज्यागु गतिविधि मयायेत इनाप यागु दु।

प्रमुख जिल्ला अधिकारी कालीप्रसाद पराजुलीं छगु सूचं जारी यासे कोरोना संक्रमण अझ न जोखिम दु धासे थीथी सभा, सम्मेलन, धर्ना, जुलुस, गोष्ठी, ¥याली थे जागु गतिविधि जुया संक्रमणदर अझ न दु धका धागु दु।

थज्यागु गतिविधिं कोरोना संक्रमण अझ न अप्वोया स्वंगुगु लहर वयेफइगु सम्भावना दु धासा स्वास्थ्य मापदण्ड विपरीत अज्यागु गतिविधि मयायेत प्रजिअ पराजुलीं धागु दु।

‘जारी निषेधाज्ञा व स्वास्थ्य मापदण्डया उल्लंघन जुइगु गतिविधि याइगु÷याकल धासा प्रचलित कानुन बमोजिम कडा कारबाही जुइगु व्यहोरो सूचित याइ’ प्रशासन कार्यालय न सूचं जारी याना धागु दु।