सत्ता गठबन्धन पक्षधर वामपन्थी बुद्धिजिवी श्याम श्रेष्ठं भूमिसम्बन्धी समस्या समाधान आयोग खारेज याना शेरबहादुर देउवा नेतृत्व सरकारं गल्ती यागु दु धका धागु दु।

श्रेष्ठं भूमि आयोगय् मखुपि मनू लागु खःसा उमित चिइके माःगु खः। तर आयोग हे खारेज यायेगु गलत खः धका धागु दु। श्रेष्ठं वंगु सरकारया हरेक ज्याा उल्टे यायेगु बिचाः व संस्कृतिपाखे सरकार मुक्त जुइमाःगु खँय् बःबिगु दु। श्रेष्ठं धागु दु, ‘थ्व भूमिहीन, गरिब सुकुम्बासी व क्वय् वर्गया जनतायागु जीवन नाप स्वागु आयोग खः।

बालागु ज्या न्ह्याम्हेसिया यासा उगु  ज्यायात निरन्तरता बिइमाः धका धयादीगु खः। जनविरोधी देशघाती ज्या जक उल्टे यायेगु खः। मखुसा धरहरा न उल्टे यासा ज्यु लानि पूखुयात न भताभुंग यासा ज्यूनि।’

सरकारं मंगलबारया मन्त्रिपरिषद् बैठकं भूमि आयोग खारेज यागु खः।

नेकपा माओवादी केन्द्रया नेता नारायणकाजी श्रेष्ठं प्रतिनिधिसभा विघटन जुगुलि तत्कालीन प्रधानमन्त्री केपी शर्मा ओली जक जिम्मेवार मखु धका धागु दु।

श्रेष्ठं छगु वा मेगु रुपं उगु इलया सरकार व नेतापि न जिम्मेवार दु धका धागु दु। राष्ट्रियसभाया विशेष ई कया न्ववासे प्रवक्ता श्रेष्ठं धागु दु, ‘थुगु देशय् थथे बेहालया निति थुगु प्रवृत्तिया बाहक वयकः जक (केपी ओली जक) जिम्मेवार मखु।

दक्को राजनीतिक पार्टीपि, नेतापि, व स्वया न्ह्यः थीथी ढंगं सरकार चले यापि छगु वा मेगु रुपं, छगु वा मेगु हदतक जिम्मेवार दु।’

संसदय् विचाराधीन नागरिकता विधेयक याकन पारित यायेगु माग यासे येँया फिब्बख्यलय् थौं धर्ना बिगु दु।

‘नागरिकता विहीन नेपालीहरु’ समूहया संयोजकत्वय् थौं बुधबाः येँया फिब्बख्यलय् दबाबमूलक धर्ना बिगु दु।

उगु प्रदर्शनय् सहभागीपिन्स संविधानया धारा ११ या उपधारा (३) व (५) याकन कार्यान्वयन यायेत माग यागु दु।

अथेहे विगतया दिं नागरिकता कायेमखना सेवा सुविधाया क्षतिपूर्ति बिइ मागु धइगु उमिगु माग दु।

धर्ना लिपा येँया फिब्बख्यलं ¥याली पिकया न्हुगु बानेश्वरय् वना कोणसभाय् परिणत यागु खः।

वंगु २४ घण्टाया दुने थप ३ हजार ३८३ म्ह कोरोना भाइरस संक्रमण पुष्टि जुगुु दु।

१० हजार ६३८ म्हेसिगु नमुना पीसीआर परीक्षणय् २ हजार ४४८ म्ह व ६ हजार ८० एन्टिजेन परीक्षणय् ९३५ म्हेसित कोरोना संक्रमण खनेदुगु धका स्वास्थ्य तथा जनसंख्या मन्त्रालयं धागु दु।

अथेहे २४ घण्टाया दुने कोरोना संक्रमणं थप २४ म्ह सीगु दु सा १ हजार ९९४ म्ह कोरोनामुक्त जुगु दु।