वंगु २४ घण्टाया दुने देयन्यक थप ४,१०७ म्हेसित कोरोना भाइरस (कोभिड–१९) या संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं ११ हजार ३५४ म्हेसिगु नमुना पीसीआर परीक्षण यागुलि २,९७५ म्ह व ४,९४४ म्हेसित एन्टीजेन परीगक्षण यागुलि ११३२ म्ह याना ४,१०७ म्हेसित संक्रमण पुष्टि जूगु दु।

बुधबाः थपे जूपि नाप याना आःतक नेपालय् कोरोना संक्रमितपि ७ लाख ५ हजार ७२ म्ह थ्यंगु दु। उकि मध्ये ९ हजार ९५७ म्ह सी धुकुगु दु सा ६ लाख ६१ हजार ६५१ म्ह संक्रमणमुक्त जूगु दु।

नेपाल विद्युत प्राधिकरणया प्रमुख कार्यकारी निर्देशक हितेन्द्रदेव शाक्यं सरकार थःगु राजीनामा माग यागु मखुसे वैकल्पिक व्यवस्थाबारे न्यंगु खः धका स्पष्ट यागु दु।

मंगलबाः प्रधानमन्त्री शेरबहादुर देउवां प्राधिकरणया कार्यकारी निर्देशक शाक्यया थासय् कुलमान घिसिङयात नियुक्त यायेत निर्देशन बिगु खबर प्रधानमन्त्रीया सचिवालयपाखे सार्वजनिक जुगु खः। उकिया कन्ह्य कुन्हु हे पत्रकारपि नाप खँल्हानादीसे शाक्यं सरकारं थःगु राजीनामा फ्वंगु मखु बरु वैकल्पिक छु जिम्मेवारी बिइ फइ धइगु बारे खँ जुगु धका धागु दु।

‘जिगु  क्षमता, कथं व आःतकया दक्षता कथं न्ह्या थाय् जूसा जिम्मेवार बिउसा सरकारं खटे यागु थाय् वनेत थाकु मजू’ शाक्य धागु दु थःत अपमानजनक तरिकापाखे मखु सम्मानजनक रुपं आःयागु पदपाखे पिहावनेत तयार दु धइगु संकेत तक बिगु दु। सरकारं न्ह्यागु थासय् खटे यास थः ज्या यायेत तयार दु धासो थःम्हेसिया महामारीया दथुइ प्राधिकरणय् च्वना यक्को ज्यायानागु धका धागु दु।

थौं शेयर बजाः थहा वंगु दु।

थौं नेप्से १२ दशमलव शून्य ५ अङ्कं थहावंना ३ हजार १ सय २३ दशमलव १५ विन्दुइ थ्यंगु दु।

जलविद्युत् समूहया शेयर थौं न उत्साहजनक रूपं थहावंगु दु। थौं जलविद्युत् समूहया शेयर १ सय ९४ अङ्कं थहावंगु खः। अथेहे विकास बैंक समूहया शेयर ६५ अङ्क, उत्पादनया २५, फाइनान्स समूह ४४ व बैंकिङ समूह ४.५ अङ्कं थहावंगु दु

थौं माइक्रोफाइनान्स समुहया शेयर १२५ व निर्जीवन बीमा समूहया शेयर ८३ अङ्क घटे जुगु दु। अथेहे होटलया ८ व जीवन बीमा समूहया शेयर ३ अङ्कं घटे जुगु दु। थौं २२५ कम्पनीया २ करोड ८८ लाख १३ हजार कित्ता शेयर १५ अर्ब ५९ करोड ५७ लाख रुपैयाँ किनबेच जूगु दु।

अपी पावरया झन्डै ८० करोड रुपैयाँ बराबरया शेयर किनबेच जूगु दु। अपी पावर, दिव्यश्वरी हाइड्रो, खानीखोला हाइड्रो, कालिका पावर, माथिल्लो तामाकोशी, युनियन लाइफ व जीवन विकास लघुवित्तया शेयर १० प्रतिशतं थहावना सकारात्मक सर्किटय् थ्यंगु दु।

समग्र बजाः थहावंसा ङादी ग्रुप पावर कम्पनीया शेयर दकलय् अप्वो झण्डै साढे ५ अंक घटे जूगु दु।

सानिमा लाइफ इन्स्योरेन्सं सर्वसाधारणया लागि साधारण सेयर (आईपीओ) निष्कासन खुला यागु दु।

नेपाल धितोपत्र बोर्डया अनुमति वयेवं कम्पनीं थौं बुधबाः निसे ६० लाख कित्ता आईपीआया लागि आवेदन खुला यागु दु। कम्पनीं थःगु जारी पुँजी २ अर्बया ३० प्रतिशत अर्थात ६० करोड रुपैयाँ बराबर प्रति सेयर १०० या दरं आईपीओ निष्काशन यायेत्यंगु खः।

६० लाख कित्ता मध्ये ३ लाख कित्ता अर्थात कुल निष्कासनया ५ प्रतिशत सेयर  कर्मचारीपिन्त, ५ प्रतिशत हे सेयर सामूहिक लगानी कोषया लागि सुरक्षित यागु दु सा ल्यःदनिगु ५४ लाख कित्ता शेयर सर्वसाधारणमा निष्कासन यायेत्यंगु खः।

सानिमा लाइफं सेयर निष्काशन व बिक्री प्रबन्धकय् प्रभु क्यापिटलयात ल्यंगु दु। २० गते निसे खुला जुइगु आईपीओया लागि २४ गते तक आवेदन बिइ दइगु जुगु दु।