सरकारं थ्व हे वइगु साउन २५ निसे ३२ गते तक ‘खोप सप्ताह’ माने याइगु जुगु दु।

संसदया शिक्षा तथा स्वास्थ्य समितिं बिहीबाः च्वंगु बैठकय् न्ववासे स्वास्थ्य तथा जनसंख्या राज्यमन्त्री उमेश श्रेष्ठं साउन २५ गतेनिसे खोप सप्ताह माने यायेगु जानकारी बिगु दु।

उगु इलय् जापानपाखे वंगु ८ लाख व भुटानपाखे वंगु ३ लाख डोज कोरोना विरुद्धया खोप बिइगु धका धागु दु। निगु देशपाखे शनिबाः व आइतबाः तक खोप वय धुकिइ धका राज्यमन्त्री श्रेष्ठ जानकारी बिगु दु।

वइगु असोज तक १ करोड ५ लाख डोज खोप वइ धका धागु दु। राज्यमन्त्री श्रेष्ठं मस्तयत फाइजरया ६० लाख डोज खोप हयेगु प्रक्रिया न न्ह्याः वने धुकुगु दु धका जानकारी बिगु दु।

नेपाली कांग्रेसया रामचन्द्र पौडेल पक्षया नेतापि थौं छलफलय् लगे जुग दु।

नेता प्रकाशमान सिंहया निवासय् जुगु छलफलय् वरिष्ठ नेता पौडेल नाप, महामन्त्री शशांक कोइराला, बलबहादुर केसी, अर्जुननरसिंह केसी व डा. मिनेन्द्र रिजालपि सहभागी जुगु खः।

नेतापि दथुइ वइगु १४ क्वःगु महाधिवेशन व क्रियाशील सदस्यताया विवाद सम्बन्धय् छलफल जुगु धका प्रकाशमानया सचिवालयं धागु दु।

क्रियाशील सदस्यताया विवाद समाधान जुइ मफया वइगु भदौ १६ गते निर्धारित कांग्रेसया १४ क्वःगु महाधिवेशनया कार्यतालिका प्रभावित जूगु दु।

स्वास्थ्य तथा जनसंख्या मन्त्रालयं साउन महिना लिपा कोरोना संक्रमितपि घटे जुयावनिइ धका धागु दु।

साउन महिनायु जक ५३ हजार स्वया अप्वो न्हुपि संक्रमितपि थपे जुगु दु सा मन्त्रालयं थुगु ल्याः घटे जुया वना मंसिर महिना तक २५ हजार थ्यंवइगु धका धागु दु। स्वास्थ्य मन्त्रालयया नीति योजना व अनुगमन महाशाखा प्रमुख डा. गुणराज लोहनीं बिहीबाः संसदया शिक्षा स्वास्थ समितिइ पेश यागु विवरणय् साउनय् ५३ हजार ३०७, भदौय् ४५ हजार ७२६, असोज महिनाय् ३८ हजार ५९७ व भदौ महिनाय् ३१ हजार ४४ म्हेसित न्हुपि संक्रमित थपे जुगु उल्लेख यागु दु।

मंसिर महिनाय् थुगु ल्याः अझ न घटे जुया २५ हजार १८३ थ्यनिइगु सम्भावना दु धका लोहनीं धागु दु। साउननिसे मंसिर तक न्यालाया दुने १ लाख ९३ हजार ८ सय ५६ म्ह न्हुपि संक्रमितपि थपे जुइगु सम्भावना दु धका लोहनीं पेश यागु विवरणय् उल्लेख दु।

कोभिड–१९ या निगुया लहरया इलय् येँ महानगरपालिकां सञ्चालन यागु छत्रपाटी कोभिड विशेष अस्पताल व नरदेवी आइसोलेसन सेन्टरया सेवा आःया लागि स्थगन यागु दु।

बुधबाः कामपाया मेयर विद्यासुन्दर शाक्यया अध्यक्षताय् च्वंगु ६७ क्वंगु कार्यपालिका बैठकं कोभिड सङ्क्रमण रोकथाम व नियन्त्रणया लागि यागु ज्याझ्वः आःया लागि स्थगन यायेगु निर्णय यागु दु।‘आः मेमेगु अस्पतालय् बिरामीपिन्स यायउक उपचार जुया च्वंगुलि आइसोलेसनय् भर्ना जुइ दगुलि, वइगु दिनय् आवश्यक जूसा सेवायात निरन्तरता बिइगु याना आःया लागि सेवा स्थगन यागु दु,’ येँ महानगरपालिकाया प्रवक्ता ईश्वरमान डङ्गोलं धागु दु।

वयकःया कथं राधास्वामी आइसोलेसन सेन्टरयातयात आः दुगु जनशक्तिमध्ये छगु तिहाइ न सञ्चालन याना निरन्तरता बियाच्वंगु दु। ‘सेवा बन्द मखु, स्थगन खः।

अथेहे उगु बैठकं बन्दाबन्दीया कारण इलय् सम्पन्न मजुगु योजनाया म्याद थप यायेगु, वडा १२ य् रुद्र विनायक नाय्खिँ गणेश निर्माण यायेत जग्गा प्राप्तिया लागि नेपाल सरकारयात सिफारिस यायेगु लगायत निर्णय यागु दु। अथेहे नेपाल भाषा प्रशिक्षण व्यवस्था सम्बन्धी कार्यविधि, २०७७ य् छु भचा संशोधन याना नेपाल भाषाया सहायक प्रशिक्षकयात प्राथमिक तह तृतीय श्रेणीसरह दयकूगु दु।

अथेतु उगु बैठकं नेपाल भाषा सहजीकरण व अनुगमन समिति व नेपाल भाषा समन्वय समितिया पदाधिकारीपिन्त ज्या यागु दिं खाना, खाजा व यातायात बापत १ हजार ५०० रकम उपलब्ध यायेगु निर्णय यागु दु।

सत्तारूढ गठबन्धनं एमालेया माधव नेपाल समूहयात अझ न वइगु शुक्रबाः तक पिइगु  जुगु दु।

मन्त्रिपरिषद् विस्तारया लागि नेता नेपाल सरकारय् वइगु मवइगु सुनिश्चित यायेत शुक्रबाः तक पिइगु तयारी यागु दु। शेरबहादुर देउवा नेतृत्वं सरकार गठनय् निर्णायक भूमिका निर्वाह याम्ह नेता नेपालयात सरकारय् हयेगु लागि सत्ता गठबन्धनया नेतापिन्स बःबिया वयाच्वंगु खः।

देउवां फयाफतले नेता नेपाल समूह नाप मेमेगु दलयात ज्वना  मन्त्रिपरिषद् विस्तार यायेगु तयारी दु धका छम्ह नेतां धागु दु।

नेता नेपाल समूह सरकारय् सहभागी जूसा नेपाल समूह व माओवादी केन्द्रयात बराबरी ६÷६ मन्त्रालय बिइगु तयारी दु। जसपायात प्यम्ह व कांग्रेसयात च्यागु मन्त्रालय दइगु जुगु दु।