नेप्से आःतक दकलय् अप्वो थ्यन सेयर कारोबार मापक नेप्से परिसूचक आःतक हे दकलय् अप्वो उच्च विन्दुइ थ्यंगु दु।

मंगलबाः सुथय् कारोबार सुरु जुइवं हे नेप्से परिसूचक थहावंगु खः। कारोबार सुरु जुगु ९ मिनेटय् नेप्से परिसूचक थहावना ३ हजार १ सय बिन्दु स्वया अप्वो थ्यंगु खः।

थ्व नेपाःया सेयर बजारया इतिहासय् हे दकलय् अप्वो ल्याः खः। यक्को च्वय क्वय वया नेप्से परिसूचक २ बजे तक दुने ३ हजार १ सय ६ दशमलव ९६ अंकय् थ्यंगु खः।

नेप्से कारोबार जुगु अधिकांश समूहगत सबइन्डेक्सहरु थहावंगु दु।

येँ कोभिड–१९ विरुद्धया भेरोसेल खोप न्हापागु डोज काःपि ६० निसे ६४ दँ दुपि नागरिकपिन्स २२ साउननिसे निगुगु डोज बिइगु जुगु दु।

स्वास्थ्य कार्यालय येँया प्रमुख बद्रीबहादुर खड्कां छगु सूचं जारी यासे जेठ २५ गते उखे न्हापागु डोज कापिन्स जेष्ठ नागरिकपिन्त २२–२४ साउन तक खोप बिइगु ज्याझ्वः जुइ धका जानकारी बिगु दु।

खोपया न्हापागु डोज काये धुकुपिन्स स्ववाः पूरा जूपिन्स येँया दक्को पालिकाय् निगुगु डोजया खोप बिइगु सूचं बिगु दु।

सत्तारूढ गठबन्धनय् दुगु नेपाली कांग्रेस, माओवादी केन्द्र व जनता समाजवादी पार्टी सरकार सञ्चालन यायेत न्यूनतम साझा कार्यक्रम क्वछित लगे जूगु दु।

गठबन्धन दयकूगु कार्यदलया नेतापिनिगु मंकाः कार्यक्रमयात अन्तिम रूप बिइत मंगलबाः सुथनिसे प्रधानमन्त्री निवास बालुवाटारय् बैठक च्वनाच्वंगु दु। न्यूनतम मंकाः कार्यक्रमया मस्यौदा सोमबाः हे  टुंग्यय् याये धुकुगु खः।

उकिया बारे सोमबाः बहनि प्रधानमन्त्री शेरबहादुर देउवा, माओवादी अध्यक्ष पुष्पकमल दाहाल व जसपा अध्यक्ष उपेन्द्र यादवयात कार्यदलया संयोजक पूर्णबहादुर खड्कां जानकारी बिइ धुकुगु खः। प्रधानमन्त्री देउवाया सचिवालयं बिगु जानकारी कथं सोमबाः हे गठबन्धनया शीर्ष नेतापि मस्यौदाय् तःगु सुझाव दुथ्याकेत थौं कार्यदलया बैठक च्वंगु खः।

प्रधानमन्त्री देउवा, माओवादी अध्यक्ष दाहाल व जसपा अध्यक्ष यादवपि दथुइ न्यूनतम साझा कार्यक्रम क्वछिना मन्त्रिपरिषद् विस्तार यायेगु बारे छलफल जूगु खः।

उगु कार्यदलय् कांग्रेस महामन्त्री पूर्णबहादुर खड्का संयोजक, सदस्यय् कांग्रेसपाखे मीनेन्द्र रिजाल व रमेश लेखक, माओवादी केन्द्रपाखे वर्षमान पुन व देव गुरुङ नाप जसपापाखे महिन्द्र राय यादव व राजेन्द्र श्रेष्ठपि खः।

प्रधानमन्त्री शेरबहादुर देउवां कोभिड–१९ युनिफाइड केन्द्रीय अस्पतालया प्रमुख कार्यकारी अधिकारी डा. जागेश्वर गौतम नाप प्यम्हसिगु जिम्मेवारी हेरफेर यायेगु राज्यमन्त्री स्तरीय निर्णय स्थगित यागु दु।

प्रधानमन्त्री देउवां स्वास्थ्यमन्त्रीया जिम्मेवारी थःनाप हे तया उमेश श्रेष्ठयात राज्यमन्त्री नियुक्त यागु खः। राज्यमन्त्री श्रेष्ठं डा. गौतमयात प्रसूति तथा स्त्रीरोग अस्पताल थापाथली सरुवा यागु खःसा युनिफाइड केन्द्रीय अस्पतालया प्रमुख कार्यकारी अधिकारीयात ट्रमा सेन्टरय डा. रुद्र मरासिनी यात छ्वंगु खः।

अथेहे स्वास्थ्य समन्वय महाशाखाया डा. विवेकलाल कर्ण व सार्क क्षयरोग केन्द्रय् डा. रिता भण्डारीयात छ्वंगु खः।  तर प्रधानमन्त्री देउवां राज्यमन्त्रीं निर्णय याये मिले मजु धासे कार्यान्वयन मयायेत धागु खः। स्वास्थ्य मन्त्रालयया छम्ह उच्च अधिकारीं पनि प्रधानमन्त्री कार्यालयपाखे निर्णय कार्यान्वयन मयायेत निर्देशन वंगु दु धका पुष्टि यागु दु।

मेलम्ची खुसि म्हिगः चान्ह्यः बाः वया मेलम्ची–११ य् न्ह्यखा छेँ चुइकूगु दु।

मेलम्ची–११ पिपलबोटया हरिशरण श्रेष्ठ नाप खुखा छेँ व पुलागु बजाःया छखाँ छेँ चुइकूगु धका  स्थानीयपिन्स धागु दु। शनिवाः निसे मेलम्ची खुसिइ आःतक ६७ गु छेँ व टहरा चुकेधुकुगु दु।

हेलम्बुया किउल, चनौटे, ग्याल्थुम लगायत थासय् जक ५५ व तालामाराङ व मेलम्चीइ १२ छेँ व टहरा चुके धुकुगु दु धका जिल्ला प्रहरी कार्यालय सिन्धुपाल्चोकया प्रहरी उपरीक्षक राजन अधिकारीं जानकारी बिगु दु।

वयकःया कथं चनौटे ग्याल्थुम व ढुङ्गे्र बजार, मेलम्ची–१२ दुगु मध्यपहाडी लोकमार्ग नाप मेलम्ची, इन्द्रावती, चौतारा व पाँचपोखरीयात स्वाइगु छगु जक बाहुनेपाटी ताँ जोखिमय् लागु दु।

थ्व स्वया न्ह्य वंगु असार १ गते खुसिइ बाः वया बचे जुगु बाहुनेपाटी बजाः आः न जोखिमय् दु।